రెండేళ్ల తర్వాత రకుల్ ప్రీత్ సింగ్...!

కెరటం సినిమా తో తెలుగు సినిమా పరిశ్రమలో 2011లో అడుగు పెట్టిన ముద్దుగుమ్మ రకుల్‌ ప్రీత్‌ సింగ్. తక్కువ సమయంలోనే టాలీవుడ్ లో స్టార్‌ హీరోలతో, సూపర్‌ స్టార్‌ హీరోలతో నటించే అవకాశంను దక్కించుకుంది. హీరోయిన్ గా ఒకానొక సమయంలో మహేష్ బాబు సినిమాకి కూడా డేట్లు ఇవ్వలేనంత బిజీగా మారింది.

అలాంటి పరిస్థితి నుంచి కొన్నేళ్లలోనే చేతిలో ఒక్క సినిమా లేని పరిస్థితికి దిగజారింది. ఆమె చేసిన సినిమాలు భారీ విజయాలను సొంతం చేసుకున్నా కూడా అన్నీ రొటీన్ పాత్రలు.. రొటీన్ కమర్షియల్‌ సినిమాలే అవ్వడంతో రకుల్ ప్రీత్‌ సింగ్ కి తెలుగు సినిమా ఇండస్ట్రీలో క్రేజ్ తగ్గింది. రెండేళ్లుగా తెలుగు లో ఈమెకు సినిమా ఆఫర్లే లేవు.

తెలుగు లో కాకుండా కోలీవుడ్‌ లో కూడా అదే పరిస్థితి. ఈఅమ్మడు ఆ సమయంలోనే బాలీవుడ్‌ కి వెళ్లి అక్కడ చేసిన ప్రయత్నాలు ప్రయోజనం చేకూర్చాయి. అక్కడ వరుసగా సినిమాల్లో నటించే అవకాశాలు దక్కాయి. కానీ చేసిన ప్రతి ఒక్క సినిమా కూడా హిందీ బాక్సాఫీస్ వద్ద బొక్క బోర్లా పడింది. రెండేళ్లు హిందీలో చాలా బిజీగా ఉన్న ఈ అమ్మడు ఈ మధ్య సైలెంట్ అయింది.

హిందీలో కూడా ఆఫర్లు లేకపోవడంతో ప్రైవేట్ కార్యక్రమాలకు హాజరు అవుతూ, సోషల్‌ మీడియాలో హాట్ ఫోటో షూట్స్ ను షేర్‌ చేస్తున్న రకుల్‌ ప్రీత్‌ సింగ్ కి ఎట్టకేలకు ఓ తమిళ్‌ చిత్రంలో నటించే అవకాశం దక్కినట్లుగా సమాచారం అందుతోంది. శివ కార్తికేయన్ హీరోగా రూపొందుతున్న సినిమాలో ఈ అమ్మడు ఎంపిక అయిందట.

తమిళ్ లో రూపొందబోతున్న ఆ సినిమాను తెలుగు మరియు ఇతర సౌత్ ఇండియన్‌ భాషల్లో కూడా విడుదల చేయబోతున్నారు. శివ కార్తికేయన్ తో చేయబోతున్న సినిమా హిట్ అయితే రకుల్ కి మళ్లీ తెలుగు లో కూడా ఛాన్స్ లు దక్కే అవకాశాలు పుష్కలంగా ఉన్నాయంటూ ఇండస్ట్రీ వర్గాల వారు మాట్లాడుకుంటున్నారు. మరి రకుల్‌ మళ్లీ బిజీ అయ్యేనా చూడాలి.