VD 12కి సీక్వెల్… ఆలస్యం అందుకేనా?

విజయ్ దేవరకొండ హీరోగా గౌతమ్ తిన్ననూరి దర్శకత్వంలో VD12 మూవీ స్టార్ట్ అయిన సంగతి తెలిసిందే. భారీ బడ్జెట్ తో సితార ఎంటర్టైన్మెంట్స్ ఈ చిత్రాన్ని నిర్మిస్తోంది. విజయ్ దేవరకొండ కెరియర్ ఫస్ట్ టైం హైయెస్ట్ బడ్జెట్ తో భారీ యాక్షన్ బ్యాక్ డ్రాప్ స్టొరీతో చేస్తోన్న మూవీ ఇదే కావడం విశేషం. ఈ చిత్రంలో శ్రీలీల హీరోయిన్ గా నటిస్తోంది.

ఇప్పటికే ఈ మూవీ షూటింగ్ స్టార్ట్ అయ్యి ఫస్ట్ షెడ్యూల్ కంప్లీట్ అయ్యింది. ప్రస్తుతం విజయ్ దేవరకొండ పరశురామ్ దర్శకత్వంలో ఫ్యామిలీ స్టార్ మూవీ చేస్తున్నాడు.ఈ సినిమా షూటింగ్ శరవేగంగా సాగుతోంది. దిల్ రాజు నిర్మిస్తోన్న ఈ మూవీని సంక్రాంతికి రిలీజ్ చేయాలని ప్లాన్ చేస్తున్నారు. అందు వలనే ఫస్ట్ ఈ సినిమా షూటింగ్ ఫినిష్ చేయడంపై దేవరకొండ దృష్టి పెట్టాడు.

ఇదిలా ఉంటే VD12 చిత్రం గురించి నిర్మాత నాగ వంశీ తాజాగా ఇంటరెస్టింగ్ విషయాలు బయటపెట్టారు. ఈ సినిమా హై వోల్టేజ్ యాక్షన్ చిత్రంగా తెరకెక్కనున్నట్లు క్లారిటీ ఇచ్చారు. సుమారు వంద కోట్ల వరకు బడ్జెట్ అవుతుందని పక్కా ప్లాన్ తో సినిమా చేయనున్నట్లు తెలిపారు. అలాగే సినిమాకి సీక్వెల్ ఆలోచన కూడా ఉందని స్పష్టం చేశారు.

మూవీకి రెండు రకాల క్లైమాక్స్ అనుకున్నామని, సీక్వెల్ కి సరిపోయే విధంగానే ముగింపు ఉంటుందని అన్నారు. అయితే సినిమా సక్సెస్ అయితే కచ్చితంగా సీక్వెల్ ప్లాన్ చేస్తామని, ఒకవేళ రిజల్ట్ ఆశించిన స్థాయిలో రాకపోతే దానిని పక్కన పెడతామని అన్నారు. సీక్వెల్ కి కావాల్సిన లైన్ కూడా ఇప్పటికే డైరెక్టర్ సిద్ధం చేసారని, కాని ప్రస్తుతం చేస్తోన్న మూవీ రిలీజ్ తర్వాత దానిపై స్పష్టత వస్తుందని అన్నారు.

మొత్తానికి VD12 చిత్రాన్ని విజయ్ దేవరకొండ కెరియర్ ని గ్రాండియర్ గా ఆవిష్కరించే మూవీగానే ప్లాన్ చేస్తున్నట్లు నాగ వంశీ మాటలతో తెలుస్తోంది. మళ్ళీరావా, జెర్సీ సినిమాలతో సక్సెస్ అందుకున్న గౌతమ్ తిన్ననూరి తనని తాను కమర్షియల్ డైరెక్టర్ గా ప్రూవ్ చేసుకోవడానికి ఈ యాక్షన్ ప్యాక్డ్ కథతో మూవీ చేస్తూ ఉన్నారనే టాక్ వినిపిస్తోంది. రామ్ చరణ్ తో అనుకున్న కథలో కొద్దిగా మార్పులు చేసి దేవరకొండతో చేస్తున్నట్లు సమాచారం.