మరో సంచలన స్టార్‌ బయోపిక్‌

బాలీవుడ్‌ - టాలీవుడ్‌ అనే తేడా లేకుండా అన్ని వుడ్‌ లలో కూడా ప్రస్తుతం బయోపిక్‌ ల ట్రెండ్‌ నడుస్తోంది. ప్రముఖ సినీ తారలు - రాజకీయ ప్రముఖులు - క్రీడాకారుల జీవిత చరిత్రల ఆధారంగా ఇప్పటికే సినిమాలు వచ్చాయి. ఇంకా కూడా ప్రేక్షకుల ముందుకు వచ్చేందుకు కొన్ని బయోపిక్‌ లు సిద్దం అవుతున్నాయి. క్రీడారంగంకు చెందిన ప్రముఖుల బయోపిక్‌ లకు మంచి రెస్పాన్స్‌ వస్తుంది. ఆ కారణంగానే వరుసగా స్పోర్ట్స్‌ స్టార్స్‌ బయోపిక్‌ లు వస్తున్నాయి.

ప్రస్తుతం పీవీ సింధు - సైనా నెహ్వాల్‌ ల బయోపిక్‌ లు రూపొందుతున్నాయి. ఇదే కోవలో టెన్నీస్‌ స్టార్‌ సానియా మీర్జా బయోపిక్‌ ను నిర్మించేందుకు రంగం సిద్దం అయ్యింది. సానియా బయోపిక్‌ తీసే హక్కులను రోనీ స్క్రూవాలా పొందింది. ప్రస్తుతం ప్రీ ప్రొడక్షన్‌ వర్క్‌ జరుగుతుంది. త్వరలోనే సినిమా గురించిన అధికారిక ప్రకటన చేసేందుకు సిద్దం అవుతున్నారు. సానియా మీర్జా బాల్యం మరియు టెన్నీస్‌ స్టార్‌ గా ఎదిగిన తీరు - ఆ తర్వాత పాకిస్తానీ క్రికెటర్‌ తో ప్రేమ - వివాహం వంటి ఘట్టాలను డ్రమటిక్‌ గా చూపించబోతున్నారట. సానియా మీర్జాగా ఎవరు నటిస్తారనే విషయంపై క్లారిటీ రావాల్సి ఉంది.

త్వరలోనే అన్ని వివరాలతో రోని స్క్రూవాలా నుండి ప్రకటన రాబోతుంది. ఇండియాలో టెన్నీస్‌ కు ప్రస్తుతం ఈ స్థాయి గుర్తింపు రావడానికి ఖచ్చితంగా ప్రధాన కారణంగా సానియా మీర్జా అనడంలో సందేహం లేదు. చిన్న వయసు నుండే తన రాకెట్‌ తో దేశానికి పేరు తెచ్చే విజయాలను సొంతం చేసుకున్న సానియా మీర్జా బయోపిక్‌ కోసం ఆమె అభిమానులు ఎంతో ఆసక్తిగా ఎదురు చూస్తున్నారు. వచ్చే ఏడాదికి ఈమె బయోపిక్‌ ప్రేక్షకుల ముందుకు వచ్చే అవకాశం ఉంది.