దిల్ రాజు 'టాక్సిక్' రిస్క్.. మామూలు టాక్ సరిపోదు!

యష్‌కు తెలుగు మార్కెట్ ‘కేజీఎఫ్’తోనే మొదలైంది. అప్పట్లో ఆ సినిమా తెలుగు హక్కుల విలువ దాదాపు రూ.5 కోట్లుగా ఉండగా, ఫుల్ రన్‌లో ఏపీ తెలంగాణ నుంచి సుమారు రూ.12.3 కోట్ల షేర్ వచ్చింది. వారాహి వాళ్ళు చిన్న రేటుకు తీసుకున్న సినిమా డబుల్‌కు పైగా రిటర్న్ ఇవ్వడంతో యష్‌కు ఇక్కడ మంచి బేస్ పడింది. ఆ తర్వాత ‘కేజీఎఫ్ 2’ వచ్చేసరికి ఆ లెక్క పూర్తిగా మారిపోయింది.

దిల్ రాజు తోనే ‘కేజీఎఫ్ 2’ తెలుగు రాష్ట్రాల్లో ఏకంగా రూ.80 కోట్లకు పైగా షేర్ తెచ్చింది. వేర్వేరు ట్రేడ్ లెక్కల్లో రూ.83 నుంచి రూ.86 కోట్ల మధ్య ఫైనల్ షేర్ కనిపిస్తోంది. ఒక్క నైజాంలోనే రూ.40 కోట్లకు పైగా వచ్చింది. అంటే మొదటి ‘కేజీఎఫ్’తో మొదలైన మార్కెట్ రెండో పార్ట్ దగ్గరకు వచ్చేసరికి మరో రేంజ్‌కు వెళ్లిపోయింది.

ఇప్పుడు ‘టాక్సిక్’ విషయంలో దిల్ రాజు తీసుకున్న నిర్ణయం అక్కడే పెద్దదిగా కనిపిస్తోంది. ఏపీ తెలంగాణ హక్కుల కోసం రూ.100 కోట్లకు పైగా పెట్టినట్లు ట్రేడ్‌లో బలమైన టాక్ ఉంది. కొన్ని రిపోర్ట్స్ రూ.120 కోట్ల వరకూ చెబుతున్నాయి. అయితే ఫైనల్ డీల్ నెంబర్‌పై వేర్వేరు లెక్కలు తిరుగుతున్నాయి. ఇక్కడ సమస్య ఒక్కటే. ‘కేజీఎఫ్ 2’కు మొదటి పార్ట్ ఇచ్చిన హైప్ ఉంది. రాకీ భాయ్ క్యారెక్టర్‌కు ఇప్పటికే భారీ క్రేజ్ ఉంది.

‘టాక్సిక్’ మాత్రం పూర్తిగా కొత్త కథ. గీతూ మోహన్‌దాస్ దర్శకత్వం, ‘ఏ’ సర్టిఫికెట్, బోల్డ్ కంటెంట్.. ఇవన్నీ కలిపి ఈ సినిమా మరో జోన్‌లో ఉంది. అంటే ఓపెనింగ్స్ గట్టిగా వచ్చినా, పెట్టిన రేటు రికవర్ కావాలంటే రెండో రోజు నుంచి కూడా టాక్ అలాగే పని చేయాలి. ‘కేజీఎఫ్ 2’ తెలుగు రాష్ట్రాల్లో రూ.80 కోట్లకు పైగా షేర్ తెచ్చింది. ఇప్పుడు ‘టాక్సిక్’ హక్కుల విలువ నిజంగానే రూ.100 కోట్లకు పైగా ఉంటే, యష్ గత సినిమాను దాటడం మాత్రమే సరిపోదు. కనీసం రూ.100 కోట్ల షేర్ రేంజ్‌కి వెళ్లే రన్ కావాలి. అంటే గ్రాస్ లెక్క ఇంకా చాలా పెద్దది కావాలి.

అందుకే దిల్ రాజు ఈసారి యష్ మీద పెట్టింది చిన్న బెట్ కాదు. ‘కేజీఎఫ్’ సమయంలో రూ.5 కోట్ల మార్కెట్ నుంచి మొదలైన నెంబర్ ఇప్పుడు రూ.100 కోట్లకు పైగా రైట్స్ వరకు వచ్చింది. ‘టాక్సిక్’కు మామూలు పాజిటివ్ టాక్ వచ్చి మంచి ఓపెనింగ్‌తో ఆగిపోతే సరిపోదు. తెలుగు రాష్ట్రాల్లో లాంగ్ రన్ పడాలి. అప్పుడే దిల్ రాజు పెట్టిన ఈ పెద్ద లెక్క నిజంగా వర్కవుట్ అవుతుంది.