కట్టప్పను కూడా వదల్లేదుగా..

ఓ తమిళ హీరోకు తెలుగులో కాస్త పేరు వచ్చిందంటే చాలు.. వరుసగా ఆ హీరో తన సొంత భాషలో చేసిన సినిమాలన్నింటినీ అనువదించడం మొదలుపెట్టేస్తారు మన డబ్బింగ్ నిర్మాతలు. ఐతే ఇప్పటిదాకా ఇది హీరోల వరకే పరిమితమయ్యేది. ఇప్పుడు క్యారెక్టర్ ఆర్టిస్టుల విషయంలోనూ ఇదే పద్ధతి ఫాలో అయిపోతున్నారు. మిర్చి.. బాహుబలి.. నేను శైలజ లాంటి సినిమాలతో తెలుగు ప్రేక్షకులకు బాగా చేరువైపోయిన సీనియర్ నటుడు సత్యరాజ్ ప్రధాన పాత్ర పోషించిన ఓ సినిమాను తెలుగులోకి తేబోతున్నారు. ఆ సినిమానే.. దొర. తమిళంలో ‘జాక్సన్ దురై’ పేరుతో తెరకెక్కిన సినిమా ఇది.

‘జాక్సన్ దురై’ అని గూగుల్లో కొట్టి ఆ సినిమా పోస్టర్ చూస్తే షాకవడం ఖాయం. ఎందుకంటే హాలీవుడ్ సినిమాల్లో దయ్యాల్ని తలపించేలా భయంకరమైన అవతారంలో కనిపిస్తాడు సత్యరాజ్. ‘జాక్సన్ దురై’ హార్రర్ కామెడీ జానర్లో తెరకెక్కుతున్న సినిమా. అందుకే సత్యరాజ్ ఇలా తయారయ్యాడు. విశేషం ఏంటంటే ఈ సినిమాలో సత్యరాజ్ కొడుకు శిబిరాజ్ హీరో. తెలుగమ్మాయి బిందుమాధవి హీరోయిన్ గా నటించింది. ధరణీధరన్ దర్శకత్వం వహించాడు. ఏడాదిన్నర కిందటే మొదలైన ఈ సినిమా అనివార్య కారణాల వల్ల ఆలస్యమవుతూ వస్తోంది. త్వరలోనే విడుదలవుతున్న ఈ సినిమాను.. సత్యరాజ్ కు తెలుగులో ఉన్న క్రేజ్ చూసుకుని తెలుగు లోనూ రిలీజ్ చేయబోతున్నారు. మరి మన ప్రేక్షకులు ఈ చిత్రంపై ఏమాత్రం ఆసక్తి ప్రదర్శిస్తారో చూడాలి.