17 నెలల గ్యాప్.. నానికి ఇదే ఫస్ట్ టైమ్!

ప్యారడైజ్ ప్రెస్ మీట్‌లో నాని చెప్పిన ఒక మాట కాస్త కొత్తగా అనిపించింది. తన కెరీర్‌లో ఒక సినిమాకు మరో సినిమాకు ఇంత గ్యాప్ ఎప్పుడూ రాలేదని చెప్పాడు. చివరిసారి హీరోగా హిట్ 3తో 2025 మే 1న థియేటర్లలో కనిపించాడు. ఇప్పుడు ప్యారడైజ్ సెప్టెంబర్ 24న వస్తోంది. దాదాపు 17 నెలల తర్వాత నాని సినిమా రిలీజ్ అవుతోంది. 18 ఏళ్ల కెరీర్‌లో ఇంత లాంగ్ గ్యాప్ రావడం ఇదే మొదటిసారి అని ఆయనే ప్రెస్‌మీట్‌లో చెప్పారు.

నాని కెరీర్ చూస్తే నిజంగానే ఇలాంటి గ్యాప్ అరుదు. 2016లో కృష్ణగాడి వీర ప్రేమగాథ, జెంటిల్‌మన్, మజ్ను వచ్చాయి. 2017లో నిన్ను కోరి, నేను లోకల్, ఎంసీఏతో మరో మూడు రిలీజ్‌లు చూశాడు. 2018లో కృష్ణార్జున యుద్ధం, దేవదాస్ వచ్చాయి. 2019లో జెర్సీ తర్వాత గ్యాంగ్ లీడర్ కూడా అదే ఏడాది రిలీజైంది. 2021లో టక్ జగదీష్ తర్వాత శ్యామ్ సింగరాయ్ వచ్చింది. 2023లో దసరా తర్వాత అదే ఏడాది హాయ్ నాన్న వచ్చింది. 2024లో సరిపోదా శనివారం రిలీజ్ అయింది. 2025లో హిట్ 3 వచ్చింది. ఒక సినిమా పూర్తయ్యేలోపు తర్వాతి సినిమా సెట్స్ మీద ఉండటం నానికి అలవాటే.

ప్యారడైజ్ దగ్గర మాత్రం ఆ స్పీడ్ ఆగిపోయింది. సినిమా మొదట మార్చి 26కు అనుకున్నారు. తర్వాత ఆగస్టు 21కి మార్చారు. అక్కడి నుంచి సెప్టెంబర్ 24కు వచ్చింది. ఈ గ్యాప్‌లో నాని మరో సోలో రిలీజ్ చేయలేదు. ప్యారడైజ్ కోసం లుక్, యాక్షన్, డ్యాన్స్, డబ్బింగ్ అన్నింటికీ ఎక్కువ టైమ్ వెళ్లిందని ఆయన మాటల్లోనే బయటపడింది.

సినిమా ఆలస్యం గురించి అడిగితే శ్రీకాంత్ ఓదెల మొండితనం కూడా కారణమేనని నాని నవ్వుతూ ఒప్పుకున్నాడు. అయితే తనకు కావాల్సిన విజువల్ వచ్చే వరకు శ్రీకాంత్ కాంప్రమైజ్ కాడని చెప్పాడు. ఫైనల్ కట్ రెండు గంటల 49 నిమిషాలుగా లాక్ అయింది. భారీ యాక్షన్ ఎపిసోడ్స్, వీఎఫ్ఎక్స్ పనులు కూడా రిలీజ్ దగ్గర వరకు కొనసాగుతున్నాయి.

ఈ గ్యాప్ ప్రభావం నాని మీద కూడా కనిపించిందట. ప్రెస్ మీట్‌కు వస్తుంటే తన ఫస్ట్ సినిమా టైమ్‌లో ఉన్నంత నెర్వస్‌గా అనిపించిందని చెప్పాడు. మీడియాతో ఇలా మాట్లాడి చాలా రోజులు అయిందని, మైక్‌లో మాట్లాడే అలవాటు కూడా తగ్గిపోయిందని సరదాగా అన్నాడు. రెగ్యులర్‌గా ప్రమోషన్స్‌లో కనిపించే నాని నుంచి ఇలాంటి మాట రావడం అరుదే.

ఇప్పుడు టీమ్‌కు సెప్టెంబర్ 24 డెడ్‌లైన్ ముందుంది. ట్రైలర్ కోసం నాలుగు రోజులు విడిగా పెట్టకుండా ఆ సమయాన్ని కూడా సినిమా పనులకే వాడాలని నిర్ణయించారు. ప్రీమియర్స్ ఉంటాయని నిర్మాత సుధాకర్ చెరుకూరి చెప్పారు. టికెట్ హైక్స్‌పై మాత్రం ఇంకా నిర్ణయం తీసుకోలేదు. నాని కెరీర్‌లో ఇంత పెద్ద రిలీజ్ గ్యాప్ తర్వాత వస్తున్న సినిమా కావడంతో మొదటి రోజు బుకింగ్స్ ఎలా ఉంటాయన్నది కూడా ఈసారి గమనించాల్సిందే.