అమెరికాపై ప్రతీకార సుంకాలు.. షాకిచ్చిన కెనడా

అమెరికా అధ్యక్షుడు ట్రంప్ హయాంలో మొదలైన వాణిజ్య యుద్ధం చైనాను మాత్రమే కాకుండా, దాని ఉత్తర సరిహద్దు దేశమైన కెనడాను కూడా తాకింది. అమెరికా విధించిన ఏకపక్ష సుంకాలను నిరసిస్తూ కెనడా కూడా ప్రతికార చర్యలకు దిగింది. తాజాగా, అమెరికా వాహనాలపై భారీగా 25 శాతం దిగుమతి సుంకాలు విధిస్తున్నట్లు కెనడా ప్రకటించడం ఇరు దేశాల మధ్య ఉద్రిక్తతలను మరింత పెంచింది.

కెనడా ప్రధాని మార్క్ కార్ని స్వయంగా ఈ విషయాన్ని ట్విట్టర్ ద్వారా వెల్లడించారు. వాషింగ్టన్ ప్రభుత్వం విధించిన సుంకాలను తిప్పికొట్టేందుకే ఈ నిర్ణయం తీసుకున్నట్లు ఆయన స్పష్టం చేశారు. కెనడా-యునైటెడ్ స్టేట్స్-మెక్సికో ఒప్పందం (CUSMA) పరిధిలోకి రాని అన్ని రకాల వాహనాలపై ఈ కొత్త సుంకాలు వర్తిస్తాయని ఆయన తెలిపారు. ట్రంప్ యొక్క వివాదాస్పద వాణిజ్య విధానాలే ఈ పరిస్థితికి కారణమని కార్ని ఆరోపించారు. "ట్రంప్ ఈ వాణిజ్య సంక్షోభానికి కారకులు. కెనడా కేవలం తన లక్ష్యాన్ని కాపాడుకోవడానికి శక్తివంతంగా స్పందించింది" అని ఆయన పేర్కొన్నారు.

కెనడా ఆర్థిక మంత్రి ఫ్రాంకోయిస్ ఫిలిప్ కూడా ఇదే అభిప్రాయాన్ని వ్యక్తం చేశారు. "అమెరికా ఎటువంటి కారణం లేకుండా విధించిన సుంకాలను కెనడా తన శక్తి మేరకు ప్రతిఘటిస్తూనే ఉంటుంది. ఈ సుంకాలను తొలగించి, కెనడాలోని ఉద్యోగులు, వ్యాపారాలు, ఆర్థిక వ్యవస్థ , పరిశ్రమలను రక్షించడానికి ప్రభుత్వం కట్టుబడి ఉంది" అని ఆయన చెప్పారు.

ట్రంప్ అధికారంలోకి వచ్చిన తర్వాత అమెరికా-కెనడా సంబంధాలు క్రమంగా క్షీణించాయి. ముఖ్యంగా టారిఫ్‌ల విధింపుతో ఈ పరిస్థితి మరింత దిగజారింది. గతంలో మార్చి 4న కెనడా నుండి దిగుమతి చేసుకునే వస్తువులపై ట్రంప్ 25 శాతం, ఇంధనం , పొటాష్‌పై 10 శాతం టారిఫ్‌లు విధించారు. ఆ తర్వాత వీటిని సీయూఎస్‌ఎంఏ పరిధిలోకి రాని వాటికి మాత్రమే పరిమితం చేశారు.

అంతేకాకుండా, మార్చి 12న కెనడా నుండి వచ్చే ఉక్కు , అల్యూమినియం ఉత్పత్తులపై 25 శాతం సుంకం విధించారు. ఏప్రిల్ 3 నుండి కెనడా నుండి దిగుమతి అయ్యే వాహనాలపై.. మే 3 నుండి విడిభాగాలపై కూడా 25 శాతం పన్ను విధించారు. ఈ చర్యలకు ప్రతిగా కెనడా కూడా అమెరికా నుండి వచ్చే దిగుమతులపై తగిన విధంగా సుంకాలు విధించడం ప్రారంభించింది.

మరోవైపు, అమెరికా సుంకాలను ఎదుర్కొంటున్న అనేక దేశాలు తమతో ఒప్పందాలు కుదుర్చుకోవడానికి ఆసక్తి చూపుతున్నాయని ట్రంప్ అన్నారు. రిపబ్లికన్స్ కాంగ్రెషనల్ కమిటీ డిన్నర్‌లో ఆయన మాట్లాడుతూ, "ప్లీజ్ సార్.. ఓ డీల్ చేసుకుందాం" అంటూ అనేక దేశాల ప్రతినిధులు తనను అడుగుతున్నారని చెప్పారు. అయితే, ఏ దేశాల ప్రతినిధులు తనకు ఫోన్ చేశారో మాత్రం ఆయన వెల్లడించలేదు. కానీ, వాణిజ్య ఒప్పందాల కోసం వియత్నాం, ఇజ్రాయెల్ , దక్షిణ కొరియా దేశాధినేతలు తనకు ఫోన్ చేసినట్లు తెలుస్తోంది.

మొత్తానికి, అమెరికా - కెనడా మధ్య వాణిజ్య వివాదం రోజురోజుకూ ముదురుతోంది. ఒకప్పుడు సన్నిహిత మిత్రదేశాలుగా ఉన్న ఈ రెండు దేశాలు ఇప్పుడు ఒకరిపై మరొకరు సుంకాలు విధించుకుంటూ ఆర్థికంగా పోరాడుకుంటున్నాయి. ఈ పరిణామాలు రాబోయే రోజుల్లో ప్రపంచ వాణిజ్యంపై ఎలాంటి ప్రభావం చూపుతాయో వేచి చూడాలి.