హైదరాబాద్లో 100 అడుగుల ఎన్టీఆర్ విగ్రహం!
| ఏడాదిన్నర కాలంగా ఎన్టీఆర్ లిటరేచర్‌ కమిటీ చేపట్టిన కార్యక్రమాలను ముఖ్యమంత్రి శ్రీ రేవంత్‌ రెడ్డికి వివరించిన వారు.. హైదరాబాద్లో 100 అడుగుల ఎత్తుతో ఎన్టీఆర్ విగ్రహాన్ని నెలకొల్పాలన్న సంకల్పాన్ని వివరించారు.
విశ్వవిఖ్యాత న‌ట‌సార్వ‌భౌముడు, అన్న‌గారు ఎన్టీఆర్ 100 అడుగుల విగ్రహాన్ని ఏర్పాటు చేసేందుకు తెలంగాణ ప్రభుత్వం అనుమ‌తి ల‌భించింది. ఎన్టీఆర్ కుమారుడు నందమూరి మోహనకృష్ణ, ఎన్టీఆర్ లిటరేచర్‌ సభ్యులు మధుసూదన రాజు... తెలంగాణ రాష్ట్ర వ్యవసాయ శాఖా మాత్యులు తుమ్మల నాగేశ్వరరావు తో కలిసి ముఖ్యమంత్రి శ్రీ ఎ.రేవంత్‌ రెడ్డి గారిని కలిసి దీనిపై చ‌ర్చించారు.
ఏడాదిన్నర కాలంగా ఎన్టీఆర్ లిటరేచర్‌ కమిటీ చేపట్టిన కార్యక్రమాలను ముఖ్యమంత్రి శ్రీ రేవంత్‌ రెడ్డికి వివరించిన వారు.. హైదరాబాద్లో 100 అడుగుల ఎత్తుతో ఎన్టీఆర్ విగ్రహాన్ని నెలకొల్పాలన్న సంకల్పాన్ని వివరించారు. దానితోపాటు ఎన్టీఆర్ నాలెడ్జి సెంటర్‌ను ఏర్పాటు చేస్తామని.. పర్యాటక కేంద్రంగా తీర్చిదిద్దాలనుకొంటున్నామని సీఎంకి తెలిపారు. ఇందుకుగాను తెలంగాణ ప్రభుత్వం తరఫున స్థలాన్ని కేటాయించి సహకరించాలని కోరగా హైదరాబాద్లో, ప్రత్యేకించి ఔటర్‌ రింగ్‌ రోడ్డు సమీపంలో తెలుగుదేశం వ్యవస్థాపక అధ్యక్షులు, విశ్వవిఖ్యాత నట సార్వభౌములు నందమూరి తారక రామారావు వంద అడుగుల విగ్రహం ప్రతిష్టాపనకు ,ఎన్టీఆర్ నాలెడ్జ్‌ సెంటర్‌ ఏర్పాటు కోసం ప్రభుత్వపరంగా స్థలం కేటాయించడానికి ముఖ్యమంత్రి రేవంత్‌ రెడ్డి అంగీకరించార‌ని వారు తెలిపారు.
ఎన్టీఆర్ లిటరేచర్‌ కమిటీ చేస్తున్న కార్యక్రమాలను తెలుసుకొన్న సీఎం శ్రీ రేవంత్‌ రెడ్డి అభినందించారు. ఎన్టీఆర్ తెలుగు ప్రజలందరికీ ఇష్టమైన నటుడు, నాయకుడని.. ఆయన 100 అడుగుల విగ్రహం హైదరాబాద్లో ప్రతిష్టించాలన్న ప్రతిపాదనకు తమవంతు సహకారం అందిస్తామని ముఖ్యమంత్రి పేర్కొన్నారు.
ముఖ్యమంత్రి రేవంత్‌ రెడ్డి సానుకూల స్పందనకు ఎన్టీఆర్ అభిమానులందరూ సంతోషిస్తున్నారు. ఆయనకు ఎన్టీఆర్ లిటరేచర్‌ కమిటీ తరఫున కృతజ్ఞతను, ధన్యవాదాలను తెలియచేస్తున్నామ‌ని మధుసూదన రాజు అన్నారు.
లెజెండ‌రీ నటుడు ఎన్టీఆర్ కి ఇప్ప‌టికే ఇరు తెలుగు రాష్ట్రాల్లో చాలా న‌గ‌రాల్లో విగ్ర‌హాలు ఉన్నాయి. ఇప్పుడు హైదరాబాద్ లో ఏర్పాటు చేసే విగ్రహం వీట‌న్నిటికంటే గ్రాండియ‌ర్ గా ఉంటుంద‌ని చెబుతున్నారు.