లైఫ్ ఇచ్చిన డైరెక్టర్ పైనే సంచలన ఆరోపణలు చేస్తున్న కుంభమేళా మోనాలిసా.. !

ప్రయాగ్‌రాజ్ మహా కుంభమేళా ఫోటోలతో ఓవర్ నైట్ స్టార్‌గా మారిన మోనాలిసా, ఇప్పుడు తన వ్యక్తిగత జీవితం మరియు కెరీర్ విషయంలో సంచలన వార్తల్లో నిలిచింది. కేరళకు చెందిన ఫర్మాన్ ఖాన్‌ను ప్రేమ వివాహం చేసుకున్న ఆమె, తన మొదటి సినిమా దర్శకుడు సనోజ్ మిశ్రాపై షాకింగ్ ఆరోపణలు చేసింది. షూటింగ్ సెట్‌లో తన పట్ల ఆయన ప్రవర్తన అస్సలు బాలేదని, లైంగికంగా వేధించారని ఆవేదన వ్యక్తం చేసింది. అసలు మోనాలిసా ఎదుర్కొన్న ఇబ్బందులేంటి? ఆ దర్శకుడి గురించి?ఆ వివరాలు మీకోసం.

షూటింగ్ సెట్‌లో నరకం చూశాను.. మోనాలిసా ఆవేదన:

కుంభమేళా మోనాలిసాగా గుర్తింపు తెచ్చుకున్న ఈమెకు బాలీవుడ్ దర్శకుడు సనోజ్ మిశ్రా మొదటిసారి సినిమా అవకాశం ఇచ్చారు. అయితే, ఆ సంతోషం ఎంతో కాలం నిలవలేదు. షూటింగ్ సమయంలో సనోజ్ మిశ్రా తన పట్ల చాలా అసభ్యంగా ప్రవర్తించారని మోనాలిసా తాజాగా మీడియా ముందు వాపోయింది. ఇక సీన్ వివరించే నెపంతో తన శరీరాన్ని పదే పదే తాకుతూ అసౌకర్యానికి గురిచేశారని ఆరోపించింది. అప్పట్లో తనకు 18 ఏళ్లు కూడా నిండలేదని, ఏం చేయాలో తెలియక భయంతో వణికిపోయానని కన్నీళ్లు పెట్టుకుంది.

దర్శకుడు సనోజ్ మిశ్రాపై పాత కేసులు ఇవే:

కేవలం మోనాలిసా మాత్రమే కాదు, గతంలో మరో యువతి కూడా ఈ దర్శకుడిపై తీవ్రమైన ఆరోపణలు చేసింది. సినిమా ఛాన్స్ ఇస్తానని నమ్మించి, మోసం చేశాడని ఆమె ఫిర్యాదు చేసింది. ఇక అంతేకాకుండా, ఆమె వీడియో తీసి తనను బ్లాక్ మెయిల్ చేస్తూ పలుమార్లు అఘాయిత్యానికి పాల్పడినట్లు పేర్కొంది. ఈ కేసులో పోలీసులు గతంలో సనోజ్ మిశ్రాను అరెస్ట్ కూడా చేశారు. అయితే ఆయన తర్వాత బెయిల్‌పై విడుదలయ్యారు.

మోనాలిసా ఆరోపణలపై సనోజ్ మిశ్రా కామెంట్..

మరోవైపు మోనాలిసా ఆరోపణలపై దర్శకుడు సనోజ్ మిశ్రా స్పందిస్తూ.. ఆమె సినిమా కోసం తాము కోట్లాది రూపాయలు ఖర్చు చేశామని, ఆమె అకస్మాత్తుగా పెళ్లి చేసుకోవడం వల్ల సినిమా దెబ్బతింటుందని వాదిస్తున్నారు. కానీ, సినిమా రిజల్ట్ కంటే ఒక మహిళ ఆత్మగౌరవం, భద్రత ముఖ్యమని నెటిజన్లు అభిప్రాయపడుతున్నారు. ఇండస్ట్రీలో ఇలాంటి 'కాస్టింగ్ కౌచ్' వేధింపులు ఇంకా కొనసాగుతుండటం విచారకరం. మోనాలిసా ధైర్యంగా బయటకు వచ్చి చెప్పిన ఈ విషయాలు ఇప్పుడు ఇండస్ట్రీలో చర్చనీయాంశంగా మారాయి.