ఎక్స్‌క్లూజివ్‌: 'Rx100' హీరోతో సుకుమార్ సినిమా..!

ప్రముఖ దర్శకుడు సుకుమార్ ప్రొడ్యూసర్ గా మారి సుకుమార్ రైటింగ్స్ బ్యానర్ పై సినిమాలు కూడా నిర్మిస్తున్న సంగతి తెలిసిందే. ఈ క్రమంలో జీఏ 2 పిక్చర్స్ బన్నీ వాసుతో కలిసి సుకుమార్ '18 పేజెస్' అనే సినిమా రూపొందిస్తున్నాడు. నిఖిల్ - అనుపమ పరమేశ్వరన్ హీరోహీరోయిన్లుగా పల్నాటి సూర్య ప్రతాప్ దర్శకత్వంలో ఈ సినిమా తెరకెక్కుతోంది. ఈ నేపథ్యంలో ఇప్పుడు మరోసారి సుకుమార్ రైటింగ్స్ - జీఏ 2 పిక్చర్స్ సంస్థలు కలసి ఓ సినిమా నిర్మించడానికి సన్నాహాలు జరుగుతున్నాయని విశ్వసనీయ వర్గాల సమాచారం.

'Rx100' ఫేమ్ కార్తికేయ హీరోగా జీఏ 2 పిక్చ‌ర్స్ మరియు సుకుమార్ రైటింగ్స్ పతాకాలపై బన్నీ వాస్ - సుకుమార్ కలిసి ఓ సినిమా చేయనున్నారట. దీనికి మెగా ప్రొడ్యూసర్ అల్లు అరవింద్ సమర్పకులుగా వ్యవహరిస్తారని తెలుస్తోంది. యువ హీరో కార్తికేయ ఆల్రెడీ జీఏ 2 పిక్చ‌ర్స్ బ్యానర్ లో 'చావు కబురు చల్లగా' అనే సినిమా చేస్తున్న సంగతి తెలిసిందే. కొత్త దర్శకుడు పెగళ్ళపాటి కౌశిక్ తెరకెక్కిస్తున్న ఈ సినిమా మార్చి 19న ప్రేక్షకుల ముందుకు రానుంది. ఈ క్రమంలో కార్తికేయతో మరో సినిమా చేయాలని ప్లాన్ చేసుకున్న బన్నీ వాస్.. సుకుమార్ రైటింగ్స్ తో కలిసి ఈ ప్రాజెక్ట్ ని సెట్స్ పైకి తీసుకెళ్తున్నారని తెలుస్తోంది. ఈ చిత్రాన్ని న‌వంబ‌ర్ నుంచి ప్రారంభించనున్నట్లు సమాచారం. మరి ఈ చిత్రానికి దర్శకుడు, ఇతర నటీనటులు, సాంకేతిక నిపుణుల వివరాలు తెలియాల్సి ఉంది.