పూరీ - 'ఫైటర్' పై విజయ్ దేవరకొండ కామెంట్స్...!

సెన్సేషనల్ స్టార్ విజయ్ దేవరకొండ డాషింగ్ డైరెక్టర్ పూరీ జగన్నాథ్ దర్శకత్వంలో 'ఫైటర్' అనే వర్కింగ్ టైటిల్ తో సినిమా చేస్తున్న సంగతి తెలిసిందే. ఇది పూరీ - విజయ్ ఇద్దరికీ మొదటి పాన్ ఇండియా ప్రాజెక్ట్ అని చెప్పవచ్చు. ఈ సినిమా కోసం విజయ్ దేవరకొండ భారీ వర్కౌట్స్ చేయడంతో పాటు కఠినమైన శిక్షణ తీసుకున్నాడని తెలుస్తోంది. తాజాగా విజయ్ 'ఫైటర్' సినిమా మరియు పూరీ జగన్నాథ్ ల గురించి చెప్పుకొచ్చాడు. ''నేను ఈ సినిమా కోసం గత 8 నెలలు వర్కౌట్స్ చేశాను. అయితే ఈ మధ్య మోటివేషన్ కోల్పోయాను. మళ్ళీ ఇప్పుడు నాన్-స్టాప్ వర్కౌట్స్ కంటిన్యూ చేయాల్సి వచ్చింది. నేను ఈ మూవీలో ఒక ఫైటర్ పాత్రను పోషిస్తున్నాను. అది 6 ప్యాక్ లేదా 8 ప్యాక్ అయినా నేను ఒకరిని మట్టికరిపించగల పోరాట యోధుడిలా కనిపించాలి'' అని విజయ్ దేవరకొండ అన్నారు.

''ఇది మనం చూస్తూ వస్తున్న రెగ్యులర్ కమర్షియల్ ఎంటర్టైనర్ కాదు. నా తరహాలో ఉండే కమర్షియల్ సినిమా అవుతుంది. నేను ఈ స్క్రిప్ట్ విన్నప్పుడే.. కమర్షియల్ జోనర్ లో ఇలాంటి సినిమానే చేయాలనుకున్నాను. అయితే కమర్షియల్ సెన్సిబిలిటీలకు పేరుగాంచిన డైరెక్టర్ వల్ల ఈ చిత్రానికి మరింత కమర్షియల్ బ్యాకింగ్ లభించింది'' అని విజయ్ తెలిపారు. డైరెక్టర్ పూరీ జగన్నాథ్ గురించి మాట్లాడుతూ.. ''ఆయన నా ఫేవరేట్ డైరెక్టర్. ఆయన డైరెక్ట్ చేసిన సినిమాలలో 'పోకిరి' చాలా ఇష్టం'' అని విజయ్ దేవరకొండ అన్నారు. కాగా, ఈ సినిమాతో బాలీవుడ్ బ్యూటీ అనన్య పాండే టాలీవుడ్ కి పరిచయం అవుతోంది. సీనియర్ నటి రమ్యకృష్ణ కీలక పాత్రలో కనిపించనున్నారు. పూరీ కనెక్ట్స్ బ్యారర్ ఫై పూరీ - ఛార్మీ ఈ చిత్రాన్ని నిర్మిస్తున్నారు. బాలీవుడ్ ప్రొడ్యూసర్ కరణ్ జోహార్ కూడా ఈ చిత్ర నిర్మాణంలో భాగస్వామిగా ఉన్నారు. ఇప్పటికే ముంబైలో భారీ షెడ్యూల్ షూటింగ్ జరుపుకున్న ఈ సినిమాని కోవిడ్‌ నిబంధనలు పాటిస్తూ తిరిగి స్టార్ట్‌ చేసే ఆలోచన చేస్తున్నారు.