ఓదెలా 2.. పవర్ఫుల్ సీక్వెల్ లో మిల్కీ బ్యూటీ

గ్లామరస్ బ్యూటీగా తనకంటూ ఒక ప్రత్యేకమైన గుర్తింపును అందుకున్న తమన్నా భాటియా ప్రస్తుతం డిఫరెంట్ ప్రాజెక్టులను లైన్లోకి తీసుకువచ్చే ప్రయత్నం చేస్తోంది. తన ప్రతి సినిమాలో కూడా ఒక వైపు కమర్షియల్ సినిమాలు చేస్తూనే మరొకవైపు లేడీ ఓరియంటెడ్ ప్రాజెక్టులు కూడా చేయడానికి గ్రీన్ సిగ్నల్ ఇస్తోంది. ఇక ప్రస్తుతం ఈ బ్యూటీ మరొక డిఫరెంట్ కాన్సెప్ట్ సినిమాలో ప్రధాన పాత్రలో కనిపించబోతోంది.

ఆ సినిమాకు ప్రముఖ మాస్ దర్శకుడు సంపత్ నంది క్రియేటర్ గా ఉండగా అశోక్ తేజ దర్శకత్వం వహించబోతున్నారు. సినిమాకు సంబంధించిన అధికారిక ప్రకటన ఒక పోస్టర్ ద్వారా తెలియజేశారు. ఓదెల 2 అనే టైటిల్ తో ఈ ప్రాజెక్టు తెరపైకి రాబోతోంది. 2022లో ఓటీటీలో విడుదలైన ఓదెల రైల్వే స్టేషన్ మంచి రెస్పాన్స్ అందుకున్న విషయం తెలిసిందే.

ఈ క్రైమ్ త్రిల్లర్ కథను సంపత్ నంది అందించారు. డైరెక్టర్ అశోక్ తేజ మేకింగ్ విధానం సినిమాలో బాగా హైలైట్ అయింది. ఇక అదే టీం తో ఇప్పుడు ఓదెల 2 అనే టైటిల్ తో మరొక ప్రాజెక్టును వెండితెరపై తీసుకురాబోతున్నారు. ఈసారి అంతకుమించిన కథనంతో భారీ క్యాస్టింగ్, బెస్ట్ ప్రొడక్షన్, హై టెక్నికల్ వాల్యూస్ తో సినిమాను రూపొందిస్తున్నట్లుగా తెలుస్తోంది.

ఇక ఈ కథ యూనివర్సల్ గా అందరికి కనెక్ట్ అయ్యేలా ఉంటుందట. కేవలం తెలుగులోనే కాకుండా మిగతా భాషల్లో కూడా విడుదల చేయాలని అనుకుంటున్నారు. మధు క్రియేషన్స్ లో D మధు ఈ ప్రాజెక్టు ను నిర్మిస్తున్నారు. ఇక సినిమాను ఈరోజు అధికారికంగా లాంచ్ చేస్తూ రెగ్యులర్ షూటింగ్ ను త్వరలోనే స్టార్ట్ చేసే విధంగా ప్లాన్ అయితే సిద్ధం చేసుకున్నారు.

సినిమా కథ విషయానికి వస్తే ఓదెల మల్లన్న స్వామి ఒక గ్రామాన్ని దుష్ట శక్తుల నుంచి ఇలా రక్షిస్తాడు అనే పాయింట్ తో రాబోతున్నట్లు సమాచారం. ఇక టైటిల్ పోస్టర్ లో త్రిశూలంలో శివుడి బొట్టు హైలెట్ అయ్యే విధంగా ఉంది. ఈ సినిమాకు కాంతార ఫేమ్ అజనీష్ లోకనాథ్ సంగీతం అందిస్తున్నాడు. తప్పకుండా సినిమా అంచనాలకు తగ్గట్టుగా ఉంటుంది అని తెలుస్తోంది. ఓదెలా 2 సినిమాలో హెబ్బా పటేల్, వశిష్ట, యువ, నాగమహేష్, వంశీ, గగన్ విహారి, సురేందర్ రెడ్డి, భూపాల్, పూజా రెడ్డి లాంటి వారు నటిస్తున్నారు.