తక్కువ గ్యాప్‌లో 3 సినిమాలు.. హిట్ ఫార్ములా? లేక రిస్కీ గేమ్?

మాస్ కా దాస్ విశ్వక్ సేన్ బాక్సాఫీస్ వద్ద ఊహించని విచిత్రమైన ప్రయోగానికి తెరలేపారు. కేవలం 34 రోజుల వ్యవధిలోనే ఏకంగా మూడు సినిమాలు రిలీజ్ చేసేందుకు సిద్ధమయ్యారు. ఒకే హీరో సినిమాలు ఇంత తక్కువ వ్యవధిలో వస్తే ప్రేక్షకులు ఆదరిస్తారా లేక ఓవర్‌డోస్ అని పక్కన పెడతారా అనేది ఇప్పుడు ఫిలిం నగర్‌లో హాట్ టాపిక్‌గా మారింది. ఈ నిర్ణయం హిట్ ఫార్ములాగా మారుతుందా లేక పెద్ద రిస్క్ కానుందా అనే పూర్తి వివరాలు ఇక్కడ చూద్దాం.

ఆడియన్స్ మైండ్ సెట్ – ఫెటీగ్ రిస్క్:

నేటి రోజుల్లో ప్రేక్షకులను థియేటర్లకు రప్పించడం పెద్ద సవాలుగా మారింది. అలాంటి టైమ్‌లో రెండు వారాల గ్యాప్‌లో ఒకే హీరో సినిమాలు వస్తే ఆడియన్స్‌కు బోర్ కొట్టే ప్రమాదం ఉంది. ఒకే హీరోను మళ్లీ మళ్లీ తెరపై చూడటం వల్ల ఇంట్రెస్ట్ తగ్గుతుంది.

జేబుకు చిల్లు – టికెట్ బడ్జెట్ భారం:

ఇక ఎంత పెద్ద ఫ్యాన్ అయినా సరే, నెల రోజుల్లో మూడుసార్లు థియేటర్‌కు వెళ్లి టికెట్లు, పాప్‌కార్న్ కోసం డబ్బులు ఖర్చు పెట్టడం సగటు కుటుంబానికి పెద్ద భారం. ఈ ఖర్చుల వల్ల ప్రేక్షకుడు ఏ ఒక్క సినిమాకో పరిమితమయ్యే ఛాన్స్ ఉంది.

మొదటి టాక్ ప్రభావం – మిగతా సినిమాలపై ఎఫెక్ట్ :

తక్కువ గ్యాప్‌లో సినిమాలు వచ్చినప్పుడు మొదటి సినిమా ఇచ్చే ఫలితం చాలా కీలకం. ఒకవేళ మొదటి సినిమా నెగెటివ్ టాక్ తెచ్చుకుంటే, ఆ ప్రభావం తర్వాతి రెండు సినిమాల ఓపెనింగ్స్‌పై నేరుగా పడుతుంది. ఇక ప్రమోషన్ల విషయంలో కూడా గందరగోళం ఏర్పడుతుంది.

పబ్లిసిటీ రగడ – థియేటర్ల వేట:

మూడు వేర్వేరు సినిమాలకు ప్రమోషన్లు చేయడం మేకర్స్‌కు భారీ ఆర్థిక భారంతో కూడుకున్న పని. ఒక సినిమా పాటలు, టీజర్లు మార్కెట్లో ఉండగానే ఇంకో సినిమా ప్రమోషన్లు వస్తే దేనికీ సరైన ప్రాధాన్యత దక్కదు. పోటీ వల్ల థియేటర్ల దొరకడం కూడా కష్టమవుతుంది.

భిన్నమైన జానర్లు – ప్లస్ పాయింట్ అవుతుందా?:

ఈ రిస్క్‌లో ఉన్న ఒకే ఒక పాజిటివ్ కోణం ఏంటంటే మూడు సినిమాలు వేర్వేరు జానర్లలో రాబోతున్నాయి. ఒకవేళ మొదటి సినిమా సూపర్ హిట్ అయితే, ఆ పాజిటివ్ వైబ్ తర్వాతి సినిమాలకు తిరుగులేని హైప్‌ను క్రియేట్ చేసే అవకాశం ఉంది.