భజే వాయు వేగం ట్రైలర్: నాన్న కోసం ఎమోషనల్ యాక్షన్

కార్తికేయ గుమ్మకొండ, ఇశ్వర్యా మెనన్ జంటగా నటించిన 'భజే వాయు వేగం' సినిమా మే 31న విడుదల కానుంది. ప్రశాంత్ రెడ్డి దర్శకత్వం వహించిన ఈ యాక్షన్-ప్యాక్డ్ చిత్రాన్ని యువీ కాన్సెప్ట్స్ నిర్మిస్తుండగా, యువీ క్రియేషన్స్ సమర్పిస్తోంది. ఇక ఈ సినిమాతో ఎలాగైనా బాక్సాఫీస్ వద్ద మంచి సక్సెస్ అందుకోవాలి అని కార్తికేయ హార్డ్ వర్క్ చేస్తున్నాడు. ప్రమోషన్స్ హడావుడి కూడా మొదలైంది. RX100 అనంతరం మళ్ళీ ఆ రేంజ్ హిట్ చూడలేకపోతున్న కార్తికేయకు ఈ సినిమా హిట్టవ్వడం చాలా ముఖ్యం.

ఇక సినిమా ట్రైలర్ ను ఇటీవల విడుదల చేశారు. భారీ డబ్బుతో ఎస్కేప్ అయిన వ్యక్తిని వెతుకుతున్న దృశ్యాలతో ప్రారంభమయ్యే ట్రైలర్ లో ఒక డిఫరెంట్ పాత్రలో కార్తికేయ కనిపిస్తున్నారు. రవి శంకర్ పాత్ర భయపెడుతూ ఉండగా హీరోకు తమ్ముడు పాత్రలో రాహుల్ టైసన్ నటించారు. హీరోయిన్ పాత్రలో ఇశ్వర్యా మెనన్ కూడా ట్రైలర్ లో అక్కడక్కడా మెరిసింది.

తండ్రి ఆపరేషన్ కోసం ఎలాగైనా డబ్బు తీసుకు రావాలి అనే ఆలోచనతో హీరో పెద్ద క్రైమ్ కు పాల్పడతాడు అని తెలుస్తోంది. ఇక రౌడీలు అతన్ని వెంటాడడం మరోవైపు పోలీసుల సమస్యలు ఇలా అన్ని రకాల చాలెంజ్ ల మధ్యలో హీరో తండ్రిని ఎలా కాపాడుకున్నాడు అనే పాయింట్ హైలెట్ అవుతోంది. ఇక రాహుల్ టైసన్ పాత్ర చివరలో చెప్పిన డైలాగ్ తో సినిమాలో ఫాదర్ సెంటిమెంట్ బలంగా ఉండబోతున్నట్లు అర్ధమవుతుంది.

సినిమా పూర్తిగా వేగవంతంగా సాగుతుందని ట్రైలర్ ద్వారా తెలుస్తోంది. సమకాలీన ఎడ్జ్ ఉన్న సినిమాల్లో ఉండే అన్ని నూతన అంశాలు ఈ ఎమోషనల్ యాక్షన్ థ్రిల్లర్లో ఉన్నాయి. ఈ చిత్రానికి నెట్‌ఫ్లిక్స్ ఓటీటీ స్ట్రీమింగ్ హక్కులను సొంతం చేసుకుంది. తానికెళ్ళ భరణి పాత్ర ఒక ఎమోషనల్ బ్యాక్‌స్టోరీకి కనెక్ట్ అయ్యి ఉంది. బ్యాక్‌గ్రౌండ్ స్కోర్‌ను కపిల్ కుమార్ అందించగా, పాటలను రాధన్ స్వరపరిచారు.

ఈ చిత్ర ప్రమోషన్స్ లలో లెజెండరీ చిరంజీవి, సూపర్‌స్టార్ మహేష్ బాబు ఒక హ్యాండ్ వేయడంతో మరింత బజ్ పెరిగింది. దర్శకుడు ప్రశాంత్ గురువు సుజీత్ (సాహో, రన్ రాజా రన్ ఫేం) కూడా ఒక ఇంటరాక్టివ్ సెషన్ షేర్ చేశారు. IPL మ్యాచ్ సమయంలో కూడా చిత్ర ప్రమోషన్లు జరిగినట్లు సమాచారం. సినిమా విజయంపై పూర్తి విశ్వాసంతో, నిర్మాతలు హీరో సినిమాకు సంబంధించిన కంటెంట్ మీద మంచి హైప్ క్రియేట్ చేయడానికి ఏమాత్రం వెనకాడడం లేదు. ఈ ప్రయత్నాలు సినిమా అంచనాలను అధిగమించి, బాక్సాఫీస్ వద్ద విజయాన్ని అందుకుంటుందో లేదో చూడాలి.