అంటే ఫ్యాన్స్ ఇప్పుడు కస్టమర్లా..

సినిమా హీరోయిన్లకు ఫాలోయింగ్ కొత్త విషయం కాదు. ఒకప్పుడు సినిమా రిలీజ్ సమయంలోనే ఫ్యాన్స్‌తో ఆ బాండింగ్ ఎక్కువగా ఉండేది. ఇప్పుడు ఇన్‌స్టాగ్రామ్ వల్ల రోజూ టచ్‌లో ఉండే పరిస్థితి వచ్చింది. అదే సోషల్ మీడియా ఇప్పుడు ఇంకో దశకు వెళ్లింది. ఫాలో అవ్వడం ఒకటి.. ప్రత్యేక కంటెంట్ కోసం నెలకు డబ్బులు కట్టడం మరోటి. కొందరు నటీమణులు పెయిడ్ సబ్‌స్క్రిప్షన్స్ పెట్టడంతో ఫ్యాన్, సెలబ్రిటీ మధ్య లెక్క కూడా కాస్త మారుతోందనే మాట వినిపిస్తోంది.

ఈ టాపిక్ మీద చాలామంది హీరోయిన్లు పెద్దగా మాట్లాడలేదు. కానీ రాశి సింగ్ మాత్రం తన అభిప్రాయం చెప్పింది. ఇన్‌స్టాగ్రామ్ సబ్‌స్క్రిప్షన్స్‌లో తనకు తప్పేమీ కనిపించడం లేదని తెలిపింది. ఎవరి అకౌంట్ వాళ్లది, ఏం పెట్టాలనేది వాళ్ల ఇష్టమని చెప్పింది. నచ్చకపోతే సబ్‌స్క్రైబ్ అవ్వకుండా ఉండొచ్చని కూడా సింపుల్‌గా సమాధానం ఇచ్చింది. ఆమె మాటలు వైరల్ కావడంతో ఈ టాక్ మళ్లీ మొదలైంది.

అయితే సోషల్ మీడియాలో మరో వాదన కూడా ఉంది. ఇంతకాలం ఫ్యాన్స్ ఉచితంగా చూసిన ఫొటోలు, వీడియోల మధ్య ఇప్పుడు ప్రత్యేకంగా డబ్బులు కట్టే కంటెంట్ రావడం వల్ల ఫాలోవర్ కంటే కస్టమర్ అనే భావన ఎక్కువవుతోందని కొందరు అంటున్నారు. నెలకు ఒకసారి డబ్బులు చెల్లిస్తే ఏం కొత్తగా వస్తుంది, అది నిజంగా ఆ ధరకు సరిపోతుందా అన్న ప్రశ్నలు కూడా అక్కడే మొదలవుతున్నాయి.

మరోవైపు సెలబ్రిటీలకు ఇది తప్పు కాదనే వాళ్లు కూడా ఉన్నారు. ఫొటోషూట్స్, వెనుక జరిగే విషయాలు, ప్రత్యేక వీడియోలు లేదా అభిమానులతో నేరుగా మాట్లాడే అవకాశం కోసం డబ్బులు కట్టేవాళ్లు ఉంటే అందులో సమస్య ఏంటని వాళ్లు ప్రశ్నిస్తున్నారు. యూట్యూబ్, ఓటీటీ, మెంబర్‌షిప్స్ అన్నీ సబ్‌స్క్రిప్షన్ మీదే నడుస్తున్నప్పుడు ఇన్‌స్టాగ్రామ్‌లో మాత్రమే దీనిని వేరుగా చూడాల్సిన అవసరం లేదనే మాట కూడా వినిపిస్తోంది.

ఇక్కడ ఇంకో విషయం కూడా ఉంది. ఫాలోవర్లు లక్షల్లో ఉన్నారని పెయిడ్ సబ్‌స్క్రైబర్స్ కూడా అదే రేంజ్‌లో వస్తారని చెప్పలేం. ఒక హీరోయిన్‌కు సోషల్ మీడియాలో మంచి క్రేజ్ ఉండొచ్చు. కానీ నెలనెలా డబ్బులు కట్టేంత ఆసక్తి ఎంతమందిలో ఉందన్నది వేరే లెక్క. అందుకే ఈ ఫీచర్ సెలబ్రిటీలకు ఫాలోయింగ్ ఎంత బలంగా ఉందో మరో విధంగా చూపించే అవకాశం ఉందని కొందరు చెబుతున్నారు.

రాశి మాత్రం ఈ మొత్తం చర్చను ఒక చిన్న లైన్ దగ్గరే ఆపేసింది. నచ్చితే తీసుకోండి.. లేదంటే వదిలేయండి అన్నది ఆమె మాట. కానీ సోషల్ మీడియాలో మాత్రం ఫ్యాన్ ఇప్పుడు కేవలం ఫాలోవరేనా, లేక డబ్బులు కట్టే కస్టమర్‌గా కూడా మారుతున్నాడా అనే టాక్ మాత్రం కొనసాగుతోంది. ఎవరి లెక్క వాళ్లది.. చివరకు సబ్‌స్క్రైబ్ చేయాలా వద్దా అన్న నిర్ణయం మాత్రం అభిమానిదే.