త్రివిక్రమ్ నెక్స్ట్ మూవీ ఏ సినిమాకి ఇన్స్పిరేషన్ గా ఉండబోతోంది...?

ప్రస్తుతం టాలీవుడ్ లో టాప్ డైరెక్టర్లలో త్రివిక్రమ్ శ్రీనివాస్ ఒకరు. రచయితగా సినీ ఇండస్ట్రీలో అడుగు పెట్టిన త్రివిక్రమ్ మంచి రైటర్ గా గుర్తింపు పొందాడు. సినిమాలో విషయం ఉన్నా లేకున్నా కేవలం తన మాటలతోనే సినిమాను నిలబెట్టిన సందర్భాలు చాలానే ఉన్నాయి. సినిమాల్లో ఆయన మాటలకి ఎంత క్రేజ్ ఉందో బయట ఆయన మాట్లాడే మాటలకు కూడా అంతే క్రేజ్ ఉంటుంది. అందుకే త్రివిక్రమ్ ని ఆయన అభిమానులు 'మాటల మాంత్రికుడు' అని పిలుస్తూ ఉంటారు. రచయితగా కెరీర్ ప్రారంభించిన త్రివిక్రమ్ 'నువ్వే నువ్వే' చిత్రం ద్వారా దర్శకుడిగా మారిన సంగతి తెలిసిందే. 'అతడు' 'అత్తారింటికి దారేది' 'జల్సా' 'అ ఆ' 'అరవింద్ సమేత వీర రాఘవ' వంటి విజయవంతమైన చిత్రాలను తెలుగు ప్రేక్షకులకు అందించారు. ఈ ఏడాది సంక్రాంతి ప్రారంభంలో రిలీజైన 'అల వైకుంఠపురంలో' సినిమాతో మంచి సక్సెస్ అందుకున్నాడు.

అయితే సక్సెస్ ఫుల్ డైరెక్టర్ గా ఇండస్ట్రీలో కొనసాగుతున్న త్రివిక్రమ్ పై ఒక అపవాదు ఉంది. ఈయన హాలీవుడ్ సినిమాల నుండి స్టోరీలను సీన్స్ కాపీ చేస్తుంటాడని సోషల్ మీడియాలో చర్చ జరుగుతూ ఉంటుంది. చాలామంది దర్శకులు తమ సినిమాలకు ఎక్కడో ఒకచోట ప్రేరణలు పొందుతూ ఉంటారన్న సంగతి తెలిసిందే. అది స్టోరీ లైన్ కావచ్చు... యాక్షన్ ఎపిసోడ్ కావచ్చు.. కామెడీ సీన్ కావచ్చు. అయితే మిగతా దర్శకుల కంటే ఈ విషయంలో మాటల మాంత్రికుడు త్రివిక్రమ్ వైపే అందరూ వేలెత్తి చూపిస్తుంటారు. నిజానికి త్రివిక్రమ్ దర్శకత్వం వహించిన ప్రతి సినిమాకు లేదా సినిమాలోని సీన్స్ కి దాదాపుగా ఏదో ఒక సినిమా అనుకరణ అంటూ విమర్శలు వస్తూనే ఉంటాయి. 'అ ఆ' యద్దనపూడి 'మీనా' కథకు కాపీ అని.. 'సన్నాఫ్ సత్యమూర్తి' హాలీవుడ్ మూవీకి ఇన్స్పిరేషన్ అని.. 'అజ్ఞాతవాసి' ఫ్రెంచ్ మూవీ 'లార్గో వించ్' కాపీ అని కామెంట్స్ చేస్తూ ఉంటారు. 'లార్గో వించ్' కూడా నా సినిమాని కాపీ చేసారని.. లీగల్ గా ప్రొసీడ్ అవుతానని చెప్పడంతో అప్పట్లే త్రివిక్రమ్ పై పెద్ద చర్చే జరిగింది. అంతేకాకుండా లేటెస్ట్ గా వచ్చిన 'అల వైకుంఠపురములో' మూవీ కూడా ఎన్టీఆర్ నటించిన 'ఇంటి గుట్టు' సినిమాని పోలి ఉంటుందని కామెంట్స్ కూడా వినిపించాయి.

దీనికి తోడు ప్రస్తుతం అందరూ లాక్ డౌన్ పాటిస్తున్న నేపథ్యంలో టైంపాస్ కోసం ఆ సినిమా ఈ సినిమా.. ఆ భాష ఈ భాష అంటూ తేడా లేకుండా ప్రతి సినిమా చూసేస్తున్నారు. ఇంతవరకు బాగానే ఉన్నా కొందరైతే కొన్ని పాత సినిమాలను.. ఇతర లాంగ్వేజ్ సినిమాలను చూసి ఆ సినిమాలోని పలానా సీన్ పాత సినిమాకు కాపీ అంటూ కామెంట్స్ చేస్తున్నారు. ఆ సినిమాల దర్శకులను టార్గెట్ చేస్తూ సోషల్ మీడియాలో మీమ్స్ క్రియేట్ చేస్తున్నారు. ఈ నేపథ్యంలో త్రివిక్రమ్ సినిమాలోని కాపీ సీన్స్ అన్నిటిని బయటకి తీశారు. నిజానికి త్రివిక్రమ్ చేసేది కాపీ కాదని 'త్రివిక్రమైజేషన్' అని అని కొంత మంది నెటిజన్లు అంటూ ఉంటారు. 'అతడు' సినిమాలో హీరో ఎస్కేప్ సీన్ - క్లైమాక్స్ ఫైట్.. 'జల్సా'లో పవన్ - ప్రకాష్ రాజ్ మధ్య వచ్చే సీన్.. 'ఖలేజా' సినిమాలో ఇరీడియమ్ టెస్టింగ్ సీన్.. 'అత్తారింటికి దారేది'లో ఆకులు రాలే సీన్.. 'అరవింద సమేత'లో మొండి కత్తి సీన్.. 'జులాయి' సినిమాలో బ్యాంకు రాబరీ సీన్ అండ్ విలన్ కార్ చేజింగ్ సీన్ ఇలా ప్రతి సినిమా నుండి ఒక సీన్ కి హాలీవుడ్ మూవీ సీన్స్ తో కంపేర్ చేసి పోస్ట్ చేస్తున్నారు.

ఈ నేపథ్యంలో త్రివిక్రమ్ నెక్స్ట్ మూవీ ఏ సినిమాకి ఇన్స్పిరేషన్ గా ఉండబోతోంది అని డిస్కషన్ చేసుకుంటున్నారు నెటిజన్స్. త్రివిక్రమ్ తన తదుపరి సినిమాని ఎన్టీఆర్ తో తీయబోతున్నట్లు అనౌన్స్ చేసిన సంగతి తెలిసిందే. ఈ సినిమాలో అయినా అనుకరణ సీన్స్ లేకుండా చూసుకుంటే బాగుంటుందని త్రివిక్రమ్ కి సలహా ఇస్తున్నారు. కాగా ఎన్టీఆర్ - త్రివిక్రమ్ సినిమాకి 'అయిననూ పోయి రావలె హస్తినకు' అనే టైటిల్ ప్రచారంలో ఉంది. ఎన్టీఆర్ కెరీర్లో 30వ మూవీగా తెరకెక్కుతున్న ఈ సినిమాని హారిక అండ్ హాసిని ఎంటెర్టైమెంట్స్ మరియు ఎన్టీఆర్ ఆర్ట్స్ సంయుక్తంగా నిర్మిస్తున్నారు.