పురుషః హీరోయిన్ సెలక్షన్ పై సప్తగిరి కీలక కామెంట్.. అందం చూసి కాదా?..

భార్యాభర్తల మధ్య జరిగే సరదా యుద్ధాలు, అవుట్ అండ్ అవుట్ కామెడీ బ్యాక్‌డ్రాప్‌తో వస్తున్న తాజా చిత్రం ‘పురుషః'. పవన్ కళ్యాణ్ బత్తుల హీరోగా పరిచయమవుతున్న ఈ సినిమా మే 22న గ్రాండ్‌గా రిలీజ్ కాబోతోంది. ఈ సినిమా ప్రమోషన్స్ లో భాగంగా రీసెంట్‌గా ఇచ్చిన ఇంటర్వ్యూలో నటుడు సప్తగిరి.. హీరోయిన్ విషిక సెలక్షన్ గురించి ఒక ఆసక్తికరమైన విషయాన్ని పంచుకున్నారు. ఈ సినిమాలో ఆమెను కేవలం అందం చూసి కాకుండా, ఒక క్రేజీ ఆడిషన్ ద్వారా సెలెక్ట్ చేశారంటూ సప్తగిరి చేసిన కామెంట్స్ ఇప్పుడు వైరల్ అవుతున్నాయి.

బాక్సాఫీస్ పై కన్నేసిన 'పురుషః':

కళ్యాణ్ ప్రొడక్షన్స్ బ్యానర్ మీద బత్తుల సరస్వతి సమర్పణలో బత్తుల కోటేశ్వరరావు నిర్మించిన క్లీన్ ఫ్యామిలీ ఎంటర్‌టైనర్ సినిమా ఇది. ఇక వీరు వులవల దర్శకత్వంలో తెరకెక్కిన ఈ చిత్రంలో సప్తగిరి, కసిరెడ్డి, వెన్నెల కిషోర్ లాంటి టాప్ కమెడియన్లు ఉన్నారు. ఇక దీంతో థియేటర్లలో నవ్వుల పండగే అని ఆడియన్స్ ఫిక్స్ అయ్యారు. అయితే సినిమాలో హీరోయిన్‌గా నటించిన విషిక ఎంపిక వెనుక ఒక తమాషా కథ ఉంది.

ఆఫీస్ గోడపై చాక్ పీస్ లైన్:

సప్తగిరి ముచ్చట్ల ప్రకారం.. హీరోయిన్ విషిక ఆడిషన్స్ కోసం ఆఫీస్‌కు వచ్చినప్పుడు డైరెక్టర్ ఒక డిఫరెంట్ ప్లాన్ వేశారు. ఆయన ఒక చాక్ పీస్ తీసుకుని ఆఫీస్ గోడ పైన ఒక లైన్ గీశారు. ఇక ఆ లైన్ చూపిస్తూ విషికను "అక్కడి వరకు కాలు ఎత్తు" అని అడిగారు. దాంతో ఆ పిల్లకు అస్సలు ఏమీ అర్థం కాలేదు. "నువ్వు అక్కడ కాలు ఎత్తితేనే ఈ సినిమాలో సెలెక్ట్" అని డైరెక్టర్ కండిషన్ పెట్టారట.

కాలు ఎత్తితేనే ఛాన్స్:

నిజానికి విషిక పాత పర్ఫార్మెన్స్ చూసే డైరెక్టర్‌కు ఆమెపై నమ్మకం కుదిరింది. కానీ సినిమాలో ఒక పవర్‌ఫుల్ యాక్షన్ సీన్ ఉంది. అందుకోసం ఆమె మార్షల్ ఆర్ట్స్ నేర్చుకుంది.ఇక సెట్స్‌లో కసిరెడ్డిని ఎగిరి ఎగిరి తన్నాల్సి ఉంటుంది. అందుకే డైరెక్టర్ అంత ఎత్తున గోడపై లైన్ గీసి కాలు ఎత్తమన్నారు. ఇక మొదట కన్ఫ్యూజ్ అయినా.. విషిక కష్టపడి హాఫ్ వరకు కాలు ఎత్తి "ఇంతే సార్ నా వల్ల కాదు" అని చెప్పేసిందట.

మిగతా హాఫ్ నేను చూసుకుంటా:

విషిక అంతవరకు ట్రై చేయడం చూసి డైరెక్టర్ సాటిస్‌ఫై అయ్యారు. "పర్లేదు.. మిగతా హాఫ్ నేను గ్రాఫిక్స్ లోనో, కెమెరా ట్రిక్స్ లోనో సెటిల్ చేసుకుంటా.. నువ్వు ఈ సినిమాకు సెలెక్ట్ అయిపోయావ్" అని డైరెక్టర్ చెప్పారట. ఇక కేవలం గ్లామర్ మాత్రమే కాకుండా, కథ డిమాండ్ చేసిన యాక్షన్ ఎలిమెంట్స్ చేయగలదా లేదా అని చూసి ఆమెను తీసుకున్నారని సప్తగిరి సరదాగా వివరించారు.

సాధారణంగా హీరోయిన్లను లుక్ టెస్ట్, యాక్టింగ్ చూసి సెలెక్ట్ చేస్తారు. కానీ ఇలా గోడపై లైన్ గీసి, కాలు ఎత్తించి మరీ ఆడిషన్ చేయడం నిజంగా వెరైటీనే. ఇక సప్తగిరి చెప్పిన ఈ ఇన్సైడ్ ముచ్చట విన్నాక, సినిమాలో విషిక కసిరెడ్డిని ఎలా తన్నిందో, ఎలాంటి కామెడీ పండించిందో చూడాలంటే మే 22 వరకు ఆగాల్సిందే.