రీల్ లైఫ్, రియల్ లైఫ్.. పవన్ ఫుల్ మాస్: విజయ్

సినిమాల్లోనే కాదు.. రాజకీయాల్లో కూడా తాను పవర్ స్టార్ అని పవన్ కళ్యాణ్ నిరూపించుకున్న విషయం తెలిసిందే. పదేళ్లకుపైగా రాజకీయాల్లో ఉన్న జనసేనాని.. ఈసారి ఎన్నికల్లో అద్భుతమైన విజయాన్ని అందుకున్నారు. పిఠాపురంలో భారీ మెజారిటీతో గెలుపొందారు. రాష్ట్రంలో టీడీపీ- జనసేన- బీజేపీ కూటమిగా ఏర్పడడానికి కీలక పాత్ర పోషించారు. ఎన్నికల్లో 21కి 21 స్థానాల్లో తన పార్టీని గెలిపించి నేషనల్ వైడ్ గా చర్చనీయాంశంగా మారారు.

అయితే పవన్ కళ్యాణ్.. విజయం సాధించిన తర్వాత పెద్ద ఎత్తున ప్రశంసలు అందుకున్నారు. సోషల్ మీడియాలో ఎక్కడ చూసినా ఆయనకు సంబంధించిన ట్వీట్లే కనిపించాయి. మెగాస్టార్ ఇంట్లో పవర్ విన్నింగ్ సెలబ్రేషన్స్ జరిగాయి. అనేక మంది సినీ ప్రముఖులు.. పవన్ కు బెస్ట్ విషెస్ తెలిపారు. భారీ విజయం సాధించడం పట్ల సంతోషం వ్యక్తం చేశారు. ఇప్పుడు కోలీవుడ్ స్టార్ హీరో విజయ్ సేతుపతి కూడా విషెస్ చెప్పారు.

కోలీవుడ్ తో పాటు టాలీవుడ్ లో కూడా ఫ్యాన్ బేస్ సంపాదించుకున్న విజయ్ సేతుపతి నటిస్తున్న లేటెస్ట్ మూవీ మహారాజా రిలీజ్ కు సిద్ధమవుతోంది. తమిళంతో పాటు తెలుగులో కూడా ఈ మూవీ జూన్ 14వ తేదీన విడుదల కానుంది. ఈ నేపథ్యంలో మేకర్స్.. హైదరాబాద్ లో ప్రెస్ మీట్ ఏర్పాటు చేశారు. ఆ సమయంలో ఓ జర్నలిస్టు అడగ్గా.. పవన్ విక్టరీపై స్పందించారు విజయ్.

"పవన్ కు నా బెస్ట్‌ విషెస్‌ చెబుతున్నాను. ఆయన కష్టాన్ని గౌరవిస్తాను. ఎన్నికల్లో విజయం సాధించడం చాలా హ్యాపీగా ఉంది. ఆయన ఎలక్షన్స్ లో పోటీ చేస్తున్నప్పుడు చాలా ట్రోల్స్ వచ్చాయని విన్నాను. తొడ కొట్టిన వీడియో చూశాను. అప్పుడే రియల్ లైఫ్‌ లో కూడా ఆయన ఎంత మాసో అర్థమైంది. ఏం జరిగినా స్థిరంగా ఉండటం చాలా ముఖ్యం. ఎవరి కథలోనో ఆయన హీరో కాదు.. ఆయన కథలో ఆయనే హీరో" అని విజయ్ ప్రశంసలు కురిపించారు.

"పవన్‌ సార్ గురించి నాకు పెద్దగా తెలియదు. కానీ నా వాట్సాప్ స్టేటస్ లో కొందరు తెలుగు వాళ్లు పెట్టిన పవన్ వీడియోస్ చూసి ఏమైందని అడిగాను. అప్పుడు వాళ్లు చాలా విషయాలు చెప్పారు. మీమ్స్‌, ట్రోల్స్‌, టీజింగ్‌ ను ఎవరైతే స్ట్రాంగ్ గా ఎదుర్కొంటారో.. వారు చాలా స్ట్రాంగ్‌ గా అని అర్థం. రీల్ లైఫ్ లోనే కాదు రియల్ లైఫ్ లో కూడా పవన్ మాస్. అన్నీ తట్టుకుని ఆయనంటే ఏంటో చూపించారు" అంటూ గొప్పగా మాట్లాడారు విజయ్ సేతుపతి. ప్రస్తుతం ఆయన వ్యాఖ్యలు నెట్టింట తెగ చక్కర్లు కొడుతున్నాయి.