సీనియ‌ర్ ఎన్టీఆర్‌తో క‌ళ్యాణ్ రామ్ పోలిక‌!

సీనియ‌ర్ ఎన్టీఆర్ తో నంద‌మూరి క‌ళ్యాణ్ రామ్ పోలిక ఇప్పుడు ప‌రిశ్ర‌మ‌లో హాట్ టాపిక్ గా మారింది. అయితే క‌ళ్యాణ్ రామ్ ని ఎన్టీఆర్ తో పోల్చిన‌ది ఎవ‌రో తెలుసా? లేడీ సూప‌ర్ స్టార్ విజ‌య‌శాంతి అత‌డిని ఒక రేంజులో పొగిడేశారు. నటుడు నిర్మాత నందమూరి కళ్యాణ్ రామ్ ఎదుటివారికి ఇచ్చే గౌర‌వానికి విజ‌య‌శాంతి ఎంతో మురిసిపోయారు. ప్రస్తుతం అత‌డు తాను న‌టించిన 'డెవిల్' విడుద‌ల‌ కోసం ఎదురుచూస్తున్నాడు. దీంతో పాటు అత‌డు ప‌లు ఆసక్తికరమైన ప్రాజెక్టులు చేస్తున్నాడు. NKR 21 ఇటీవ‌లే ప్రారంభమైంది. కళ్యాణ్ రామ్ కి ఇది 21వ సినిమా. ఆశ్చర్యకరంగా సీనియర్ నటి విజయశాంతి ఈ ప్రాజెక్ట్‌లో చేరారు. సినిమాలో ఓ ముఖ్య పాత్రను పోషించ‌నున్నారు. 'స‌రిలేరు నీకెవ్వరు' తర్వాత విజ‌య‌శాంతి వేరొక సినిమాకు సంత‌కం చేయ‌లేదు. క‌ళ్యాణ్ రామ్ బృందం వినిపించి కథ ఆమె పాత్ర న‌చ్చాయి గ‌నుకే ఇప్పుడు తిరిగి న‌టిస్తున్నారు.

తాజాగా విజ‌య‌శాంతి షేర్ చేసిన ఓ ఫోటో అంద‌రి దృష్టిని ఆక‌ర్షించింది. దాదాపు 30 సంవత్సరాల క్రితం సినిమా లాంచ్ సందర్భంగా సీనియర్ ఎన్టీఆర్‌తో విజయశాంతి ఓ వేదిక‌పై క‌నిపిస్తుండ‌గా, ఆ ఫోటోతో జోడించిన NKR21 ఈవెంట్ ఫోటో (కళ్యాణ్ రామ్‌తో కలిసి ఉన్న ఫోటో) చూడ‌గానే ఎంతో ఆక‌ర్షించాయి. లెజెండ్‌ ఎన్టీఆర్‌ నుంచి తనకు లభించిన గౌరవం అంత గొప్ప‌ది అని విజ‌య‌శాంతి పేర్కొన్నారు. ఆర్టిస్ట్‌గా తనకు ఎప్పుడూ స్ఫూర్తిని, ప్రోత్సాహాన్ని ఇచ్చే క్షణాలు ఇవేన‌ని పేర్కొన్నారు. ప్రదీప్ చిలుకూరి ఈ చిత్రానికి దర్శకత్వం వహిస్తున్నారు. హరికృష్ణ భండారి స్క్రీన్ ప్లే రాశారు. NKR 21 అశోక్ వర్ధన్ ముప్పా -సునీల్ బలుసు నిర్మించారు. ఎన్టీఆర్‌ ఆర్ట్స్‌, అశోక క్రియేషన్స్‌ బ్యానర్స్‌పై ఈ సినిమా తెరకెక్కుతోంది.

సీనియ‌ర్ హీరోలు చిరంజీవి, బాల‌కృష్ణ‌, నాగార్జున‌, వెంక‌టేష్ లాంటి స్టార్ల‌తో న‌టించిన విజ‌య‌శాంతి కెరీర్ లో ఎన్నో బ్లాక్ బ‌స్ట‌ర్ల‌లో న‌టించారు. లేడీ బాస్ గా విజ‌య‌శాంతి నాయికా ప్ర‌ధాన పాత్ర‌ల‌తోను మెప్పించారు. ఒకేయ్ రాముల‌మ్మ లాంటి జాతీయ అవార్డ్ చిత్రంలోను విజ‌య‌శాంతి న‌ట‌న‌కు పేరొచ్చింది. ఇప్పుడు క్యారెక్ట‌ర్ న‌టిగా త‌న స్థాయికి త‌గ్గ పాత్ర‌ల్లో న‌టిస్తున్నారు.