ది ట్రేటర్స్ తెలుగు వివాదం.. ధనుంజయ్‌పై పోలీసులకు ఫిర్యాదు చేసిన శ్రీదేవి చౌదరి!

బిగ్ బాస్ లాంటి షోలు బాగా ప్రజాదరణ పొందుతూ ఉంటాయి. ఇలాంటి థియరీనే ఫాలో అవుతూ తెలుగు రియాలిటీ షో ది ట్రేటర్స్ తెలుగు ప్రస్తుతం మంచి ఆదరణ పొందుతోంది. ప్రముఖ నటుడు తేజ సజ్జా హోస్ట్‌గా వ్యవహరిస్తున్న ఈ షో అమెజాన్ ప్రైమ్ వీడియోలో ప్రసారం అవుతోంది. విడుదలైనప్పటి నుంచి ఈ షో ప్రేక్షకులను బాగా ఆకట్టుకుంటోంది. అంతేకాకుండా ఇండియాలో ఎక్కువ మంది చూస్తున్న ట్రెండింగ్ షోలలో ఒకటిగా నిలుస్తోంది. అయితే ఈ షోకు సంబంధించిన ఒక వివాదం ఇప్పుడు వార్తల్లో నిలిచింది.

ఈ షోలో పాల్గొన్న కంటెస్టెంట్స్ ధనుంజయ్, శ్రీదేవి చౌదరి మధ్య పెద్ద వివాదమే చోటుచేసుకుంది. ధనుంజయ్ తనను సోషల్ మీడియాలో వేధిస్తున్నాడని ఆరోపిస్తూ శ్రీదేవి చౌదరి పోలీసులను ఆశ్రయించారు. తనపై అభ్యంతరకరమైన మీమ్స్ పెడుతూ, అసభ్యకరమైన కామెంట్స్ చేస్తున్నారని ఆమె ఫిర్యాదులో పేర్కొన్నట్లు తెలుస్తోంది.

ధనుంజయ్‌తో పాటు అతని ఫాలోవర్లు కూడా తనను లక్ష్యంగా చేసుకుని సోషల్ మీడియాలో పోస్టులు పెడుతున్నారని.. ముఖ్యంగా ఇన్‌స్టాగ్రామ్‌లో 'ధను-దిను' పేరుతో ఉన్న ఒక అకౌంట్ ద్వారా తనపై అభ్యంతరకరమైన మీమ్స్, కామెంట్స్ ప్రచారం చేస్తున్నారని ఆమె ఫిర్యాదులో ప్రస్తావించినట్లు తెలుస్తోంది.

ఈ వ్యవహారంలో ధనుంజయ్‌తో పాటు అతని ఫాలోవర్లపై కూడా చర్యలు తీసుకోవాలని ఆమె పోలీసులను కోరినట్లు సమాచారం. ఈ ఫిర్యాదును స్వీకరించిన పోలీసులు కేసు నమోదు చేసి విచారణ ప్రారంభించినట్లు తెలుస్తోంది.

నిజానికి ‘ది ట్రేటర్స్ తెలుగు’ షోలో కంటెస్టెంట్స్ మధ్య జరిగే గొడవలు, వ్యూహాలు, మాటల యుద్ధం ప్రేక్షకుల్లో ఆసక్తిని పెంచాయి. షోలో కనిపించిన వివాదాలు బయట కూడా కొనసాగుతున్నాయా అని ప్రస్తుతం ఈ వార్తలు విన్న అందరూ ఆశ్చర్యపోతున్నారు.

ఇప్పటికే దేశవ్యాప్తంగా మంచి గుర్తింపు తెచ్చుకుంటున్న ఈ రియాలిటీ షోకు తాజా వివాదం మరింత ప్రచారం తీసుకొచ్చింది. అయితే ఈ ఆరోపణలపై ధనుంజయ్ స్పందన ఏమిటన్నది తెలియాల్సి ఉంది. పోలీసుల విచారణలో ఈ వ్యవహారానికి సంబంధించిన పూర్తి వివరాలు బయటకు వచ్చే అవకాశం ఉంది. అప్పటివరకు ఈ వివాదంపై మరిన్ని వివరాల కోసం వేచి చూడాల్సిందే.