సుధీర్ బాబు హరోంహర.. సుబ్రహ్మణ్యుడి ఆగమనం!

నైట్రో స్టార్ సుధీర్ బాబు జయాపజయాలతో సంబంధం లేకుండా సినిమాలు చేసుకుంటూ వెళ్తున్నారు. గతేడాది హంట్, మామా మశ్చీంద్ర చిత్రాలతో ప్రేక్షకుల ముందుకు వచ్చారు. కానీ ఆ రెండు మూవీలు డిజాస్టర్లు అయ్యాయి. ఈసారి కచ్చితంగా హిట్ కొట్టాలనే కసితో హరోం హర అనే మాస్ మూవీతో వచ్చేందుకు సిద్ధమవుతున్నారు. ఈ సినిమాకు జ్ఞానసాగర్‌ ద్వారక దర్శకత్వం వ‌హిస్తుండ‌గా.. సుమంత్‌ నాయుడు నిర్మిస్తున్నారు.

ఇప్ప‌టికే ఈ సినిమా నుంచి పోస్ట‌ర్లతో పాటు టీజ‌ర్‌ ను విడుద‌ల చేయ‌గా ప్రేక్ష‌కుల‌ను ఆక‌ట్టుకున్నాయి. తాజాగా చిత్ర‌ యూనిట్ మ్యూజిక‌ల్ అప్డేట్ ఇచ్చింది. హరోం హర అంటూ సాగే లిరికల్ సాంగ్ ను బుధవారం సాయంత్రం రిలీజ్ చేసింది. శంభు కుమారుడు సుబ్రహ్మణ్యుడి ఆగమనం - సంగ్రామం - సంభవం అంటూ ట్వీట్ చేసింది. కల్యాణ్ చక్రవర్తి త్రిపురనేని లిరిక్స్ అందించిన ఈ పాటను స్టార్ సింగర్ అనురాగ్ కులకర్ణి ఆలపించినట్లు చిత్ర యూనిట్ తెలిపింది.

సాంగ్ స్టార్టింగ్ లో హీరో సుధీర్ బాబు బస్సు టాప్ పై కూర్చుని ఎక్కడికో వెళ్తున్నట్లు చూపించారు మేకర్స్. భుజానికి బ్యాగ్ వేసుకున్న హీరో.. మల్టీపుల్ షేడ్స్ లో కనిపిస్తున్నారు. చివర్లో సిగరెట్ తో ఫుల్ మాస్ లుక్ లో అదరగొట్టారు సుధీర్ బాబు. భారీ ఫైట్ గ్లింప్స్ ను కూడా సాంగ్ లో యాడ్ చేశారు. వన్ లైన్ లో చెప్పాలంటే.. ఓ క్లాస్ గా ఉండే వ్యక్తి మాస్ గా మారిపోయి గొడ్డలి పట్టుకొని ఊచకోత కోయడాన్ని ఈ సాంగ్ లో చూపించారు మేకర్స్.

మొత్తానికి ఈ సాంగ్ చాలా ఇంట్రెస్టింగ్ గా అనిపిస్తోంది. సినిమా స్టోరీపై ఆసక్తి పెంచుతోంది. ప్రస్తుతం సోషల్ మీడియాలో ట్రెండ్ అవుతోంది. సాంగ్ లో అక్కడక్కడ పెద్ద పెద్ద సుబ్రహ్మణ్య స్వామి విగ్రహాలు కనిపిస్తుండటం గమనార్హం. కల్యాణ్ చక్రవర్తి లిరిక్స్ పవర్ ఫుల్ గా ఉండగా, చేతన్‌ భరద్వాజ్ సంగీతం ఆకట్టుకుంటోంది. మరోవైపు, కెరీర్ లో తొలిసారి పాన్ ఇండియా మూవీ చేస్తున్నారు సుధీర్ బాబు.

ఈ సినిమాలో సుధీర్ సరసన మాళవిక శర్మ హీరోయిన్ గా నటిస్తోంది. సునీల్ పవర్ ఫుల్ విలన్ పాత్రలో కనిపించనున్నారు. పాన్ ఇండియా మూవీగా తెరకెక్కుతున్న ఈ సినిమా షూటింగ్ చివరి దశకు చేరుకుంది. 1989లో చిత్తూరు జిల్లా కుప్పంలో జరిగిన యదార్థ సంఘటనల ఆధారంగా తెరకెక్కిస్తున్నారు. ఈ ఏడాదే హరోం హర మూవీని ప్రేక్షకుల ముందుకు తీసుకొచ్చేందుకు ప్రయత్నిస్తున్నారు మేకర్స్. మరి ఈ సినిమాతో సుధీర్ బాబు కమ్ బ్యాక్ ఇస్తారో లేదో చూడాలి.