నా సామి రంగ.. మాస్ లో రొమాన్స్

టాలీవుడ్ మన్మథుడు, సీనియర్ హీరో నాగార్జున కొంచెం గ్యాప్ తీసుకుని అనౌన్స్ చేసిన సినిమా నా సామి రంగ. గత కొన్ని నెలలుగా థియేటర్లలో సందడి చేయని నాగ్.. నేరుగా వచ్చే ఏడాది సంక్రాంతి బరిలో నిలిచారు. బాక్సాఫీస్ వద్ద మరో నాలుగు సినిమాలతో పోటీ పడనున్నారు. ప్రస్తుతం నాగార్జున సినిమా షూటింగ్ ను శరవేగంగా చేస్తున్నారు మేకర్స్.

ఈ సినిమాలో నాగార్జున సరసన కన్నడ భామ ఆషికా రంగనాథ్ హీరోయిన్ గా నటిస్తుండగా.. ఇంకో హీరోయిన్ కూడా ఉందని సమాచారం. డ్యాన్స్ మాస్టర్ విజయ్ బిన్నీ దర్శకుడిగా మారి ఈ సినిమాను తెరకెక్కిస్తున్నారు. ఇప్పటికే రిలీజైన గ్లింప్స్, పోస్టర్స్ చూస్తుంటే పండుగకు నాగార్జున మంచి సందడి చేయనున్నట్లు తెలుస్తోంది.

మరోవైపు, ఈ సినిమా ప్రమోషన్లను మేకర్స్ తాజాగా మొదలుపెట్టేశారు. ఈ సినిమా నుంచి ఎత్తుకెళ్లిపోవాలనిపిస్తుందే అంటూ సాగే లిరకల్ సాంగ్ ను ఆదివారం రిలీజ్ చేశారు. ఈ పాటకు చంద్రబోస్ లిరిక్స్ రాయగా.. ఆస్కార్ దర్శకుడు ఎంఎం కీరవాణి బాణీలు అందించారు. సింగర్ రామ్ మిరియాల ఈ పాటకు తన గాత్రంతో ప్రాణం పోశారు.

ఈ సాంగ్ లో నాగార్జున, ఆషికా రంగనాథ్ కలిసి వేసిన స్టెప్స్ ను మేకర్స్ చూపించారు. నాగ్- ఆషిక కెమిస్ట్రీ అందరినీ ఆకట్టుకుంటోంది. లిరికల్ సాంగ్ లో ఎప్పటిలాగే తన లుక్స్ తో నాగార్జున ఆకట్టుకోగా.. ఆషిక కుందనపు బొమ్మలా ఉందని నెటిజన్లు కామెంట్లు చేస్తున్నారు. పాటలో విజువల్స్ చాలా గ్రాండ్ గా ఉన్నట్లు చెబుతున్నారు. ప్రస్తుతం ఈ పాట ట్రెండింగ్ లో ఉంది.

టాలీవుడ్ ప్రముఖ నిర్మాణ సంస్థ సిల్వర్ స్క్రీన్ పతాకంపై శ్రీనివాస చిట్టూరి నిర్మిస్తున్నారు. పవన్ కుమార్ ఈ చిత్రాన్ని సమర్పిస్తున్నారు. ఇక సంక్రాంతి పండగకు నాగార్జున ఎప్పటిలాగే ఫుల్ ఎంటర్టైన్మెంట్ ఇస్తారని అంతా భావిస్తున్నారు. సంక్రాంతికి రిలీజ్ అని మేకర్స్ ఇప్పటికే చెప్పినా ఈ సినిమా విడుదల తేదీ మాత్రం ఇంకా ప్రకటించలేదు. జనవరి 11 లేదా 14వ తేదీన రిలీజ్ చేయాలని మేకర్స్ భావిస్తున్నారట.