ఆఫీసు టాయ్ లెట్ లో 18 ఏళ్ల యువతి నివాసం.. నెలకు రూ.545 అద్దె

బతకాలి.. ఎలాగైనా బతికి తీరాలి. అందరూ బతికేందుకు నానా యాతన పడుతారు. ఖర్చులు తగ్గించుకొని తమ అవసరాలు తీర్చుకుంటారు. మనిషి బతికేది కూడు, గూడు, గుడ్డ.. ఈ మూడింటి కోసమే.. ఈ మూడు సమకూర్చుకునేవారు కూడా ఈ ప్రపంచంలో లేరు. చైనాలాంటి బలమైన ఆర్థిక వ్యవస్థ ఉన్న దేశంలోనూ ఇప్పటికీ అష్టకష్టాలు పడుకుంటూ ఆఫీసు టాయ్ లెట్ లో జీవించే వారు ఉన్నారంటే అతిశయోక్తి కాదు.

చైనాలో ఒక 18 ఏళ్ల యువతి తన ఖర్చులను తగ్గించుకోవడానికి ఒక వింతైన మార్గాన్ని ఎంచుకుంది. ఫర్నిచర్ స్టోర్‌లో పనిచేస్తున్న మిస్ యాంగ్ అనే ఈ యువతి తన కార్యాలయంలోని టాయిలెట్‌ను అద్దెకు తీసుకుని అందులోనే నివాసం ఉంటోంది. న్యూయార్క్ పోస్ట్ కథనం ప్రకారం.. ఆమె తన యజమానికి నెలకు కేవలం £5 పౌండ్లు (భారతీయ కరెన్సీలో ₹545) చెల్లిస్తోంది.

యాంగ్ మొదట నెలకు £21 పౌండ్లు (₹2,290) చెల్లించడానికి సిద్ధపడినప్పటికీ ఆమె యజమాని విద్యుత్ , నీటి ఖర్చులను మాత్రమే వసూలు చేస్తూ ఆమెను తక్కువ మొత్తానికే అనుమతించారు. కార్యాలయంలో తలుపు లేకపోవడంతో అసౌకర్యంగా భావించిన యాంగ్, టాయిలెట్‌ను తన నివాస స్థలంగా ఎంచుకుంది. గతంలో ఆమె తన యజమాని ఇంట్లోనే ఉండేది.

నెలకు దాదాపు £317 పౌండ్లు (₹34,570) సంపాదిస్తున్న యాంగ్, కేవలం £42 (₹4,580) మాత్రమే ఖర్చు చేస్తూ తన ఆదాయంలో ఎక్కువ భాగాన్ని ఆదా చేస్తోంది. ఆమె తన రోజువారీ జీవితాన్ని చైనా సోషల్ మీడియా ‘డౌయిన్‌’లో పంచుకుంటుంది. అక్కడ ఆమెకు 16,000 మంది ఫాలోవర్లు ఉన్నారు.

యాంగ్ టాయిలెట్ స్టాల్స్‌పై ఒక పెద్ద బట్టను వేలాడదీసింది. ఒక మడత మంచాన్ని ఏర్పాటు చేసుకుంది, అది ఇతరులు లోపలికి రాకుండా అడ్డుగా కూడా ఉపయోగపడుతుంది. ఆమెకు బట్టలు పెట్టుకోవడానికి ఒక రాడ్ ఉంది. అంతేకాకుండా ఆమె పోర్టబుల్ హాబ్ ఉపయోగించి టాయిలెట్‌లోనే వంట కూడా చేసుకుంటుంది. ఒక గుడ్డ పరిచిన అంచుపై కూరగాయలు చక్కగా పెట్టుకుని, చాపింగ్ బోర్డుపై ఆహారం తయారుచేస్తూ కనిపించింది. యాంగ్ తన బట్టలు కూడా టాయిలెట్‌లోనే ఉతుకుతుంది. భవనం పైకప్పుపై ఆరబెడుతుంది. నిద్రపోయేటప్పుడు వాసన రాకుండా ఉండేందుకు ఆమె ఆ స్థలాన్ని క్రమం తప్పకుండా శుభ్రం చేసుకుంటుంది.

దుకాణం తెరిచిన సమయంలో వినియోగదారులు.. ఉద్యోగులు టాయిలెట్‌ను ఉపయోగించడానికి వీలుగా ఆమె తన వస్తువులన్నింటినీ సర్దుకుంటుంది. సందర్శకులు కొన్నిసార్లు టాయిలెట్‌లో వ్యక్తిగత వస్తువులు చూసి ఆశ్చర్యపోయినప్పటికీ ఎవరూ కూడా ఆ యువతి కష్టాలు చూసి ఏమీ అనేవారు కాదు.

యాంగ్ తన జీవనశైలితో సంతోషంగా ఉంది. భవిష్యత్తులో ఒక ఇల్లు లేదా కారు కొనడానికి తగినంత డబ్బు ఆదా చేయాలని ఆశిస్తోంది. అయితే ఆమె యజమాని కూడా ఆమె తన ఖర్చుల విషయంలో "మరీ పిసినారి"గా వ్యవహరిస్తుందని వ్యాఖ్యానించారు.

మొత్తంగా జీవన పోరాటాన్ని బాత్రూంలోనే వెళ్లదీస్తున్న ఈ యువతి కథ నేటి యువతరానికి నిజంగా స్ఫూర్తిదాయకమే అనడంలో ఎలాంటి సందేహం లేదు.