హాలీవుడ్ చరిత్రలోనే ఆల్-టైమ్ గ్రేటెస్ట్ వెస్ట్రన్ కామెడీ!

హాలీవుడ్ వెస్ట్రన్ శైలి సినిమాలకు బ్రాండ్ అంబాసిడర్‌గా గుర్తింపు తెచ్చుకున్న దిగ్గజ నటుడు జాన్ వేన్. కౌబాయ్ పాత్రలు, వెస్ట్రన్ సినిమాలంటే మొదటగా గుర్తుకువచ్చేది ఆయనే. అయితే 1974లో వచ్చిన ఓ సటైరికల్ వెస్ట్రన్ కామెడీ చిత్రంలో నటించే అవకాశాన్ని ఆయన తిరస్కరించారు. కానీ ఆ తర్వాతి కాలంలో ఆ చిత్రం హాలీవుడ్ చరిత్రలోనే అత్యంత ప్రజాదరణ పొందిన కామెడీ చిత్రాలలో ఒకటిగా నిలవడం విశేషం.

దర్శకుడు మెల్ బ్రూక్స్ తెరకెక్కించిన `బ్లేజింగ్ శాడల్స్` అనే సటైరికల్ వెస్ట్రన్ చిత్రంలో `జిమ్` అలియాస్ `వాకో కిడ్` పాత్ర కోసం జాన్ వేన్ మొదట ఎంపిక చేయాలని భావించారు. ఈ పాత్రకు వేన్ సరైన న్యాయం చేయగలరని భావించిన మెల్ బ్రూక్స్ కథను వినిపించారు. కథ విన్న జాన్ వేన్ స్క్రిప్ట్ చదివి బిగ్గ‌ర‌గా న‌వ్వుకున్నా? సినిమాలో నటించడానికి మాత్రం నిరాకరించారు.

ఈ ఆఫర్‌ను తిరస్కరించడానికి జాన్ వేన్ చెప్పిన కారణం ఎంతో ఆసక్తికరంగా ఉంటుంది. స్క్రిప్ట్ చదివి నేను కడుపుబ్బ నవ్వుకున్నాను. కానీ నేను ఈ సినిమాలో నటించలేను. ఇందులో ఉపయోగించిన భాష, విషయాలు చాలా బోల్డ్‌గా ఉన్నాయి` అని వేన్ మెల్ బ్రూక్స్‌తో అన్నారట. తనకున్న సాంప్రదాయ కౌబాయ్ ఇమేజ్ , భావజాలానికి ఈ సినిమా శైలి సెట్ కాదని భావించి ఆయన ప్రాజెక్ట్ నుంచి తప్పుకున్నారు.

జాన్ వేన్ నో చెప్పిన తర్వాత ఆ పాత్రకు తొలుత గిగ్ యంగ్ అనే ఆస్కార్ విజేతను ఎంపిక చేశారు. అయితే షూటింగ్ ప్రారంభమైన మొదటి రోజే ఆయన తీవ్ర అనారోగ్యానికి గురై సెట్స్‌లోనే స్పృహతప్పి పడిపోవడంతో ఆ పాత్రలో మార్పులు చేయాల్సి వచ్చింది. ఆ తర్వాత ప్రముఖ నటుడు జీన్ వైల్డర్ రంగంలోకి దిగి `వాకో కిడ్` పాత్రను పోషించారు. ఆయనతో పాటు క్లీవాన్ లిటిల్ ప్రధాన పాత్రలో నటించారు.

1874 కాలం నాటి కథాంశంతో రూపొందిన `బ్లేజింగ్ శాడల్స్` చిత్రం అప్పటికే ఉన్న వెస్ట్రన్ సినిమాల శైలిని పూర్తిగా కామెడీ కోణంలో రీడిఫైన్ చేసింది. వర్ణవివక్ష, రాజకీయ అపహాస్యం , హాలీవుడ్ సాంప్రదాయ మూసధోరణులను ఆకట్టుకునే విధంగా ఎద్దేవా చేస్తూ తెరకెక్కించిన ఈ చిత్రం ప్రేక్షకుల నుంచి అద్భుతమైన ఆదరణ పొందింది. బాక్సాఫీస్ వద్ద భారీ విజయాన్ని సాధించడమే కాకుండా హాలీవుడ్‌లో ఓ బెంచ్‌మార్క్‌గా మారింది.

ఈ సినిమా విడుదలైన ఐదు దశాబ్దాల తర్వాత కూడా ప్రాభవాన్ని కోల్పోలేదు. అమెరికన్ ఫిల్మ్ ఇన్స్టిట్యూట్ విడుదల చేసిన `100 ఇయర్స్... 100 లాఫ్స్` అత్యుత్తమ కామెడీ చిత్రాల జాబితాలో `బ్లేజింగ్ శాడల్స్` మొదటి స్థానాన్ని కైవసం చేసుకుంది. జాన్ వేన్ వంటి అగ్ర నటుడు వదులుకున్నా? జీన్ వైల్డర్ నటనతో ఈ చిత్రం ఆల్-టైమ్ హాలీవుడ్ క్లాసిక్స్ జాబితాలో నిలిచిపోయింది.