అమెరికాలో ఉక్రెయిన్ యువతి హత్య.. ట్రంప్ డెత్ పెనాల్టీ డిమాండ్ వైరల్

అమెరికా నార్త్ కరోలైనాలోని షార్లెట్ లైట్ రైలులో ఆగస్టు 22, 2025న ఈ దారుణం జరిగింది. రష్యా-ఉక్రెయిన్ యుద్ధం నుంచి తప్పించుకుని అమెరికాకు వచ్చిన 23 ఏళ్ల ఇరినా జరుట్స్కాను 34 ఏళ్ల డీకార్లోస్ బ్రౌన్ జూనియర్ అనే వ్యక్తి రైలులోనే కత్తితో పొడిచి చంపాడు. ఈ ఘటన మొత్తం రైలులోని సీసీటీవీలో రికార్డయ్యింది. ఇరినా ప్రశాంతంగా తన ఫోన్ చూసుకుంటూ కూర్చున్న సమయంలో ఆమె వెనుక సీట్లో కూర్చున్న బ్రౌన్ ఒక్కసారిగా ఆమెపై దాడి చేశాడు.

*ట్రంప్ ఆగ్రహం, మరణశిక్ష డిమాండ్

ఈ దారుణమైన హత్యపై అధ్యక్షుడు ట్రంప్ తీవ్ర ఆగ్రహం వ్యక్తం చేశారు. తన ట్రూత్ సోషల్ ఖాతాలో స్పందిస్తూ "శాంతి కోసం అమెరికాకు వచ్చిన ఒక అమాయక ఉక్రెయిన్ యువతిని క్రూరంగా హత్య చేసిన ఈ మృగానికి త్వరితగతిన విచారణ జరిపి కేవలం మరణశిక్ష మాత్రమే విధించాలి" అని పేర్కొన్నారు. ఈ ఘటన అమెరికాలో శాంతిభద్రతల లోపానికి నిదర్శనమని ట్రంప్ వ్యాఖ్యానించారు.

* నిందితుడి నేర చరిత్ర

హత్య చేసిన డీకార్లోస్ బ్రౌన్ జూనియర్‌కు పలు నేర చరిత్ర ఉంది. గతంలో అనేకసార్లు దాడులు, దోపిడీలు, ఆయుధాలు కలిగి ఉండడం వంటి నేరాలకు పాల్పడి జైలు శిక్ష అనుభవించాడు. అతడు స్కిజోఫ్రెనియాతో బాధపడుతున్నాడని, అతని తల్లి కూడా అతడిని బయట తిరగడానికి వీలు లేదని చెప్పినట్టు సమాచారం. గతంలో పలుమార్లు బెయిల్ మీద విడుదల కావడంతో ఈ దారుణం జరిగిందని ట్రంప్, ఇతర రిపబ్లికన్లు విమర్శించారు. ఈ కేసు ఇప్పుడు ఫెడరల్ కోర్టు పరిధిలోకి తీసుకురాబడింది.

రాజకీయ ఆరోపణలు

ఈ హత్య ఘటన అమెరికాలో రాజకీయ వివాదాలకు దారితీసింది. రిపబ్లికన్లు డెమోక్రాట్లు అధికారంలో ఉన్న నగరాల్లో శాంతిభద్రతలు క్షీణించాయని ఆరోపించారు. "సాఫ్ట్ ఆన్ క్రైమ్" విధానాల వల్ల నేరస్తులు సులభంగా బెయిల్ పొంది మళ్లీ నేరాలకు పాల్పడుతున్నారని విమర్శించారు. మరోవైపు డెమోక్రాట్లు, రిపబ్లికన్లు పోలీసులకు తగినన్ని నిధులు కేటాయించడంలో విఫలమయ్యారని ఆరోపించారు.

ఇరినా జరుట్స్కా హత్య ఒక వ్యక్తిగత విషాదం మాత్రమే కాదు, అమెరికాలోని న్యాయవ్యవస్థ, నేర నియంత్రణ విధానాలు, రాజకీయ వ్యవస్థపై ఒక పెద్ద చర్చకు కారణమైంది. ఈ ఘటన అమెరికాలో భద్రతపై ప్రజల ఆందోళనలను పెంచింది.