బౌలర్ కీర్తి.. ఫీల్డర్ మహేశ్.. వికెట్ కీపర్ పరశురామ్

ఇప్పుడు నడుస్తున్న ఐపీఎల్ సీజన్ కు తగ్గట్లే.. జరిగే కార్యక్రమాల్లోనూ.. వేడుకల్లోనూ క్రికెట్ ప్రస్తావన తీసుకురావటం కనిపిస్తుంది. అంతదాకా ఎందుకు? ఐపీఎల్ మ్యాచులు జరిగే టైంలో ఎవరు ఎక్కడ ఉన్నా.. ఏ వేడుకలో ఉన్నా.. చేతిలోని మొబైల్ తో మ్యాచ్ ఏమవుతోంది? స్కోర్ బోర్డు సంగతేమిటన్నవిషయాన్ని ఎప్పటికప్పుడు తెలుసుకోవటం కనిపిస్తుంటుంది.

శనివారం హైదరాబాద్ లోని కోట్ల విజయభాస్కర్ రెడ్డి ఇండోర్ స్టేడియంలో ‘సర్కారు వారి పాట’’ ప్రీరిలీజ్ ఈవెంట్ జరిగిన విషయం తెలిసిందే. ఈసందర్భంగా ఈ సినిమాకు సంగీత దర్శకుడిగా వ్యవహరించిన తమన్ ప్రత్యేక ఆకర్షణగా నిలిచారు. తన పాటలతో ఇప్పటికే మెస్మరైజ్ చేస్తున్నఆయన చేతికి మైక్ ఇచ్చిన వేళ.. ఆయన మాట్లాడే సమయంలో  ప్రముఖ యాంకర్ సుమతో తకిట తకిట విత్ తమన్ పేరుతో చిట్ చాట్ చేశారు. ఈ సందర్భంగా సుమ ఆసక్తికర అంశాన్ని తమన్ ను అడిగింది.

సినిమా టీంలోని సభ్యులతో క్రికెట్ టీంను తయారు చేస్తే.. ఎవరికి ఏమేం ప్లేసులు ఇస్తారని ప్రశ్నించింది సుమ. దీనికి బదులిచ్చిన తమన్.. బౌలర్ గా కీర్తి సురేశ్ ను ఎంపిక చేస్తానని చెప్పారు. దీనికి స్పందించిన సుమ.. ఆమె బౌలింగ్ కు ఎవరైనా ఔట్ కావాల్సిందేనా? అని అడగ్గా.. ‘అవును.. తన యాక్షన్ తో బాగా నమ్మించేసింది’ అని బదులిచ్చారు. వికెట్ కీపర్ గా డైరెక్టర్ పరశురామ్ ను ఎంపిక చేస్తానని.. సూపర్ స్టార్ మహేశ్ బాబును ఫీల్డర్ గా పేర్కొన్నారు. ఎటు నుంచి వచ్చిన బౌల్ ను అయినా పట్టుకునే ఒక కెప్టెన్ అని.. అది మహేశ్ బాబుగా ఆయన పేర్కొన్నారు. మొత్తానికి ఫీల్డర్ అంటూనే.. మహేశ్ బాబును కెప్టెన్ చేసేసిన తమన్ చాతుర్యానికి చప్పట్లు కొట్టాల్సిందే.