వరుస ప్లాప్స్‌ పడ్డా స్టార్‌ హీరో అదే మూస దోరణి..!

బాలీవుడ్‌ స్టార్‌ హీరో సల్మాన్‌ ఖాన్‌ సూపర్‌ హిట్‌ దక్కించుకుని చాలా కాలం అయింది. గత దశాబ్ద కాలంగా ఈయన నటించిన సినిమాలు చాలానే వచ్చాయి. అందులో హిట్‌ ఎన్ని అంటే ఠక్కున చెప్పలేని పరిస్థితి. బాలీవుడ్‌లో యంగ్‌ హీరోలు వరుస విజయాలను సొంతం చేసుకుంటూ దూసుకు పోతూ ఉంటే సల్మాన్‌ ఖాన్‌ మాత్రం ఎప్పటికప్పుడు నిరాశ పరుస్తూ వస్తున్నాడు. తాజాగా సికిందర్ సినిమాతో సల్మాన్ ఖాన్‌ ప్రేక్షకుల ముందుకు వచ్చాడు. ఆ సినిమా బాక్సాఫీస్‌ వద్ద డిజాస్టర్‌గా నిలిచింది. దశాబ్దం క్రితం రావాల్సిన సినిమా అంటూ చాలా మంది పెదవి విరుస్తున్నారు. బాక్సాఫీస్‌ వద్ద సికిందర్‌ మిగిల్చిన నష్టంను లెక్కలు వేయడానికి చాలా సమయం పట్టింది.

సికిందర్‌ ఫలితంతో సంబంధం లేకుండా సల్మాన్‌ ఖాన్‌ మరో సినిమాకు ఓకే చెప్పాడు. తెలంగాణకు చెందిన దివంగత కల్నల్‌ సంతోష్‌ బాబు పాత్రలో సల్మాన్‌ ఖాన్‌ నటించబోతున్నాడు. జులై నెలలో షూటింగ్‌ ప్రారంభం కాబోతున్న ఈ సినిమాను 2026 ఈద్‌ కి ప్రేక్షకుల ముందుకు తీసుకు వచ్చే విధంగా ప్లాన్‌ చేస్తున్నారు. 2020లో గల్వాన్‌ వ్యాలీలో చైనా దళాలతో జరిగిన ఘర్షణలో సంతోష్‌ బాబు మృతి చెందిన విషయం తెల్సిందే. ఆయన జీవిత చరిత్ర ఆధారంగా సినిమాను రూపొందించేందుకు గాను స్క్రిప్ట్‌ వర్క్‌ చేస్తున్నారు. ఇప్పటికే అందుకు సంబంధించిన అనుమతులు అన్నీ తీసుకున్నారు. త్వరలోనే సెట్స్ పైకి వెళ్లడం ఆలస్యం.

ఆ బయోపిక్‌ ఇంకా షూటింగ్‌ ప్రారంభం కాకముందే సల్మాన్‌ ఖాన్‌ మరో సినిమాకు ఓకే చెప్పాడు. బాలీవుడ్ వర్గాల ద్వారా అందుతున్న సమాచారం ప్రకారం మలయాళ దర్శకుడు మహేష్‌ నారాయణన్‌ దర్శకత్వంలో సల్మాన్‌ సినిమా ఉండబోతుంది. ఇటీవల వీరిద్దరి మధ్య ప్రాథమిక చర్చలు జరిగాయి. కథ విషయమై వీరిద్దరు చర్చించారు. స్టోరీ లైన్‌కి సల్మాన్‌ ఓకే చెప్పాడు. కథ, కాన్సెప్ట్‌ నచ్చడంతో తన టీంను మహేష్‌ నారాయణన్‌తో కలిసి స్క్రిప్ట్‌ వర్క్ మొదలు పెట్టమని సూచించాడని తెలుస్తోంది. త్వరలోనే ఈ సినిమాకు సంబంధించిన స్క్రిప్ట్‌ వర్క్‌ పూర్తి కావడం ఖాయం. వచ్చే నెలలోనే సినిమా గురించి మరింత స్పష్టత వచ్చే అవకాశాలు ఉన్నాయి.

ఇప్పటికే కన్ఫర్మ్‌ చేసిన సంతోష్ బాబు బయోపిక్‌, ప్రస్తుతం చర్చల దశలో ఉన్న మహేష్‌ నారాయణన్‌ సినిమా విషయంలో అభిమానులు పెదవి విరుస్తున్నారు. వరుసగా ఫ్లాప్స్ పడుతున్నా కూడా సల్మాన్‌ ఖాన్‌ అదే జోనర్‌ ను ఫాలో అవుతున్నాడు, మూస దోరణిలో సినిమాలు చేస్తున్నాడు తప్ప కొత్తగా ఏమైనా ప్రయత్నిద్దాం అనే ఉద్దేశం కనిపించడం లేదు అంటూ అభిమానులు సైతం అసహనం వ్యక్తం చేస్తున్నారు. మరోసారి సికిందర్‌ తరహా ఫలితాలు తప్పవేమో అని అప్పుడే అభిమానులు పెదవి విరుస్తున్నారు. ఈ విషయమై సల్మాన్‌ ఖాన్‌ మాత్రం చాలా నమ్మకంగా ఉన్నాడు. ఈ రెండు సినిమాలు తనకు సక్సెస్ తెచ్చి పెడుతాయని నమ్ముతున్నాడు. మరి ఆయన నమ్మకం నిలిచేనా అనేది చూడాలి.