సీనియర్ స్టార్.. ఈసారి గట్టి ప్లానింగ్ తోనే..?

విక్టరీ వెంకటేష్ సైంధవ్ ఇచ్చిన షాక్ నుంచి బయటకు వచ్చి ఒకేసారి రెండు సినిమాలు చేసేందుకు సిద్ధం అయ్యాడు. వెంకటేష్ హీరోగా అనీల్ రావిపుడి డైరెక్షన్ లో ఒక సినిమా సెట్స్ మీద ఉంది. ఈ సినిమాను దిల్ రాజు నిర్మిస్తున్నారు. F2, F3 సినిమాలతో హిట్లు అందుకున్న ఈ కాంబో మరో సూపర్ హిట్ కోసం సిద్ధమవుతున్నారు. ఐతే ఎప్పుడు ఒక సినిమా పూర్తి చేసి కానీ మరో సినిమా గురించి ప్లాన్ చేసే వెంకటేష్ ఈసారి అలా కాకుండా ఒక సినిమా సెట్స్ మీద ఉండగానే మరో ప్రాజెక్ట్ ని రెడీ చేస్తున్నాడు.

ఈసారి వెరైటీగా ఒక యువ దర్శకుడితో అది కూడా డిఫరెంట్ అటెంప్ట్ చేయబోతున్నాడని తెలుస్తుంది. నీది నాది ఒకే కథ సినిమాతో డైరెక్టర్ గా తన మార్క్ చూపించిన వేణు ఊడుగుల తన సెకండ్ సినిమా విరాటపర్వం సినిమాతో విమర్శకుల ప్రశంసలు అందుకున్నాడు. తను చెప్పే కథల్లో చాలా డెప్త్ ఉన్నాయని ఆడియన్స్ గుర్తించడంతో వేణు చేసే ప్రతి సినిమా మీద ఆడియన్స్ ఒక కన్ను వేసి ఉంచారు.

ఇలాంటి యువ దర్శకుడితో వెంకటేష్ సినిమా రాబోతుందని తెలుస్తుంది. వెంకీ మామకు వేణు ఊడుగుల ఎలాంటి కథ చెప్పి ఒప్పించాడో కానీ ఈ సినిమా మాత్రం వెంకటేష్ కెరీర్ లో ప్రత్యేకమైన సినిమాగా ఉంటుందని అంటున్నారు. వెంకటేష్ తో అనీల్ రావిపుడి చేస్తున్న సినిమా కూడా ఎమోషనల్ ఎంటర్టైనర్ గా రాబోతుందని తెలుస్తుంది. నెక్స్ట్ వేణు ఊడుగులతో చేసే సినిమా కూడా అంతకుమించి అనేలా ఉంటుందని తెలుస్తుంది.

ఈ రెండు సినిమాలతో వెంకటేష్ భారీ ప్లానింగ్ లోనే ఉన్నట్టు అర్థమవుతుంది. సీనియర్ స్టార్స్ లో వెంకటేష్ ఒక్కడే కాస్త వెనకపడి ఉన్నాడు. అందుకే యువ దర్శకులతో అదరగొట్టే సినిమాలు చేయాలని చూస్తున్నాడు. వెంకటేష్ మార్క్ ఎమోషనల్ కథ పడితే మాత్రం అది సెన్సేషనల్ హిట్ పడటం పక్కా అని చెప్పొచ్చు. మరి రాబోతున్న రెండు సినిమాల్లో వెంకటేష్ ఎలాంటి ఫలితాలను అందుకుంటాడన్నది చూడాలి. ఇవే కాకుండా వెంకటేష్ రానా నాయుడు 2 లో కూడా నటించనున్నాడు. రానా నాయుడు సూపర్ హిట్ అవ్వడంతో ఆ సీరీస్ సీక్వెల్ పై కూడా భారీ అంచనాలు ఉన్నాయి. ఐతే ఈ సీరీస్ లో వెంకటేష్ తన ఇమేజ్ కి భిన్నంగా కొత్త లుక్ డిఫరెంట్ క్యారెక్టరైజేషన్ తో కనిపించారన్న సంగతి తెలిసిందే.