బాలీవుడ్ మోజు తగ్గుతోందే..

ఒకప్పుడు పోస్టర్ మీద పాన్ ఇండియా ట్యాగ్ లేకపోతే ఆ కిక్కే ఉండేది కాదు. ఏ చిన్న సినిమా తీసినా ఐదు భాషల్లో రిలీజ్ అంటూ హడావిడి చేసేవాళ్లు. కానీ ఇప్పుడు టాలీవుడ్ మేకర్స్ దగ్గర మరో ఆలోచన కనిపిస్తోంది. ప్రతి సినిమానూ బాలీవుడ్ మార్కెట్ వెనుక పరుగెత్తించాల్సిన అవసరం ఉందా, లేక సౌత్ రాష్ట్రాలు ప్లస్ ఓవర్సీస్ మీద గట్టిగా ఫోకస్ చేస్తే సరిపోతుందా అనే డిస్కషన్ పెరుగుతోంది.

రీసెంట్ సినిమాల బాక్సాఫీస్ నంబర్లు చూసినా ఈ మార్పుకు కారణం కనిపిస్తోంది. నాని నటించిన ది ప్యారడైజ్ తీసుకుంటే రెండు రోజుల్లో హిందీ వెర్షన్ నెట్ 3 కోట్లకు పైగా వచ్చినట్లు అంచనాలు ఉన్నాయి. అదే కర్ణాటకలో మొదటి రోజే దాదాపు 4 కోట్ల గ్రాస్ వచ్చింది. ప్రతి మీడియం రేంజ్ సినిమాకు నార్త్ ప్రమోషన్స్ మీద భారీగా ఖర్చు పెట్టడం ఎంతవరకు వర్కౌట్ అవుతుందనే ప్రశ్న అక్కడే వస్తోంది.

హిందీలో సినిమా రిలీజ్ చేయాలంటే డబ్బింగ్‌తో పని పూర్తికాదు. ముంబై పీఆర్, నేషనల్ ప్రమోషన్స్, మీడియా టూర్లు, డిజిటల్ క్యాంపెయిన్స్ అన్నీ కలిస్తే ఖర్చు పెరుగుతుంది. బాహుబలి, కల్కి, పుష్ప లాంటి ఈవెంట్ ఫిల్మ్స్ కు మార్కెట్ బాగా పనిచేసింది. కానీ కమర్షియల్ సినిమాకు అదే స్థాయిలో నార్త్ నుంచి ఓపెనింగ్స్ వస్తాయని గ్యారంటీ లేదు. అందుకే ఖర్చు పెట్టే ముందు అక్కడి రికవరీ ఎంత అన్నది మేకర్స్ చూసుకుంటున్నారు.

ఈ రూట్ లో సితార బ్యానర్ చేస్తున్న సినిమాలు ఇంట్రెస్టింగ్ గా కనిపిస్తున్నాయి. ధనుష్, కార్తీ, శింబు లాంటి తమిళ హీరోలతో ప్రాజెక్టులు సెట్ చేసుకోవడం వల్ల తెలుగు, తమిళ మార్కెట్లు మొదటి నుంచే అందుబాటులో ఉంటాయి. కంటెంట్ సెట్ అయితే కర్ణాటక, కేరళ నుంచి కూడా బిజినెస్ రావచ్చు. ఇది బాలీవుడ్‌ను పూర్తిగా పక్కన పెట్టడం కాదు. ప్రతి సినిమాకు ఐదు భాషల హడావిడి అవసరం లేదనే ఆలోచన మాత్రమే.

సౌత్ స్టేట్స్ తో పాటు ఓవర్సీస్ మార్కెట్ ఇప్పుడు టాలీవుడ్ కు పెద్ద బలం. ప్యారడైజ్ రెండు రోజుల్లో అక్కడ సుమారు 26 కోట్ల గ్రాస్ చేసినట్లు ట్రేడ్ అంచనాలు చెబుతున్నాయి. హిందీ కంటే కొన్ని సినిమాలకు ఓవర్సీస్, కర్ణాటక నుంచే రెస్పాన్స్ రావడం నిర్మాతలకు మరో మంచి ఆప్షన్. అందుకే కథ ఏ మార్కెట్‌కు కనెక్ట్ అవుతుందో అక్కడే ముందుగా బలం పెంచుకోవాలనే ఆలోచన పెరుగుతోంది.

రానున్న రోజుల్లో పాన్ ఇండియా అనే పదం పూర్తిగా మాయం అవుతుందని చెప్పలేం. పెద్ద స్టార్ సినిమాలు, భారీ కథలు హిందీ మార్కెట్‌ను వదిలే పరిస్థితి లేదు. కానీ మీడియం రేంజ్ సినిమాలకు పాన్ సౌత్ ప్లస్ ఓవర్సీస్ అనే రూట్ మరింతగా కనిపించే ఛాన్స్ ఉంది. హిందీలో థియేట్రికల్ రిలీజ్ అవసరమైతే చేయడం, లేకపోతే డబ్బింగ్ రైట్స్‌ను డిజిటల్ లేదా శాటిలైట్ వైపు తీసుకెళ్లడం నిర్మాతలకు సేఫ్ ఆప్షన్‌గా మారొచ్చు.