అన్ని ఐమ్యాక్స్‌లు హైద‌రాబాద్‌కేనా! మిగ‌తా న‌గ‌రాల‌కు లేన‌ట్టేనా?

హైద‌రాబాద్‌లో ఐమ్యాక్సులు క్యూ క‌డుతున్నాయి స‌రే.. పూణే త‌ర‌హాలో పెద్ద సినిమాల‌కు రూ.3000 పెట్టి టికెట్ కొన‌గ‌ల‌రా? `రామాయ‌ణం పార్ట్ 1` టికెట్ ధ‌ర పూణేలోని ఓ ఐమ్యాక్స్ లో 3000 వ‌ర‌కూ ప‌లుకుతోంద‌నే స‌మాచారం నిజంగా ఆశ్చ‌ర్య‌ప‌రిచింది. మునుముందు హైద‌రాబాద్ లో ఇదే ప‌రిస్థితి వ‌స్తుందా? ఇక్క‌డ‌ ప్రారంభం కాబోయే ఐమ్యాక్స్ ల‌లో టికెట్ ధ‌ర‌ 500 నుంచి 1000 వ‌ర‌కూ ఉంటుంద‌ని ఒక అంచ‌నా. ప్రీమియ‌ర్లు, ప్రివ్యూలకు ఈ ధ‌ర 3000 మించి ఉండే ఛాన్సుంద‌ని భావిస్తున్నారు... పూర్తి వివ‌రాల్లోకి వెళితే..

మ‌హాన‌గ‌రం హైదరాబాద్ లో ప్రస్తుతం ఒక్కదాని తర్వాత ఒకటిగా ఐమ్యాక్స్ థియేటర్లు క్యూ కడుతుండటం సినీ వర్గాల్లో తీవ్ర చర్చనీయాంశమవుతోంది. ఏషియన్ సినిమాస్, ఏఎంబీ సినిమాస్ ఇప్ప‌టికే ఆ దిశ‌గా ప‌నుల్ని కొన‌సాగిస్తున్నాయి. తాజాగా అపర్ణా సినిమాస్ వంటి దిగ్గజ సంస్థ విప్రో సర్కిల్, గచ్చిబౌలి వంటి ప్రాంతాలలో ఏకంగా 12-స్క్రీన్ మల్టీప్లెక్స్‌లతో పాటు సరికొత్త `ఐమ్యాక్స్ విత్ లేజర్` టెక్నాలజీని తీసుకువస్తుండటం విశేషం. దశాబ్ద కాలంగా నగరంలో ఒక అధికారిక ఐమ్యాక్స్ స్క్రీన్ లేదనే లోటును తీరుస్తూ.. ఎస్.ఎస్. రాజమౌళి - మహేష్ బాబు కాంబినేషన్‌లో రాబోతున్న `వారణాసి` చిత్రం కోసం ఈ స్క్రీన్లను సిద్ధం చేస్తుండటం టాలీవుడ్‌లో ఉత్కంఠ రేపుతోంది. అయితే ఈ హడావుడి చూస్తున్న మిగతా నగరాల ప్రేక్షకులు.. సినీ ప్రియుల నుంచి ``అన్ని ఐమ్యాక్స్‌లు హైదరాబాద్‌కేనా, మిగతా నగరాలకు లేనట్లేనా?`` అనే ప్రశ్న గట్టిగా వినిపిస్తోంది.

హైదరాబాద్‌లో ఈ సదుపాయాలు వేగంగా విస్తరిస్తున్నా.. టికెట్ ధరల అంశం ఇప్పుడు సామాన్య ప్రేక్షకులను కలవరపెడుతోంది. పుణే వంటి నగరాల్లోని ఫీనిక్స్ మాల్ ఆఫ్ ది మినియమ్ వంటి ప్రాంతాల్లోని ఐమ్యాక్స్ స్క్రీన్లలో అడ్వాన్స్ బుకింగ్స్ పరిశీలిస్తే ధరలు చుక్కల్ని తాకుతున్నాయి. రెక్లైనర్ రోస్ టికెట్ ధర ఏకంగా రూ. 2,820 వరకు ఉండగా.. క్లాసిక్ రోస్ టికెట్లు కూడా రూ. 1,350 వరకు పలుకుతున్నాయి. ఇదే ట్రెండ్ హైదరాబాద్‌కు కూడా పాకితే, సామాన్య సినిమా ప్రేమికుడు ఒక సినిమా చూసేందుకు మూడు వేల రూపాయలు వెచ్చించగలడా అనే పెద్ద సందేహం తెరపైకి వస్తోంది. నగరంలో ప్రారంభం కానున్న‌ ఐమ్యాక్స్ స్క్రీన్లలో సాధారణ ధరలు రూ. 500 నుండి రూ. 1,000+ వరకు ఉంటాయని అంచనా వేస్తున్నా... ప్రీమియర్లు , ప్రత్యేక షోల సమయాల్లో ఇవి మరింత ప్రియమయ్యే అవకాశం ఉంది.

ఈ భారీ ధరల సంస్కృతిపై సోషల్ మీడియాలో రకరకాల వాదనలు వినిపిస్తున్నాయి. సినిమాను కేవలం వినోదంగా కాకుండా ఒక రిచ్ విజువల్ ఎక్స్‌పీరియన్స్‌గా భావించే వర్గం దీనిని స్వాగతిస్తుంటే.. మధ్యతరగతి ప్రేక్షకులు మాత్రం తీవ్ర ఆందోళన వ్యక్తం చేస్తున్నారు. అంతర్జాతీయ స్థాయి ఐమ్యాక్స్ లేజర్ టెక్నాలజీ, నెక్స్ట్-జెన్ ఆప్టికల్ ఇంజిన్లు, కస్టమ్ లెన్సులు.. లీనమయ్యే ఆడియో సిస్టమ్‌ల నిర్వహణ ఖర్చు విపరీతంగా ఉంటుందని.. అందుకే థియేటర్ యాజమాన్యాలు ఈ స్థాయిలో ధరలు వసూలు చేయక తప్పడం లేదని విశ్లేషకులు భావిస్తున్నారు. అయితే ఒక సినిమా టికెట్ కోసం రూ. 3,000 వరకు ఖర్చు పెట్టడం అనేది సామాన్య ప్రేక్షకుడికి భారంగా మారుతుందనడంలో ఎలాంటి సందేహం లేదు.

మరోవైపు హైదరాబాద్ నగరంలోనే ఈ ప్రాజెక్ట్‌ల కేంద్రీకరణపై ప్రాంతీయ అసంతృప్తి కూడా వ్యక్తమవుతోంది. కూకట్‌పల్లి, ఫైనాన్షియల్ డిస్ట్రిక్ట్, విప్రో సర్కిల్ వైపే అన్ని పెద్ద ప్రాజెక్ట్‌లు కేంద్రీకృతమవడంపై సిటీలోని ఇతర ప్రాంతాల ప్రజలు పెదవి విరుస్తున్నారు. అంతేకాకుండా ఎన్ని ఐమ్యాక్స్ వచ్చినా ఒకప్పుడు ప్రసాద్స్ అందించినంత భారీ సైజు గల `రియల్ ఐమ్యాక్స్` అనుభూతి దక్కే ఛాన్సు లేదని.. అపర్ణా సినిమాస్ వంటి కొత్త ప్రాజెక్ట్‌లయినా కనీసం 70 అడుగుల‌ స్క్రీన్లను ప్లాన్ చేయాలని నెటిజన్లు సోషల్ మీడియా వేదికగా డిమాండ్ చేస్తున్నారు. లొకేషన్ ఎంపిక, హై-ఎండ్ టెక్నాలజీపై వస్తున్న విజ్ఞప్తులు రియల్ ఎస్టేట్ - ఎంటర్‌టైన్‌మెంట్ రంగంలో కొత్త ట్రెండ్స్‌కు అద్దం పడుతున్నాయి.

మొత్తంగా చూస్తే.. హైదరాబాద్‌లోకి ఐమ్యాక్స్ శకం అట్టహాసంగా పునరాగమనం చేస్తున్నా.. విలాసవంతమైన సినిమా అనుభూతి వర్సెస్ సామాన్య ప్రేక్షకుడి ఆర్థిక స్థోమత మధ్య ఒక పెద్ద అంతరం ఏర్పడుతోంది. రానున్న‌ రోజుల్లో ఈ టికెట్ ధరల మోతను ప్రేక్షకులు ఏ విధంగా స్వీకరిస్తారు? తెలుగు రాష్ట్రాల్లో ఇతర నగరాలు ఈ రేసులో ఎప్పుడు నిలదొక్కుకుంటాయి అనేది కాలమే నిర్ణయించాలి. ఏది ఏమైనా గ్లామర్ ప్రపంచంలో టెక్నాలజీ మారిన కొద్దీ వినోదం మరింత ఖరీదైన హంగులద్దుకుంటోందనేది మాత్రం ఈ పరిణామాల ద్వారా స్పష్టమవుతోంది.