టీవీ అవకాశాలు వదిలేయడంతోనే ఆర్థికంగా వెనకబాటు?!
ప్రస్తుతం సౌత్ నుంచి నార్త్ వరకు మోస్ట్ వాంటెడ్ హీరోయిన్గా వెలిగిపోతున్న మృణాల్ ఠాకూర్ తన కెరీర్ ఆరంభంలో ఎదుర్కొన్న పరిస్థితుల గురించి ఆసక్తికర వ్యాఖ్యలు చేశారు.;
ప్రస్తుతం సౌత్ నుంచి నార్త్ వరకు మోస్ట్ వాంటెడ్ హీరోయిన్గా వెలిగిపోతున్న మృణాల్ ఠాకూర్ తన కెరీర్ ఆరంభంలో ఎదుర్కొన్న పరిస్థితుల గురించి ఆసక్తికర వ్యాఖ్యలు చేశారు. టెలివిజన్ రంగంలో ఉండగానే తనకు భారీ పారితోషికాలు ఆఫర్ చేశారని.. ఒకవేళ కేవలం డబ్బుకే ప్రాధాన్యత ఇచ్చి ఉంటే తాను ఈ పాటికే మిలియనీర్ అయి ఉండేదాన్నని పేర్కొన్నారు. అయితే పెద్ద మొత్తంలో డబ్బు తనను ఊరించినా కేవలం సంపాదన కోసమే పని చేస్తే తనలోని సృజనాత్మకత, వ్యక్తిత్వం దెబ్బతింటుందని భావించి ఆ అవకాశాలను వదులుకున్నట్లు మృణాల్ స్పష్టం చేశారు.
మృణాల్ ఠాకూర్ తన నటనా ప్రయాణాన్ని కాలేజీ రోజుల్లోనే టెలివిజన్ రంగంలో ప్రారంభించారు. 2012లో `ముజ్సే కుచ్ కెహతీ...యే ఖామోషియాన్` సీరియల్తో మెప్పించిన ఈ భామ ఆ తర్వాత `కుంకుమ్ భాగ్య` సీరియల్తో ఇంటింటికీ చేరువయ్యారు. బుల్బుల్ పాత్రలో తన నటనకు ఐటీఏఅవార్డు కూడా లభించింది. టెలివిజన్ రంగంలో తిరుగులేని గుర్తింపు -ఆదాయం వస్తున్న సమయంలోనే వెండితెరపై తన ముద్ర వేయాలనే బలమైన కోరికతో టీవీ రంగానికి స్వస్తి పలికారు.
టీవీ ఇండస్ట్రీని వదిలిపెట్టడం అనేది ఒక సాహసోపేతమైన నిర్ణయమే అయినా కానీ.. మృణాల్ కలలు వెండితెరపై ఫలించాయని చెప్పవచ్చు. మరాఠీ చిత్రాల ద్వారా సినిమా రంగంలోకి అడుగుపెట్టిన ఈ బ్యూటీ 2018లో వచ్చిన `లవ్ సోనియా`తో బాలీవుడ్ దృష్టిని ఆకర్షించారు. ఆ తర్వాత హృతిక్ రోషన్ సరసన `సూపర్ 30` , జాన్ అబ్రహంతో `బాట్లా హౌస్` వంటి చిత్రాల్లో నటించి వరుస విజయాలను అందుకున్నారు. కేవలం డబ్బు వెనుక పరుగెత్తకుండా తనలోని నటిని సంతృప్తి పరిచే పాత్రల కోసం వేచి చూడటం వల్లే ఈ స్థాయిని చేరుకోగలిగారు.
ముఖ్యంగా తెలుగు చలనచిత్ర పరిశ్రమలో మృణాల్ ఠాకూర్ క్రేజ్ అమాంతం పెరిగిపోయింది. `సీతా రామం` చిత్రంలో సీతామహాలక్ష్మిగా ఆమె పండించిన భావోద్వేగాలు తెలుగు ప్రేక్షకులను మంత్రముగ్ధులను చేశాయి. ఈ చిత్రానికి ఫిలింఫేర్ ఉత్తమ నటి అవార్డును అందుకోవడమే కాకుండా ఆ తర్వాత `హాయ్ నాన్న`, `ఫ్యామిలీ స్టార్` వంటి చిత్రాలతో టాలీవుడ్ గోల్డెన్ లెగ్గా మారిపోయారు. పెద్ద తెరపై మృణాల్ పోషిస్తున్న వైవిధ్యమైన పాత్రలు తను తీసుకున్న నిర్ణయం సరైనదేనని నిరూపించాయి.
మృణాల్ ఠాకూర్ ప్రయాణం నేటి తరం నటీనటులకు ఒక స్ఫూర్తిదాయకం. తక్షణ ఆర్థిక ప్రయోజనాల కంటే సృజనాత్మక సంతృప్తికే పెద్దపీట వేయడం వల్ల కలిగే ఫలితాలు ఎలా ఉంటాయో ఈ భామ కెరీర్ నిరూపిస్తోంది. టెలివిజన్ మిలియనీర్ అయ్యే అవకాశాన్ని కాదనుకుని.. వెండితెరపై స్టార్ హీరోయిన్గా ఎదగడం ద్వారా తనకంటూ ఒక ప్రత్యేక గుర్తింపును సంపాదించుకున్నారు. ప్రస్తుతం అడివి శేష్తో `డెకాయిట్` వంటి క్రేజీ ప్రాజెక్టులతో ఆమె తన విజయ యాత్రను కొనసాగిస్తున్నారు.