ఎన్టీఆర్ సినిమాలో శివగామి...?

యంగ్ టైగర్ ఎన్టీఆర్ - త్రివిక్రమ్ శ్రీనివాస్ కాంబినేషన్ లో ఓ మూవీ తెరకెక్కనున్న సంగతి తెలిసిందే. హారిక అండ్ హాసిని క్రియేష‌న్స్‌ మరియు ఎన్టీఆర్ ఆర్ట్స్ బ్యాన‌ర్స్‌ పై రాధాక‌ష్ణ‌ (చినబాబు) - నంద‌మూరి క‌ల్యాణ్‌ రామ్ సంయుక్తంగా ఈ చిత్రాన్ని నిర్మించనున్నారు. ఎన్టీఆర్ కెరీర్లో 30వ సినిమాగా రానున్న ఈ చిత్రానికి 'అయినను పోయి రావలె హస్తినకు' అనే టైటిల్ ప్రచారంలో ఉంది. తారక్ 'ఆర్.ఆర్.ఆర్' షూటింగ్ కంప్లీట్ చేసిన వెంటనే ఈ సినిమాని స్టార్ట్ చేస్తాడని తెలుస్తోంది. ఈ గ్యాప్ లో లీడ్ యాక్టర్స్ ని ఫైనలైజ్ చేసే పనిలో ఉన్న మేకర్స్.. ఓ కీలకమైన పాత్ర కోసం సీనియర్ నటి రమ్యకృష్ణ ని సంప్రదిస్తున్నారని తెలుస్తోంది.

కాగా, త్రివిక్రమ్ శ్రీనివాస్ తన సినిమాల్లో బలమైన లేడీ పాత్రలను క్రియేట్ చేస్తుంటాడనే విషయం తెలిసిందే. హీరోయిన్ తో పాటు ఇతర ఫిమేల్ రోల్స్ కూడా కథలో కీలకంగా ఉండేలా రాసుకుంటాడు. ఈ మధ్య అలాంటి క్యారక్టర్స్ లో సీనియర్ హీరోయిన్స్ ని నటింపజేస్తూ దానికి మరింత హుందాతనం తీసుకొచ్చే ప్రయత్నం చేస్తున్నాడు. 'అత్తారింటికి దారేది' 'అ ఆ' సినిమాలలో నదియా.. 'సన్నాఫ్ సత్యమూర్తి'లో స్నేహ.. 'అజ్ఞాతవాసి' మూవీలో సీనియర్ నటి ఖుష్బూ.. 'అరవింద సమేత వీర రాఘవ' సినిమాలో దేవయాని.. 'అల వైకుంఠపురంలో' సినిమాలో టబు పాత్రలు అందుకు ఉదాహరణగా చెప్పుకోవచ్చు.

ఈ క్రమంలో తన నెక్స్ట్ సినిమాలో కూడా అలాంటి పవర్ ఫుల్ ఫిమేల్ క్యారక్టర్ ని డిజైన్ చేస్తున్నట్లు తెలుస్తోంది. దీని కోసం రమ్యకృష్ణ అయితే బాగుంటుందని మేకర్స్ భావిస్తున్నారట. 'బాహుబలి' సినిమాతో దేశవ్యాప్తంగా శివగామిగా పిలవబడుతున్న రమ్యకృష్ణ.. మళ్ళీ ఫార్మ్ లోకి వచ్చింది. ఈ క్రమంలో ఎన్టీఆర్ సినిమాలో నటించడానికి ఆసక్తి చూపిస్తున్నట్లు తెలుస్తోంది. గతంలో ఎన్టీఆర్ 'సింహాద్రి' సినిమాలో ఐటెం సాంగ్ కి స్టెప్పులేసిన రమ్యకృష్ణ.. 'నా అల్లుడు' సినిమాలో అత్త క్యారక్టర్ లో కనిపించింది. మరోసారి వీరు తెరపై కనిపిస్తారేమో చూడాలి.