హీరోయిన్‌ల కోసం కథలు మారాల్సిన సమయం వచ్చిందా?

భారతీయ సినీ పరిశ్రమ గత కొన్నేళ్లలో ఎన్నో మార్పులను చ‌విచూసింది. భారీ బడ్జెట్‌లు, పాన్ ఇండియా రిలీజ్‌లు, గ్లోబల్ మార్కెట్ టార్గెట్ గా సినిమాలు రూపొందుతున్నా, హీరోయిన్ల విషయంలో మాత్రం ఇంకా ఆశించిన స్థాయిలో మార్పు రాలేదనే డిస్క‌ష‌న్ తరచూ వినిపిస్తూనే ఉంది. ఈ నేపథ్యంలో నటి మాళవిక మోహనన్ చేసిన కామెంట్స్ మరోసారి ఇండస్ట్రీలో మహిళల ప్రాతినిధ్యంపై చర్చకు దారితీశాయి.

సినిమాల్లో హీరోయిన్లకు స్ట్రాంగ్ క్యారెక్ట‌ర్లు రావాలంటే కేవలం హీరోయిన్ల టాలెంట్ మాత్ర‌మే సరిపోదని, కథలను రాసే రచయితలు, వాటిని తెరకెక్కించే డైరెక్ట‌ర్ల‌లో కూడా మహిళల సంఖ్య పెరగాల్సిన అవసరం ఉందని మాళవిక అభిప్రాయపడ్డారు. మహిళలు ఎక్కువగా క్రియేటివ్ విభాగాల్లోకి వస్తే మహిళా పాత్రల ఆలోచనా విధానం, ఎమోష‌న్స్, సంఘర్షణలు మరింత సహజంగా తెరపై కనిపిస్తాయని ఆమె సూచించారు.

ప్రస్తుతం లేడీ ఓరియెంటెడ్ సినిమాల‌కు ఆడియ‌న్స్ లో మంచి ఆదరణ లభిస్తున్నా, ఫుల్ లెంగ్త్ యాక్షన్ జానర్‌లో హీరోయిన్లను మెయిన్ గా పెట్టి రూపొందే సినిమాలు మాత్రం చాలా అరుదుగా కనిపిస్తున్నాయి. ఈ తరహా బలమైన యాక్షన్ కథల్లో నటించే ఛాన్స్ వ‌స్తే తప్పకుండా స్వీకరిస్తానని మాళవిక వెల్లడించారు. కథలో పాత్రకు బలం ఉంటే అలాంటి ఛాలెంజెస్ ను ఎదుర్కోవ‌డానికి రెడీగా ఉన్న‌ట్టు ఆమె చెప్పడం విశేషం. ఇటీవలి కాలంలో ప్రేక్షకుల అభిరుచిలో కూడా గణనీయమైన మార్పు కనిపిస్తోంది. కేవలం హీరో చుట్టూ తిరిగే కథలకే కాకుండా, కథకు అవసరమైన ప్రతి పాత్రకు సమాన ప్రాధాన్యం ఉండే సినిమాలను ఆడియ‌న్స్ ఆదరిస్తున్నారు. ఈ మార్పు నేపథ్యంలో హీరోయిన్ పాత్రలను కూడా మరింత ప‌వ‌ర్‌ఫుల్ గా తీర్చిదిద్దాల్సిన అవసరం ఉందనే అభిప్రాయం సినీ వర్గాల్లో వ్యక్తమవుతోంది.

ఇండస్ట్రీలో మహిళల భాగస్వామ్యం నటనకే పరిమితం కాకుండా రచన, దర్శకత్వం, సినిమాటోగ్రఫీ, ఎడిటింగ్, నిర్మాణం వంటి కీలక విభాగాల్లో కూడా పెరిగితే కథల దృక్పథం మరింత విస్తరిస్తుందని విశ్లేషకులు భావిస్తున్నారు. విభిన్న అనుభవాలు, కొత్త ఆలోచనలు తెరపైకి రావడానికి ఇది ఉపయోగపడుతుందని వారి అభిప్రాయం. మాళవిక కామెంట్స్ కూడా ఇదే దిశగా సాగాయి. మహిళలకు మరిన్ని అవకాశాలు కల్పించడం అనేది కేవలం సమానత్వానికి సంబంధించిన అంశం మాత్రమే కాకుండా, సినిమాల క్వాలిటీని, కథల వైవిధ్యాన్ని పెంచే అడుగుగా చూడాలని ఆమె సూచించారు. ప్రేక్షకులు కొత్త తరహా కథలను ఆదరిస్తున్న ఈ సమయంలో, హీరోయిన్‌లను కేవలం గ్లామర్ పాత్రలకు పరిమితం చేయకుండా కథను ముందుకు నడిపించే కేంద్ర పాత్రలుగా తీర్చిదిద్దాల్సిన టైమ్ ద‌గ్గ‌ర ప‌డింద‌నే డిస్క‌ష‌న్ కు ఆమె కామెంట్స్ మరింత బలాన్ని చేకూర్చాయి.