త్రివిక్రమ్ తరహాలోనే ఆమెతో బోయపాటి

మిగిలిన అన్ని రంగాలతో పోల్చుకుంటే సినిమాల్లో మాత్రం ఇంకాస్త ఎక్కువగా సెంటిమెంట్లను ఫాలో అవుతుంటారు. ప్రాజెక్టును ప్రకటించే సమయం నుంచి రిలీజ్ డేట్ వరకు.. సినిమాకు పెట్టే కాస్ట్ నుంచి కాస్టింగ్ వరకూ అన్నీ గతంలో కలిసి వచ్చిన ప్రకారమే ఫాలో అవుతుంటారు. ముఖ్యంగా తమ సినిమాల్లో నటించే హీరోయిన్ల విషయంలోనూ సెంటిమెంట్ చూస్తుంటారు. అలాంటి వాళ్లు తెలుగు చిత్ర పరిశ్రమలో చాలా మందే ఉన్నారు.

వాస్తవానికి చాలా మంది డైరెక్టర్లు తమ సినిమాల్లో గతంలో చేసిన హీరోయిన్‌ను రిపీట్ చేయరు. కానీ, టాలీవుడ్‌లోని కొందరు దర్శకులు హీరోయిన్ల ఎంపికతో హిట్ సెంటిమెంట్‌ను ముడి వేస్తుంటారు. అలాంటి వారిలో బడా డైరెక్టర్ మాటల మాంత్రికుడు త్రివిక్రమ్ శ్రీనివాస్ ఒకరు. దర్శకుడిగా ప్రయాణాన్ని మొదలు పెట్టిన తర్వాత ఆయన చాలా మంది కథానాయికలను మళ్లీ మళ్లీ తన సినిమాలో నటింపజేసి హైలైట్ అయ్యారు.

త్రివిక్రమ్ శ్రీనివాస్ ‘జల్సా’ సినిమాలో ఇలియానాను హీరోయిన్‌గా తీసుకున్నారు. ఇది హిట్ కావడంతో ఆ తర్వాత ‘జులాయి’కి కూడా ఆమెను ఫీమేల్ లీడ్‌గా ఎంపిక చేసుకున్నారు. ఆ తర్వాత ‘అత్తారింటికి దారేది’ సినిమాకు సమంత రూత్ ప్రభును హీరోయిన్‌గా తీసుకున్నారు. ఇది బ్లాక్ బస్టర్ కావడంతో ఆ తర్వాత ‘సన్నాఫ్ సత్యమూర్తి’, ‘అ ఆ’ సినిమాల్లో నటింపజేశారు. తద్వారా ఆమె మళ్లీ మళ్లీ హిట్లను అందుకున్నారు.

ఇదే త్రివిక్రమ్ ‘అరవింద సమేత వీరరాఘవ’ చిత్రం కోసం పూజా హెగ్డేను సెలెక్ట్ చేసుకున్నారు. ఆ తర్వాత ‘అల.. వైకుంఠపురములో’ మూవీకి కూడా తీసుకున్నారు. అనంతరం ‘గుంటూరు కారం’ చిత్రానికి కూడా ఆమెను తీసుకున్నా.. కొన్ని కారణాలతో శ్రీలీలతో రీప్లేస్ చేశారు. ఇప్పుడు త్రివిక్రమ్‌లా బోయపాటి శ్రీను కూడా అదే తరహా సెంటిమెంట్‌ను ఫాలో అవుతున్నాడేమో అనిపిస్తోంది.

ఈ మధ్య కాలంలో సరిగా హిట్లను అందుకోలేకపోతోన్న బోయపాటి శ్రీను ‘అఖండ’తో సత్తా చాటారు. దీంతో ఇప్పుడు దీనికి సీక్వెల్‌గా ‘అఖండ 2’ను ప్రకటించారు. ఈ సినిమాలో కూడా హీరోయిన్‌గా ప్రగ్యా జైస్వాల్‌ను తీసుకున్నారు. గతంలో ఆమె ‘జయ జానకీ నాయక’ చిత్రంలోనూ మెరిసింది. అలా బోయపాటి.. ప్రగ్యా జైస్వాల్‌కు మూడో ఆఫర్‌ను ఇచ్చినట్లు అయింది.

నందమూరి బాలకృష్ణ హీరోగా నటిస్తోన్న ‘అఖండ 2’ చిత్రంలో ప్రగ్యా జైస్వాల్‌ను తీసుకోవడం గమనించిన వాళ్లంతా త్రివిక్రమ్ బాటలోనే బోయపాటి శ్రీను కూడా నడుస్తున్నాడని చెప్పుకుంటున్నారు. అయితే ఇది సెంటిమెంట్ ట్రెండ్‌ కాకపోవచ్చు. మొదటి పార్ట్ లో చేసిన రోల్ సెకండ్ పార్ట్ లో కూడా కంటిన్యూ అవ్వచ్చు. అయితే ఆమెకు ప్రస్తుతం పెద్దగా అవకాశాలు ఏమి లేవు. సీక్వెల్ అయినా ఈ మధ్య హీరోయిన్స్ ను పెద్దగా రిపీట్ చేయడం. కానీ బోయపాటి ఆమెను ఎందుకు సెలెక్ట్ చేసుకున్నాడో తెలియాలి అంటే మరికొంత కాలం ఆగాల్సిందే.