ట్రెండీ టాక్ : విలనిజానికి కొత్త అర్థం చెప్పిన‌ న‌టుడు

బాలీవుడ్ లో దిగ్గ‌జ న‌టుడిగా వెలిగిపోతున్న అత‌డు సౌత్ లో అడుగుపెట్టి సుదీర్ఘ ఇన్నింగ్స్ ని కొన‌సాగిస్తున్నాడు. అటు త‌మిళం, ఇటు తెలుగులోను న‌టించిన అత‌డు క‌న్న‌డ‌, మ‌ల‌యాళంలోను న‌టిస్తున్నాడు. ముఖ్యంగా సౌత్ లో విల‌నీ ఇర‌గ‌దీస్తున్నాడు. ఇటీవ‌లే దురంధ‌ర్ చిత్రంలో పాకిస్తానీ అయిన ఎస్పీ చౌద‌రి అస్లామ్ పాత్ర‌లో అద‌ర‌గొట్టేసాడు.

ఒక ర‌కంగా సంజయ్ దత్ తన సెకండ్ ఇన్నింగ్స్‌లో పవర్‌ఫుల్ విలన్ పాత్రలతో ఇండియన్ సినిమాను ఊపేస్తున్నారు. ఒకప్పుడు చాక్లెట్ బాయ్‌గా.. ఆ తర్వాత యాక్షన్ హీరోగా మెప్పించిన అత‌డు ఇప్పుడు క్రూరత్వానికి కేరాఫ్ అడ్రస్ అన్నట్లుగా విలన్ పాత్రలకు ప్రాణం పోస్తున్నారు. `ఖల్ నాయక్` వంటి చిత్రాలతో గతంలోనే నెగటివ్ షేడ్స్ చూపించినా పూర్తిస్థాయి విలన్‌గా ఆయన ప్రస్థానం `అగ్నిపథ్` చిత్రంతో సరికొత్త మలుపు తిరిగింది. హృతిక్ రోషన్‌ను ముప్పుతిప్పలు పెట్టే `కాంచా చీనా` పాత్రలో గుండు.. చెవికి రింగుతో ఆయన కనిపించిన తీరు ప్రేక్షకులను వణికించింది.

దక్షిణాది చిత్రాల్లో సంజయ్ దత్ ప్రవేశం అత‌డి కెరీర్ ని గ్లోబల్ స్థాయికి తీసుకెళ్లింది. ముఖ్యంగా `కేజీఎఫ్ చాప్టర్ 2`లో రాకింగ్ స్టార్ యష్‌తో తలపడే అధీరా పాత్రలో ద‌త్ నటన హైలైట్‌గా నిలిచింది. వైకింగ్స్ తరహా లుక్‌తో క్రూరమైన యోధుడిగా సంజయ్ దత్ చూపించిన విలనిజం దేశవ్యాప్తంగా ప్రశంసలు అందుకుంది. ఇదే ఊపుతో దళపతి విజయ్ నటించిన `లియో`లో ఆంటోనీ దాస్ అనే పవర్‌ఫుల్ గ్యాంగ్‌స్టర్‌గా మెప్పించారు. సొంత కొడుకునే బలి ఇవ్వాలనుకునే కఠినమైన తండ్రి పాత్రలో అత‌డు ఒదిగిపోయిన తీరు అద్భుతం.

తెలుగు సినిమా విషయానికి వస్తే.. రామ్ పోతినేని `డబుల్ ఇస్మార్ట్`లో బిగ్ బుల్ అనే అంతర్జాతీయ మాఫియా డాన్ పాత్రలో సంజయ్ దత్ కనిపించారు. తన మెమరీని హీరోకి ట్రాన్స్‌ఫర్ చేయాలనుకునే విలక్షణమైన ప్రతినాయకుడిగా అత‌డి నటన సినిమాకు ప్రత్యేక ఆకర్షణగా నిలిచింది. అలాగే `దురంధర్` ఫ్రాంచైజీలో ఎస్పీ చౌదరి అస్లాం పాత్రలో వ్యవస్థలోని లోపాలను వాడుకుంటూ.. తనదైన శైలిలో పవర్ పాలిటిక్స్ నడిపే గంభీరమైన పాత్రను పోషించారు. షారుఖ్ ఖాన్ `జవాన్`లో స్పెషల్ అప్పీరెన్స్ ఇచ్చినా కానీ.. క్లైమాక్స్‌లో వచ్చే `మ్యాడ్ పోలీస్` పాత్ర సినిమాకు మంచి బూస్ట్ ఇచ్చింది. అయితే ప్ర‌భాస్ రాజా సాబ్ ఫెయిల‌వ్వ‌డంతో ఈ సినిమాలో అత‌డి పాత్ర‌కు అంత‌గా గుర్తింపు లేకుండా పోయింది.

అయితే సంజయ్ దత్ విలన్ పాత్రల వెనుక అత‌డి శారీరక మార్పులు ప్రధాన పాత్ర పోషిస్తాయి. పాత్రకు తగ్గట్లుగా మేకప్, బాడీ లాంగ్వేజ్‌ను మార్చుకోవడంలో అత‌డు సిద్ధహస్తుడు. కేవలం అరిచే విలన్ లాగా కాకుండా.. కళ్ళతోనే భయాన్ని పుట్టించే గంభీరమైన డార్క్ క్యారెక్టర్స్ ఎంచుకుంటూ తనకంటూ ఒక ప్రత్యేకమైన మార్కెట్‌ను సృష్టించుకున్నారు. దీనివల్లనే ప్రస్తుతం దక్షిణాదిలో ఏ పెద్ద హీరో సినిమా వచ్చినా విలన్ పాత్రకు సంజయ్ దత్ మొదటి ఛాయిస్‌గా మారారు.

మొత్తానికి సంజయ్ దత్ తన సెకండ్ ఇన్నింగ్స్‌ను అద్భుతంగా కొనసాగిస్తున్నారు. తెలుగు, తమిళం, కన్నడ భాషల్లోని అగ్ర హీరోలతో తలపడుతూ తన విలనిజంతో బాక్సాఫీస్ వద్ద సెన్సేషన్ సృష్టిస్తున్నారు. అత‌డి భీక‌ర‌మైన‌ ఫిజిక్ - గంభీరమైన గొంతు హీరో పాత్రల కంటే కూడా ఇలాంటి పవర్‌ఫుల్ విలన్ పాత్రలకే సరిగ్గా సరిపోతున్నాయనిపిస్తుంది. భవిష్యత్తులో అత‌డు మరిన్ని వైవిధ్యమైన ప్రతినాయక పాత్రలతో ప్రేక్షకులను అలరించడం ఖాయంగా కనిపిస్తోంది.