గ్యాంగ్స్ ఆఫ్ గోదావరి.. రంగంలోకి స్టార్ హీరో

విభిన్న కథలతో మూవీస్ చేస్తూ తనదైన శైలిలో నటుడిగా ఇమేజ్ బిల్డ్ చేసుకుంటున్న యాక్టర్ విశ్వక్ సేన్. అతను నటించిన గ్యాంగ్స్ ఆఫ్ గోదావరి మూవీ మే 31న థియేటర్స్ లోకి వస్తోంది. కృష్ణ చైతన్య దర్శకత్వంలో తెరకెక్కిన ఈ సినిమాని సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ సంయుక్తంగా నిర్మించాయి. విశ్వక్ సేన్ కెరియర్ లో గోదావరి బ్యాక్ డ్రాప్ లో చేస్తోన్న సినిమా గ్యాంగ్స్ ఆఫ్ గోదావరి.

అంతకు ముందు అశోకవనంలో అర్జున కళ్యాణం అనే సినిమా చేశాడు. అయితే ఆ సినిమాలో తెలంగాణ యువకుడిగా నటించాడు. గ్యాంగ్స్ ఆఫ్ గోదావరి మూవీలో మాత్రం పక్కా గోదావరి యువకుడిగా, మాస్ లీడర్ గా విశ్వక్ సేన్ కనిపించబోతున్నాడు. శనివారం రిలీజ్ అయిన గ్యాంగ్స్ ఆఫ్ గోదావరి మూవీ ట్రైలర్ కి ఫుల్ పాజిటివ్ రెస్పాన్స్ వచ్చింది. కచ్చితంగా విశ్వక్ సేన్ కెరియర్ లో బెస్ట్ మూవీ అవుతుందని చిత్ర యూనిట్ భావిస్తోంది.

ఇప్పటికే ఈ సినిమా ప్రమోషన్స్ ని స్ట్రాంగ్ గా చేస్తున్నారు. గ్యాంగ్స్ ఆఫ్ గోదావరి ప్రీరిలీజ్ ఈవెంట్ మే 28న జరగనుంది. ఈ ఈవెంట్ కి నందమూరి నటసింహం బాలకృష్ణ చీఫ్ గెస్ట్ గా హాజరుకాబోతున్నారు. ఈ విషయాన్ని విశ్వక్ సేన్ ట్రైలర్ రిలీజ్ ఈవెంట్ గా పరోక్షంగా కన్ఫర్మ్ చేశారు. ప్రస్తుతం బాలకృష్ణ సితార ఎంటర్టైన్మెంట్స్ లో బాబీ దర్శకత్వంలో సినిమా చేస్తున్నారు. ఈ మూవీ షూటింగ్ స్టేజ్ లో ఉంది.

అలాగే విశ్వక్ షేన్ అంటే బాలయ్యకి ప్రత్యేకమైన అభిమానం ఉంది. ఈ కారణంగానే ప్రీరిలీజ్ ఈవెంట్ కి ఇన్వైట్ చేయగానే బాలకృష్ణ వస్తానని మాట ఇచ్చారంట. బాలకృష్ణ ఈ ప్రీరిలీజ్ ఈవెంట్ లో పాల్గొంటే నందమూరి అభిమానులు భారీ సంఖ్యలో హాజరయ్యే అవకాశం ఉంది. విశ్వక్ సేన్ ని తారక్ అభిమానులకి విపరీతంగా ఫాలో అవుతారు. అతని సినిమాలని సోషల్ మీడియాలో ప్రమోట్ చేస్తూ ఉంటారు.

బాలయ్య బాబు ఇప్పుడు గ్యాంగ్స్ ఆఫ్ గోదావరి ప్రీరిలీజ్ కి రానున్న నేపథ్యంలో నందమూరి ఫ్యాన్స్ ఈ సినిమాని చూడటానికి ఆసక్తి చూపించే అవకాశం ఉంటుంది. ట్రైలర్ తో మూవీ పైన మంచి బజ్ క్రియేట్ అయ్యింది. ఇప్పుడు బాలకృష్ణ ఇమేజ్ ఈ సినిమా ప్రమోషన్స్ కి తోడైతే భారీ ఓపెనింగ్స్ రావడానికి అవకాశం ఉంటుందని సినీ విశ్లేషకులు అంచనా వేస్తున్నారు. గ్యాంగ్స్ ఆఫ్ గోదావరి చిత్రంలో విశ్వక్ సేన్ కి జోడీగా నేహా శెట్టి నటిస్తోంది, అంజలి కీలక పాత్రలో కనిపించబోతోంది. సినిమాలో యువన్ శంకర్ రాజా మ్యూజిక్ తో వచ్చిన రెండు సాంగ్స్ కి ఇప్పటికే అద్భుతమైన రెస్పాన్స్ వచ్చింది.