పుష్ప 2: జపాన్ లో రెస్పాన్స్ ఎలా ఉంది?

ఐకాన్ స్టార్ అల్లు అర్జున్ గ్లోబల్ రేంజ్ క్రేజ్ గురించి ఇప్పుడు సోషల్ మీడియాలో పెద్ద ఎత్తున చర్చ జరుగుతోంది. పుష్ప 2 సినిమాతో ఇండియాలో రికార్డులు తిరగరాసిన బన్నీ, ఇప్పుడు జపాన్ మార్కెట్‌పై కన్నేశారు. జపాన్ లో పుష్ప కున్రిన్ పేరుతో ఈ సినిమాను గ్రాండ్‌గా రిలీజ్ చేశారు. అయితే, అక్కడ మొదటి రోజు వచ్చిన ఓపెనింగ్స్ రిపోర్ట్స్ చూస్తుంటే, ఇతర ఇండియన్ సినిమాలతో పోలిస్తే కొంచెం స్లోగానే స్టార్ట్ అయినట్లు అనిపిస్తోంది.

సాధారణంగా జపాన్ ఆడియన్స్ ఒక సినిమాను ఓన్ చేసుకోవడానికి కొంచెం టైమ్ తీసుకుంటారు. మన దగ్గర ఉన్నట్లుగా అక్కడ మొదటి రోజే రికార్డులు బద్దలు కొట్టడం అనేది చాలా తక్కువ. రాజమౌళి తెరకెక్కించిన ఆర్ఆర్ఆర్ సినిమా కూడా అక్కడ చాలా స్లోగా మొదలై, ఆ తర్వాత నెమ్మదిగా పికప్ అయ్యి ఇండస్ట్రీ హిట్ గా నిలిచింది. ఇప్పుడు పుష్ప 2 కూడా అదే రూట్‌లో వెళ్తుందేమో అని సినీ విశ్లేషకులు భావిస్తున్నారు.

అయితే, డే 1 ఫుట్ ఫాల్స్ లెక్కలు చూస్తే అల్లు అర్జున్ ఫ్యాన్స్‌కు కొంచెం నిరాశ కలిగించే విషయాలే కనిపిస్తున్నాయి. అక్కడి రిపోర్ట్స్ ప్రకారం, పుష్ప 2 మొదటి రోజు కేవలం 886 ఫుట్ ఫాల్స్ మాత్రమే నమోదయ్యాయి. గతంలో విడుదలైన ఇతర ఇండియన్ సినిమాల కంటే తక్కువ కావడం గమనార్హం. బన్నీ స్వయంగా వెళ్లి ప్రమోషన్స్ చేసినా, జపాన్ ఆడియన్స్ నుండి ఆశించిన స్థాయిలో రెస్పాన్స్ రాలేదా అనే ప్రశ్నలు మొదలయ్యాయి.

ఒకసారి పాత రికార్డులను గమనిస్తే, రంగస్థలం 1,610 ఫుట్ ఫాల్స్ తో ముందుండగా, దేవర 1,550 ఫుట్ ఫాల్స్ సాధించింది. వీటితో పాటు టైగర్ 3 (1.30K), బ్రహ్మాస్త్ర (1.01K) వంటి సినిమాలు కూడా పుష్ప 2 కంటే మెరుగైన ఓపెనింగ్స్ రాబట్టాయి. భారీ స్థాయిలో 250 థియేటర్లలో రిలీజ్ చేసినప్పటికీ, మొదటి రోజు కేవలం 886 మంది ప్రేక్షకులు మాత్రమే రావడం ఇప్పుడు ట్రేడ్ వర్గాల్లో చర్చకు దారితీస్తోంది.

నిజానికి జపాన్ బాక్సాఫీస్ ట్రెండ్ ఎప్పుడూ ఇలాగే అన్ ప్రెడిక్టబుల్ గా ఉంటుంది. అక్కడ సినిమాకు వచ్చే మౌత్ టాక్, వీకెండ్ పర్ఫార్మెన్స్ చాలా ముఖ్యం. బన్నీ టీమ్ జపాన్ లో చేసిన అగ్రెసివ్ ప్రమోషన్స్ వల్ల సినిమాపై అక్కడి జనాల్లో ఒక అవగాహన అయితే వచ్చింది. మరి రాబోయే రోజుల్లో అక్కడి ఫ్యామిలీ ఆడియన్స్, యూత్ ఈ సినిమాకు కనెక్ట్ అయితే, నంబర్స్ పెరిగే ఛాన్స్ ఖచ్చితంగా ఉంది.

ప్రస్తుతానికి పుష్ప 2 కి వచ్చిన ఈ స్లో స్టార్ట్ ను ఫెయిల్యూర్ గా చూడలేము. ఎందుకంటే జపాన్ లో ఒక కమర్షియల్ తెలుగు సినిమా ఇంత పెద్ద ఎత్తున రిలీజ్ అవ్వడమే ఒక సాహసం. రాబోయే వారం రోజుల్లో ఈ సినిమా అక్కడ ఎలాంటి కలెక్షన్స్ రాబడుతుందో చూడాలి. బన్నీ తగ్గుతాడా లేక మెల్లగా బాక్సాఫీస్ పై పట్టు సాధిస్తాడా అనేది ఈ వీకెండ్ రిపోర్ట్స్‌తో తేలిపోతుంది.