8నెలల గర్భంతో దీపిక సాహసం.. డెడికేషన్ కి సినీ లోకం ఫిదా!

ఐకాన్ స్టార్ అల్లు అర్జున్, సెన్సేషనల్ డైరెక్టర్ అట్లీ కాంబినేషన్‌లో వస్తున్న మోస్ట్ అవైటెడ్ మూవీ 'రాకా'. ఈ భారీ ప్రాజెక్టు షూటింగ్ ప్రస్తుతం శరవేగంగా జరుగుతోంది. ఈ సినిమాలో కథానాయికగా నటిస్తున్న బాలీవుడ్ బ్యూటీ దీపికా పదుకొణే 8 నెలల గర్భంతో ఉన్నప్పటికీ, ఏమాత్రం తగ్గకుండా సెట్స్‌లో కష్టపడుతున్నారు. నైట్ షిఫ్ట్‌లలోనూ ఎంతో ఉత్సాహంగా పాల్గొంటూ తన వృత్తి పట్ల ఉన్న నిబద్ధతను చాటుకోవడం సినీ వర్గాల్లో తీవ్ర చర్చనీయాంశంగా మారింది.

ఈ నెలలోనే షూటింగ్ పూర్తి చేసేందుకు ప్లాన్:

దీపికా పదుకొణే సెప్టెంబర్ నెలలో తన రెండవ బిడ్డకు జన్మనివ్వబోతున్నారు. డెలివరీ సమయం దగ్గర పడుతుండటంతో మాతృత్వ విరామం తీసుకోనున్నారు. అందుకే తన వల్ల సినిమా ఆలస్యం కాకూడదనే ఉద్దేశంతో 'రాకా' చిత్రానికి సంబంధించిన తన టాకీ పార్ట్ మరియు యాక్షన్ సన్నివేశాల షూటింగ్‌ను ఈ నెలలోనే పూర్తి చేసేందుకు దీపికా అహోరాత్రులు శ్రమిస్తున్నారు. మూవీ లో దీపికా పాత్రే కీలకం. కథ మలుపులు అన్నీ ఆమె చుట్టూనే తిరుగుతాయి. అందుకే ఆమె సీన్స్‌ను ముందుగానే షూట్ చేస్తున్నట్టు టాక్.

నైట్ షిఫ్ట్‌లలోనూ దీపికా సాహసం:

షెడ్యూల్ ప్లానింగ్ ప్రకారం ఈ సినిమాలో కొన్ని కీలకమైన రాత్రి సన్నివేశాలను చిత్రీకరిస్తున్నారు. ఇంట్లో ఏడాదిన్నర వయసున్న చిన్న పాపను చూసుకుంటూనే, మరోవైపు సెట్‌లో శ్రమిస్తున్నారు. ప్రెగ్నెన్సీ చివరి దశలో ఉన్నప్పటికీ, ఆమె నైట్ టైమ్‌లోనూ సెట్స్‌కు వచ్చి లేట్ నైట్ షూటింగ్‌లలో పాల్గొంటున్నారు. ఇక ఎలాంటి అలసట చూపించకుండా చాలా సరళంగా, క్రమశిక్షణతో పనిచేస్తున్న దీపికా డెడికేషన్ చూసి చిత్ర యూనిట్ ఆశ్చర్యపోవడమే కాకుండా ఆమెపై ప్రశంసల వర్షం కురిపిస్తోంది.

అల్లు అర్జున్, అట్లీ కాంబోపై భారీ అంచనాలు:

'రాకా' సినిమాను సన్ పిక్చర్స్ బ్యానర్‌పై భారీ బడ్జెట్‌తో తెరకెక్కిస్తున్నారు. అల్లు అర్జున్‌ను సరికొత్త రగ్గడ్ లుక్‌లో ప్రెసెంట్ చేస్తున్న అట్లీ, దీపికా పాత్రను కూడా చాలా పవర్‌ఫుల్‌గా తీర్చిదిద్దారని తెలుస్తోంది. ఇక వీరిద్దరి కాంబినేషన్‌లో రానున్న మొదటి సినిమా కావడంతో పాన్-ఇండియా స్థాయిలో ఈ చిత్రంపై విపరీతమైన అంచనాలు నెలకొన్నాయి.

వ్యక్తిగత జీవితంలోని కీలక ఘట్టాన్ని ఆస్వాదిస్తూనే, ప్రొఫెషనల్ లైఫ్‌ను ఎంతో బాధ్యతాయుతంగా బ్యాలెన్స్ చేస్తున్న దీపికా పదుకొణే అందరికీ స్ఫూర్తిగా నిలుస్తున్నారు. ఇక ఈ నెలలోనే తన షూటింగ్ భాగాన్ని విజయవంతంగా పూర్తి చేసి, త్వరలోనే మాతృత్వపు ఆనందాన్ని ఆస్వాదించబోతున్న దీపికాకు అభిమానులు శుభాకాంక్షలు తెలుపుతున్నారు.