రవితేజ కోసం సందీప్ కిషన్ డ్రాప్.. కానీ ఆ ఇద్దరు మాత్రం నో

ఈ ఏడాది సంక్రాంతికి టాలీవుడ్ బాక్సాఫీస్ వద్ద తమ సినిమాలను రిలీజ్ చేసేందుకు తెలుగు చిత్ర నిర్మాతలు గట్టిగా పోటీ పడిన సంగతి తెలిసిందే. మొత్తం ఐదు సినిమాలు రిలీజ్ కు రెడీ అయిపోయాయి. దీంతో అన్ని చిత్రాలకు థియేటర్లు కేటాయించడం కష్టమవుతుండడంతో టాలీవుడ్ ఫిల్మ్ ఛాంబర్.. ఒక రెండు సినిమాలను వాయిదా వేసుకోవాలని కోరిన విషయం తెలిసిందే. ఆ సమయంలో ఈగల్ మేకర్స్ తమ సినిమా రిలీజ్ ను వాయిదా వేశారు.

కానీ తమ మూవీకి మాత్రం సోలో రిలీజ్ డేట్ కావాలని అప్పుడే ఈగల్ మేకర్స్ కోరారు. అయితే ఫిబ్రవరి 9వ తేదీన ఏ సినిమా రావడం లేదని భావించి ఆ డేట్ ఈగల్ సినిమాకు ఇచ్చింది ఫిల్మ్ ఛాంబర్. కానీ అప్పటికే సందీప్ కిషన్ నటిస్తున్న ఊరు పేరు భైరవకోన, రజనీకాంత్ లాల్ సలామ్ సినిమాలను అదే డేట్ కు రిలీజ్ చేస్తున్నట్లు అనౌన్స్ చేశారు ఆయా మేకర్స్. ఒకరోజు ముందు అంటే ఫిబ్రవరి 8వ తేదీన యాత్ర 2 రిలీజ్ చేయబోతున్నట్టు కూడా ప్రకటించారు. వీటిని పరిశీలించకుండా ఫిల్మ్ ఛాంబర్.. ఈగల్ మేకర్స్ కు ఫిబ్రవరి 9 కేటాయించింది.

అయితే తమకు ఇచ్చిన మాట నిలబెట్టుకోవాలని ఇటీవల ఫిల్మ్ ఛాంబర్ కు ఈగల్ మేకర్స్ లేఖ రాశారు. సోలో డేట్ దక్కేలా చూడాలని కోరారు. దీంతో రంగంలోకి దిగిన ఫిల్మ్ ఛాంబర్.. ఇచ్చిన మాట నిలబెట్టుకోవడానికి భైరవ కోన, లాల్ సలామ్, యాత్ర 2ను వాయిదా వేసుకోవాలని మేకర్స్ ను కోరింది. అయితే ఊరి పేరు భైరవకోన సినిమా యూనిట్.. ఫిల్మ్ ఛాంబర్ నిర్ణయాన్ని గౌరవించి తమ మూవీ రిలీజ్ ను వాయిదా వేసుకుంది.

ఫిబ్రవరి 16న సందీప్ కిషన్ సినిమాను రిలీజ్ చేయబోతున్నట్లు ఫిల్మ్ ఛాంబర్ కు తెలిపింది. కానీ యాత్ర 2 మేకర్స్ మాత్రం తమ సినిమాను వాయిదా వేసుకోవడం కుదరదని తేల్చి చెప్పారట. రజనీకాంత్ లాల్ సలాం ను వాయిదా వేసుకోవాల్సిందిగా కోరగా.. తమ సినిమాకు తమిళ్ రిలీజ్ కూడా ఉంది కాబట్టి వాయిదా వేసుకోలేమని వారు చెప్పేశారట.

అయితే ఈ విషయాన్ని ఈగల్ నిర్మాతలకు చెప్పగా.. ఇక తమకేం ఇబ్బంది లేదని, అదే డేట్ కు చిత్రాన్ని రిలీజ్ చేసేస్తామని పీపుల్స్ మీడియా వాళ్లు తెలిపారట. ఈ విషయాన్ని నిర్మాత దిల్ రాజు తాజాగా ప్రెస్ మీట్ లో చెప్పారు. ఈగల్ సినిమాకు ఎక్కువ స్క్రీన్స్ వచ్చేలా ప్రయత్నిస్తామని వెల్లడించారు. మొత్తానికి ఈగల్ కు సోలో రిలీజ్ డేట్ దక్కకపోయినట్లే.