మెలోడి బ్ర‌హ్మ చేరిక‌తో డ‌బుల్ ఇస్మార్ట్

టాలీవుడ్ దర్శకుడు పూరి జగన్నాధ్ 'లైగ‌ర్' త‌ర్వాత కొంత గ్యాప్ తీస్కున్న సంగ‌తి తెలిసిందే. అత‌డు ఇప్పుడు డ‌బుల్ ఇస్మార్ట్ అనే సినిమా తీస్తున్నాడు. ఇది రామ్ న‌టించిన ఇస్మార్ట్ శంక‌ర్ కి సీక్వెల్. ఇప్పుడు ఈ సినిమాకి సంబంధించిన కీల‌క అప్ డేట్ అందింది.

తాజా స‌మాచారం మేర‌కు మెలోడీ బ్రహ్మ మణి శర్మ మ‌రోసారి పూరితో క‌లిసి ప‌ని చేయ‌నున్నార‌ని తెలిసింది. ఈ కలయిక బ్లాక్ బస్టర్ క‌ల‌యిక‌. పోకిరి, చిరుత, ఇస్మార్ట్ శంకర్ లాంటి చార్ట్ బ‌స్ట‌ర్ ఆల్బమ్ లు ఈ జోడీ నుంచే వ‌చ్చాయి. ఆ సినిమాల‌న్నీ బ్లాక్ బ‌స్ట‌ర్లుగా నిలిచాయి. ఈ కాంబో డబుల్ స్మార్ట్‌తో తిరిగి వస్తోంది.

ఇస్మార్ట్ శంకర్ చిత్రానికి మ‌ణిశ‌ర్మ స్వ‌రాలు స‌మ‌కూర్చిన సంగ‌తి తెలిసిందే. ఆ చిత్రం మ్యూజికల్ హిట్ అయిన సంగ‌తి తెలిసిందే. ఇప్పుడు సీక్వెల్ ఖచ్చితంగా చార్ట్‌బస్టర్ ఆల్బమ్ తో రంజింప‌జేస్తుంద‌ని అంచ‌నా. ప్రస్తుతం ఈ సినిమా షూటింగ్ ముంబైలో జరుగుతోంది. డబుల్ ఇస్మార్ట్ చిత్రంలో రామ్ పోతినేని, సంజయ్ దత్ ప్రధాన పాత్రలు పోషిస్తున్నారు. కేజీఎఫ్ 2 త‌ర్వాత బాలీవుడ్ ఖ‌ల్ నాయ‌క్ సంజయ్ దత్ ఈ చిత్రంలో ముఖ్యమైన సుదీర్ఘ నిడివి ఉన్న‌ పాత్రను పోషిస్తున్నారు. ఇండ‌స్ట్రీ ప్రముఖ నటీనటులు ముఖ్యపాత్రల్లో నటిస్తున్నారు. ఇది కూడా ఇత‌ర సినిమాల్లోలానే గుడ్ వ‌ర్సెస్ బ్యాడ్ కి సంబంధించిన క‌థ‌. అందువ‌ల్ల‌ రామ్ - సంజయ్ దత్ మధ్య ముఖాముఖి పోరాటాల‌తో సినిమా ర‌క్తి క‌ట్టిస్తుంద‌ని కూడా గుస‌గుస‌లు వినిపిస్తున్నాయి.

రామ్, పూరీల డెడ్లీ కాంబినేషన్‌లో డబుల్ ఇస్మార్ట్ చిత్రాన్ని పూరీ కనెక్ట్స్ బ్యానర్‌పై పూరి జగన్నాధ్ - ఛార్మి కౌర్ నిర్మిస్తున్నారు. పూరి జగన్నాధ్ ఒక క్రేజీ కథను రామ్ కోసం రాసార‌ని కూడా తెలుస్తోంది. పూరి త‌న‌దైన శైలిలో పూర్తిగా స్టైలిష్ అవతారాలలో స్టార్ల‌ను ప్రెజెంట్ చేస్తున్నార‌ని స‌మాచారం. ఈ సినిమాలో రామ్ పోతినేని స్టైలిష్ గా బెస్ట్ లుక్ లో క‌నిపిస్తాడు. సాంకేతికంగా అత్యున్నత ప్రమాణాలతో అధిక బడ్జెట్‌తో డబుల్‌ ఇస్మార్ట్‌ రూపొందుతోంది. ఈ చిత్రానికి సంబంధించిన ఇతర నటీనటులు, సాంకేతిక నిపుణుల వివరాలను త్వరలో వెల్లడించ‌నున్నారు. డబుల్ ఇస్మార్ట్ 8 మార్చి 2024న మహా శివరాత్రికి తెలుగు, తమిళం, కన్నడ, మలయాళం, హిందీ భాషల్లో విడుదల చేయాల‌నేది ప్లాన్.