అగ్ర నిర్మాణ సంస్థ‌ల ఫేడ‌వుట్ ఐడియాల‌జీ మార‌క‌పోతే!

ఇండ‌స్ట్రీలో ఒకప్పుడు తిరుగులేని ఆధిపత్యాన్ని చెలాయించిన దిగ్గజ నిర్మాణ సంస్థలు ప్రస్తుతం ఊహించని రీతిలో వరుస పరాజయాలతో కుదేలవుతున్నాయి. అమీర్ ఖాన్ ప్రొడక్షన్స్, కరణ్ జోహార్‌కు చెందిన ధర్మ ప్రొడక్షన్స్, పూజా ఫిల్మ్స్, నడియాడ్‌వాలా గ్రాండ్‌సన్ ఎంటర్‌టైన్‌మెంట్ వంటి మోస్ట్ సక్సెస్‌ఫుల్ బ్యానర్లు నేడు తీవ్ర బాక్సాఫీస్ సవాళ్లను ఎదుర్కొంటున్నాయి. కరణ్ జోహార్ వరుస ఫ్లాపుల వల్ల సినిమాలు తీయడం తగ్గించడమే కాకుండా, తన నిర్మాణ సంస్థ వాటాలను ఆధార్ పూనావాలా గ్రూప్‌నకు విక్రయించాల్సిన పరిస్థితి ఏర్పడింది. అలాగే కంటెంట్‌కు కేరాఫ్ అడ్రస్‌గా నిలిచిన అమీర్ ఖాన్ ప్రొడక్షన్స్ సహా మిగిలిన సంస్థలు కూడా కనీస వసూళ్లను సాధించలేక చేతులు కాల్చుకుంటున్నాయి.

హిందీ చిత్రసీమలో ప్రతిష్టాత్మక బ్యానర్లుగా పేరుగాంచిన వైఆర్‌ఎఫ్ (యష్ రాజ్ ఫిల్మ్స్), ఫాంటమ్ ఫిల్మ్స్ వంటి సంస్థలు కూడా ఈ సంక్షోభం నుంచి తప్పించుకోలేకపోయాయి. షంషేరా, సామ్రాట్ పృథ్వీరాజ్, జయేశ్‌భాయ్ జోర్దార్ వంటి భారీ బడ్జెట్ చిత్రాలతో యష్ రాజ్ ఫిల్మ్స్ కనీవినీ ఎరుగని లేమి కాలాన్ని అనుభవించింది. ఇక వినూత్న చిత్రాలకు ప్రాణమిచ్చిన ఫాంటమ్ ఫిల్మ్స్ `బాంబే వెల్వెట్` వంటి బిగ్ డిజాస్టర్‌తో మూతపడగా, అంతర్జాతీయ దిగ్గజాలైన డిస్నీ ఇండియా, సోనీ పిక్చర్స్ కూడా బాలీవుడ్‌లో స్థానిక అభిరుచులను అందుకోలేక తమ ప్రత్యక్ష నిర్మాణాలను తగ్గించుకోవాల్సి వచ్చింది.

ఈ దిగ్గజ సంస్థల వరుస వైఫల్యాలకు ప్రధాన కారణం నేటి జెన్-జీ ఆడియన్స్ అభిరుచులకు అనుగుణంగా కథలను ఎంచుకోలేకపోవడమేనని ఫిలిం విశ్లేషకులు స్పష్టం చేస్తున్నారు. మారుతున్న ట్రెండ్‌కు తగినట్లుగా స్క్రిప్ట్ ఎంపిక లేకపోవడం.. కాలం చెల్లిన కథనాలతో సినిమాలు తీయడం వల్ల ప్రేక్షకులు థియేటర్లకు రావడం మానేశారు. దశాబ్దాలుగా నడిచిన పాత ఫార్ములాలు... రీమేక్‌లపైనే ఆధారపడటంతో ప్రేక్షకులు తీవ్ర నిరాశకు గురవుతున్నారు.

మరో ప్రధాన సమస్య ఏమిటంటే కేవలం స్టార్ పవర్‌పై ఆధారపడి బలహీనమైన స్క్రిప్టులతో సినిమాలు నిర్మించడం. ఒక అగ్ర కథానాయకుడి పేరు ఉంటే చాలు సినిమా ఆడుతుందనే భ్రమలో భారీ బడ్జెట్‌లను కేటాయించి.. కథలో భావోద్వేగాలు లేకపోవడంతో చేతులు కాల్చుకుంటున్నారు. విజువల్స్, అట్టహాసమైన సెట్లపై పెట్టిన దృష్టిని బలమైన కథ మరియు కథనాలపై పెట్టకపోవడం వల్ల ఎంత పెద్ద స్టార్ ఉన్నా ప్రేక్షకులు కంటెంట్‌ను తిరస్కరిస్తున్నారు. ఇటీవ‌ల ప్ర‌తిష్ఠాత్మ‌క‌ అమీర్ ఖాన్ ప్రొడ‌క్ష‌న్స్ నిర్మించిన బ‌ట్వారా 1947 వైఫ‌ల్యం వెన‌క జెన్ జీని మెప్పించే కంటెంట్ లేక‌పోవ‌డ‌మే కార‌ణ‌మ‌ని విశ్లేషిస్తున్నారు.

మొత్తానికి బాలీవుడ్ అగ్ర నిర్మాణ సంస్థలు ఈ సంక్షోభం నుంచి బయటపడాలంటే కేవలం పోస్టర్లపై ఉన్న పేర్లను నమ్ముకోవడం మానేసి.. సమకాలీన ప్రేక్షకుడి ఆలోచనలకు సరిపోయే కొత్తదనంతో కూడిన కథలను ఎంచుకోవాల్సి ఉంది. కంటెంట్ ఎంపికలో వస్తున్న లోపాలను సరిదిద్దుకుని.. ప్రయోగాత్మక కథాంశాలకు ప్రాధాన్యత ఇస్తేనే ఈ దిగ్గజ బ్యానర్లు తమ పూర్వ వైభవాన్ని తిరిగి సాధించి బాక్సాఫీస్ వద్ద నిలదొక్కుకోగలవ‌ని విశ్లేషిస్తున్నారు. స‌య్యారా, స్త్రీ 2, శంభాజీ, మైన్ వాప‌స్ ఆవుంగా వంటి సినిమాలు ఎందుకు ఘ‌న‌విజ‌యాలు సాధించాయో విశ్లేషించుకోవాల్సిన స‌న్నివేశం ఇప్పుడు అగ్ర నిర్మాణ సంస్థ‌ల‌కు ఉంది.