‘చిన్నవాడా..’లో ఆమె చేయదనుకున్నాడట

‘ఎక్కడికి పోతావు చిన్నవాడా’లో హెబ్బా పటేల్ తో పాటు తమిళ హీరోయిన్ నందిత శ్వేత కథానాయికలుగా నటిస్తున్న సంగతి ముందు నుంచి తెలుసు. ఐతే వాళ్లు మాత్రమే హీరోయిన్లు అనుకుని సినిమాకు వెళ్లిన వాళ్లకు.. అవికా గోర్ రూపంలో సర్ప్రైజ్ ఎదురైంది. నిడివి తక్కువే అయినా.. కీలకమైన పాత్రలో ఆకట్టుకుంది అవికా. ఐతే ఈ పాత్రను ముందు స్వాతికి ఆఫర్ చేయగా.. ఆమె నో చెప్పినట్లుగా వార్తలొచ్చాయి. అందులో వాస్తవమెంతో కానీ.. అవికా అసలు ఈ పాత్ర ఒప్పుకుంటుందా అని సందేహించాడట దర్శకుడు వీఐ ఆనంద్. ‘ఎక్కడికి పోతావు చిన్నవాడా’ థ్యాంక్స్ మీట్లో మాట్లాడుతూ ఆనంద్ ఈ విషయం చెప్పాడు.

‘‘అవికాను ఈ పాత్రకు అడుగుదాం అనుకున్నపుడు.. ఈ క్యారెక్టర్ లెంగ్త్ పది నిమిషాలే కాబట్టి తను ఒప్పుకోకపోవచ్చని కొందరు అన్నారు. నేను కూడా సందేహించాను. కానీ అవికా మాత్ర క్యారెక్టర్ గురించి చెప్పగానే.. లెంగ్త్ గురించి ఆలోచించకుండా ఈ సినిమా చేస్తానని ఒప్పుకుంది. అవికాతో పాటు ఆమె తండ్రి నాకిచ్చిన సపోర్ట్ ను మరిచిపోలేను. సినిమాలో ముందు చిత్రీకరించింది అవికా ఎపిసోడే. సినిమాకు అది హైలైట్ గా నిలిచింది. ‘ఎక్కడికి పోతావు చిన్నవాడా’ సినిమాను ఎప్పటికీ మరిచిపోలేను. ఇది నా మనసుకు నచ్చిన సినిమా. దీని కోసం మూడేళ్ల పాటు కష్టపడ్డాను. ఎన్నోసార్లు రీరైట్ చేసి.. పకడ్బందీగా స్క్రిప్టు తీర్చిదిద్దాను. 2000వ సంవత్సరంలో నేను సినీ పరిశ్రమలోకి వచ్చాను. ఎంతో కష్టపడ్డాను. ఎన్నో త్యాగాలు చేశాను. వాటన్నింటికీ ఇప్పుడు సరైన ఫలితం దక్కినట్లుంది. నిఖిల్ కథ చెప్పగానే నమ్మి సినిమా చేశాడు. తనే నిర్మాతను సెట్ చేశాడు. అందరూ నాకెంతగానో సహకరించారు’’ అని ఆనంద్ తెలిపాడు.

Like Us on Facebook : https://www.facebook.com/Tupakidotcom/