'ప్రీమియర్స్ వేద్దామా.. వద్దా?'

సినిమా రిలీజ్‌ కు అంతా రెడీ. ప్రమోషన్స్ కంప్లీట్ అయ్యాయి. థియేటర్లు ఫిక్స్ అయ్యాయి. ఇక మిగిలింది ఒక్కటే.. ప్రీమియర్ షోలు వేయాలా.. వద్దా? బయటకు చూస్తే చిన్న విషయంలా అనిపించొచ్చు. కానీ ఇప్పుడు సినిమా రిలీజ్ ప్లాన్‌ లో ఇది కూడా మెయిన్ డెసిషన్ గా మారింది. ఇప్పుడు సోషల్ మీడియాలో ఆ విషయంపైనే జోరుగా చర్చ సాగుతోంది.

ప్రీమియర్ షో అంటే సినిమా రెగ్యులర్ షోలకు కొన్ని గంటల ముందే ప్రేక్షకులకు చూపించడం. సినిమా మీద హైప్ ఉన్న వాళ్లు ముందుగానే చూసే ఛాన్స్ ఉంటుంది. అక్కడి నుంచి వచ్చే కామెంట్స్ వెంటనే బయటకు వస్తాయి. సినిమా బాగుంటే ఆ టాక్ మరింత మందికి చేరుతుంది. దీంతో మరుసటి రోజు థియేటర్లకు వచ్చే వాళ్ల సంఖ్య పెరిగే అవకాశం ఉంటుంది.

అందుకే కొన్ని సినిమాలకు ప్రీమియర్స్ మంచి ప్లస్‌ గా మారుతున్నాయి. సినిమా చూసిన వాళ్లు తమ ఎక్స్పీరియన్స్ ను సోషల్ మీడియాలో చెప్పడం, ఫ్రెండ్స్‌ కు చెప్పడం.. ఇలా సినిమా గురించి చర్చ మొదలవుతుంది. సినిమా చూడని వాళ్లలో కూడా ఇంట్రెస్ట్ పెరుగుతుంది. ముఖ్యంగా భారీ అంచనాలతో వచ్చే సినిమాలకు ఇది ఉపయోగపడొచ్చు.

కానీ ప్రతి సినిమాకు ఇదే పద్ధతి సరిపోదు. కొన్ని మూవీల్లో కథ, ట్విస్టులు, కీలక సీన్స్ ముఖ్యం.

అలాంటి సినిమాలను ముందుగానే చూపిస్తే స్టోరీలోని ముఖ్యమైన విషయాలు బయటకు వచ్చే అవకాశం ఉంటుంది. అప్పుడు సినిమా రెగ్యులర్‌ గా చూసే ప్రేక్షకుడికి ఉండాల్సిన ఇంట్రెస్ట్ కొంత తగ్గొచ్చు. అందుకే మేకర్స్ మరో విధంగా ఆలోచిస్తున్నారు.

ప్రీమియర్ షోలు లేకుండా నేరుగా రెగ్యులర్ షోలతో సినిమాను రిలీజ్ చేయడం. అలా చేస్తే మొదటి రోజు థియేటర్లలో సినిమా చూసిన ప్రేక్షకులే మొదటి రెస్పాన్స్ ను బయటకు తీసుకువస్తారు. అంటే సినిమాకు తొలి టాక్ కూడా ప్రేక్షకుల నుంచే వస్తుంది. ఇక ప్రీమియర్ పెట్టాలంటే ముందుగానే చాలా విషయాలు ప్లాన్ చేయాలి. ఏ ప్రాంతాల్లో షోలు వేయాలి, ఏ సమయానికి వేయాలి, ఎన్ని థియేటర్లలో నిర్వహించాలనే లెక్కలు ఉంటాయి.

పెద్ద సినిమాల విషయంలో ఆ ఏర్పాట్లు మరింత ఎక్కువగా ఉంటాయి. మరో ముఖ్యమైన విషయం సినిమా జానర్. యాక్షన్ సినిమా, కామెడీ సినిమా, లవ్ స్టోరీ, థ్రిల్లర్.. ఇలా ఒక్కో సినిమాకు ఒక్కో రకమైన ప్రేక్షకులు ఉంటారు. అందుకే ఒక సినిమాకు పనిచేసిన ప్రీమియర్ ప్లాన్ మరో సినిమాకు పనిచేయకపోవచ్చు. ఇప్పటివరకు ప్రీమియర్ అంటే సినిమాను ముందుగా చూపించే షో అనే ఆలోచనే ఉండేది.

ఇప్పుడు మాత్రం సినిమా గురించి మొదటి కామెంట్ ఎప్పుడు బయటకు రావాలన్నది కూడా మేకర్స్ ఆలోచించాల్సిన విషయంగా మారింది. ప్రీమియర్ పెడితే ముందుగానే సినిమా మీద హైప్ పెంచుకోవచ్చు. పెట్టకపోతే కథను చివరి వరకు దాచుకోవచ్చు. రెండు విధానాల్లోనూ లాభం ఉంది. అలాగే నెగిటివిటీ వంటి ఇబ్బందులు ఉన్నాయి. అందుకే సినిమాను ముందుగానే ప్రేక్షకులకు చూపించాలా.. లేక నేరుగా థియేటర్లలోకి తీసుకెళ్లాలా అనేది నిర్మాతలు, మేకర్స్ ముందు ఒక ప్రశ్న నిలుస్తోంది.