రష్మిక, తిరువీర్.. ఇది వర్కవుట్ అయ్యేనా?
ఈ శుక్రవారం (నవంబర్ 7) బాక్సాఫీస్ వద్ద రెండు ఆసక్తికరమైన సినిమాలు రిలీజ్ అవుతున్నాయి.;
ఈ శుక్రవారం (నవంబర్ 7) బాక్సాఫీస్ వద్ద రెండు ఆసక్తికరమైన సినిమాలు రిలీజ్ అవుతున్నాయి. ఒకటి, నేషనల్ క్రష్ రష్మిక మందన్న లీడ్ రోల్ చేసిన 'ది గర్ల్ఫ్రెండ్'; రెండోది, 'మసూద' ఫేమ్ తిరువీర్ నటించిన 'ది గ్రేట్ ప్రీ వెడ్డింగ్ షో'. ఈ వారాంతం బాక్సాఫీస్ వద్ద మరీ పెద్ద పోటీ ఏమీ లేకపోయినా, అసలు సవాల్ ఆడియెన్స్ను థియేటర్ల వరకు రప్పించడమే.
ఇందుకోసం, ఈ రెండు సినిమాల నిర్మాతలు ఒక పాత పద్ధతికి, కానీ చాలా రిస్క్తో కూడుకున్న స్ట్రాటజీకి శ్రీకారం చుట్టారు. అదే ప్రీ రిలీజ్ ప్రెస్ షో. ఒకప్పుడు ఈ ట్రెండ్ బాగా నడిచేది. కానీ, సోషల్ మీడియా వచ్చాక, టాక్ తేడా కొడితే సినిమా మొదటి షోకే దెబ్బతింటుందని ఈ పద్ధతిని దాదాపు ఆపేశారు. అయితే, 'ది గర్ల్ఫ్రెండ్', 'ది గ్రేట్ ప్రీ-వెడ్డింగ్ షో' మేకర్స్ మాత్రం చాలా కాన్ఫిడెంట్గా రిలీజ్కు రెండు రోజుల ముందే, అంటే బుధవారం సాయంత్రమే, ఈ రెండు సినిమాలకు సంబంధించి కేవలం కొంతమంది మీడియా మిత్రులకు ఒక్కో షో వేశారు.
ఇది ప్రీమియర్ షో కాదు, కేవలం టాక్ జనరేట్ చేయడం కోసం వేసిన లిమిటెడ్ ప్రెస్ షో. ఈ స్ట్రాటజీ వేయడానికి కారణం, రెండు సినిమాల అడ్వాన్స్ బుకింగ్స్లో జోరు పెరగడం కోసమే. అందుకే, కంటెంట్పై ఉన్న నమ్మకంతో, ఈ స్పెషల్ షోల ద్వారా పాజిటివ్ టాక్ను బయటకు పంపి, మొదటి రోజు ఆక్యుపెన్సీ పెంచుకోవాలని ప్లాన్ చేశారు.
మేకర్స్ ఆశించినట్లే, ఈ రెండు సినిమాలకూ స్పెషల్ షోల నుంచి పాజిటివ్ టాక్ వచ్చింది. 'ది గర్ల్ఫ్రెండ్' విషయంలో, రష్మిక నటనతో అదరగొట్టిందని, డైరెక్టర్ రాహుల్ రవీంద్రన్ టేకింగ్, కథ యూత్కు బాగా కనెక్ట్ అవుతుందని టాక్ వస్తోంది. మరోవైపు, 'ది గ్రేట్ ప్రీ వెడ్డింగ్ షో' సినిమా నవ్వించే క్లీన్ కామెడీ ఎంటర్టైనర్ అని, తిరువీర్ అండ్ టీమ్ బాగా నవ్వించిందని టాక్ వచ్చింది.
ఈ నిర్మాతల నమ్మకం, వాళ్ల స్ట్రాటజీ తొలి అడుగులో ఫలించినట్లే కనిపిస్తోంది. ఈ పాజిటివ్ టాక్ నిజంగానే ఆడియెన్స్ను థియేటర్ల వరకు లాగుతుందా? రేపు మార్నింగ్ షో తర్వాత కూడా ఇదే రెస్పాన్స్ కంటిన్యూ అవుతుందా? అనేది చూడాలి. ఏదేమైనా, కంటెంట్ను నమ్మి చేసిన ఈ ప్రయోగం, ఈ వీకెండ్కు మంచి ఫలితాన్నే ఇచ్చే అవకాశం ఉంది. మరి ఏం జరుగుతుందో చూడాలి.