వెంకటేష్ గాత్రంతో శ్రీనివాస కళ్యాణం!

దిల్ రాజు బ్యానర్ పై 'శతమానం భవతి' స్టైల్ లో సతీష్ వేగేశ్న తెరకెక్కించిన ఫ్యామిలీ ఎంటర్టైనర్ 'శ్రీనివాస కళ్యాణం'.  నితిన్ - రాశి ఖన్నాలు జంటగా నటించిన ఈ సినిమా ఆగష్టు 9 న ప్రేక్షకుల ముందుకు రానుంది.  ఇప్పటికే రిలీజ్ అయిన టీజర్ - ట్రైలర్లు - ఆడియో సినిమా ఓ క్లీన్ ఫ్యామిలీ ఎంటర్టైనర్ గా ఉండబోతోందని, సూరజ్ బరజాత్య సినిమాల తరహాలో ఈ సినిమా ఓ మ్యారేజ్ సెలబ్రేషన్ అనే ఇండికేషన్స్ ఇచ్చాయి. 

ఈ సినిమాకు సంబంధించిన ఓ తాజా అప్డేట్ ఈమధ్యే బయటకు వచ్చింది.  ఈ సినిమాకు సీనియర్ హీరో విక్టరీ వెంకటేష్ వాయిస్ ఓవర్ ఇస్తున్నాడట.  అంటే వెంకటేష్ గాత్రంతో 'శ్రీనివాస కళ్యాణం' ప్రేక్షకుల ముందుకు రానుందన్నమాట.  ఇప్పటికే మంచి బజ్ ఉన్న ఈ సినిమాకు వెంకటేష్ వాయిస్ ఓవర్ ఓ అదనపు ఆకర్షణ. ఈ సినిమా ట్రైలర్ ను ఇప్పటికే మహేష్ బాబు చేతుల మీదుగా రిలీజ్ చేయించిన విషయం తెలిసిందే. పైగా సినిమా రిలీజ్ కూడా మహేష్  పుట్టిన రోజున కావడం విశేషం.

ఇప్పుడు మహేష్ తో పాటు వెంకటేష్ టచ్ కూడా ఇచ్చారు.  మరి ఈ సినిమాతో దిల్ రాజు - సతీష్ వేగేశ్నలు బ్యాక్ టు బ్యాక్ ఫ్లాపులతో సతమతమౌతున్న యంగ్ హీరో నితిన్ కు మంచి హిట్ అందిస్తారో లేదో వేచి చూడాలి.  'శ్రీనివాస కళ్యాణం' కూడా మరో 'శతమానం భవతి అవుతుందా లేదా అని తెలియాలంటే ఆగష్టు 9 వరకూ వేచి చూడాలి.