సంక్రాంతికి.. దర్శకుల లెక్క కూడా గట్టిగానే!

2027 సంక్రాంతి బరిలో ఇప్పటికే పెద్ద సినిమాలు వరుసగా డేట్లు ఫిక్స్ చేసుకున్నాయి. వెంకటేష్ కళ్యాణ్ రామ్‌తో అనిల్ రావిపూడి చేస్తున్న ‘జనవరి 12 విడుదల’ జనవరి 12న వస్తోంది. చిరంజీవి బాబీ కొల్లి ‘కాకా’ జనవరి 13న రిలీజ్ అవుతోంది. శర్వానంద్ శ్రీను వైట్ల ‘జార్జ్ క్రిష్’ జనవరి 14ను పట్టుకుంది. హీరోల ఫ్యాన్ బేస్ ఎలాగూ ఉంటుంది. కానీ ఈసారి వాళ్లకు సరిపడా సినిమా ఎవరు ఇస్తారన్న దగ్గర దర్శకుల మీద కూడా ఫోకస్ పడుతోంది.

అనిల్ రావిపూడికి సంక్రాంతి టైమ్ బాగా కలిసొచ్చింది. ఎఫ్ 2, ‘సరిలేరు నీకెవ్వరు’, ‘సంక్రాంతికి వస్తున్నాం’, ‘మన శంకర వరప్రసాద్ గారు’.. ఇలా పండగ సమయంలో వచ్చిన సినిమాల్లో మంచి ట్రాక్ ఉంది. ఫ్యామిలీ కామెడీ, స్టార్ హీరో ఇమేజ్, పండగ ఆడియన్స్‌కు కావాల్సిన లైట్ మూడ్‌ను కలపడం ఆయనకు తెలిసిన పని. ఇప్పుడు వెంకటేష్‌తో మళ్లీ వస్తుండటం, కళ్యాణ్ రామ్‌ను కూడా కలపడం వల్ల కాంబినేషన్ కూడా కొత్తగా ఉంది.

బాబీ కొల్లి వైపు చూసినా సంక్రాంతి రికార్డు తక్కువేం కాదు. చిరంజీవితో ‘వాల్తేరు వీరయ్య’ పెద్ద కమర్షియల్ హిట్ అయింది. తర్వాత బాలకృష్ణతో ‘డాకు మహారాజ్’ కూడా సంక్రాంతికే మంచి రిజల్ట్ ఇచ్చింది. బాబీ సినిమాల్లో స్టార్ హీరో ఇమేజ్‌ను ముందు పెట్టి, దానికి మాస్ సీన్స్ జోడించడం ఎక్కువగా కనిపిస్తుంది. ఇప్పుడు ‘కాకా’లో చిరంజీవితో రెండోసారి పని చేస్తున్నాడు కాబట్టి ‘వాల్తేరు వీరయ్య’ను కాపీ చేయకుండా ఇంకేం కొత్తగా ఇస్తాడన్నదే అసలు పని.

అనిల్‌కు ఫ్యామిలీ ఆడియన్స్ మీద పట్టు ఉంది. బాబీకి స్టార్ హీరో మాస్‌ను హ్యాండిల్ చేసిన ట్రాక్ ఉంది. ఇద్దరూ తమకు తెలిసిన జోన్‌లలోనే వస్తున్నారు కానీ ఈసారి రిపీట్ ఫీలింగ్ రాకుండా ఉండటం చాలా ముఖ్యం. ఎందుకంటే వెంకటేష్, చిరంజీవి ఇద్దరికీ ఫ్యాన్స్ నుంచి ముందే ఓపెనింగ్స్ వస్తాయి. ఆ తర్వాత సినిమా నిలబడేది మాత్రం కథ, కామెడీ, ఎమోషన్, మాస్ సీన్స్ ఎంత సరిగ్గా కుదిరాయన్నదిపైనే.

ఇక శ్రీను వైట్ల కూడా ఈ సంక్రాంతి రేసులో ఉన్నారు. శర్వానంద్‌తో ‘జార్జ్ క్రిష్’ను జనవరి 14న తీసుకొస్తున్నారు. శ్రీను వైట్లకు ఒకప్పుడు కామెడీ ఎంటర్‌టైనర్స్‌లో ప్రత్యేకమైన మార్క్ ఉండేది. ‘నమో వెంకటేశ’ తర్వాత మళ్లీ సంక్రాంతి సీజన్‌లోకి వస్తున్నారు. కానీ ప్రస్తుతం అనిల్ బాబీ సినిమాల మీద ఉన్న స్టార్ స్కేల్, బజ్‌తో పోలిస్తే ‘జార్జ్ క్రిష్’ కాస్త చిన్న రేంజ్‌లోనే కనిపిస్తోంది. అదే సమయంలో శర్వానంద్‌కు సంక్రాంతి సీజన్‌లో మంచి ట్రాక్ ఉండటం ఈ సినిమాకు ప్లస్ కావచ్చు. అందుకే ఈసారి సంక్రాంతి పోటీలో హీరోల పేర్లతో పాటు దర్శకుల గత రికార్డులు కూడా లెక్కలోకి వస్తున్నాయి. చివరకు పండగ నాలుగు రోజుల్లో ఎవరి సినిమా ఎక్కువ ఫ్యామిలీ ఆడియన్స్ ను థియేటర్‌కు తీసుకెళ్తుందో అదే పెద్ద టర్నింగ్ పాయింట్.