హీరోయిన్ క్యారెక్టర్ విషయంలో లెక్కలు తప్పకూడదు మాస్టర్..!

ఒకప్పుడు సుకుమార్ అంటేనే మనకు గుర్తొచ్చేది లాజిక్కులు, లెక్కలు. అందుకే ఆయనను ముద్దుగా లెక్కల మాస్టర్ అని పిలుస్తుంటారు. కథలో ఎన్నో చిక్కులు పెట్టి, వాటిని ఆసక్తికరంగా ప్రేక్షకులకు అర్థమయ్యేలా చెప్పడం ఆయన ప్రత్యేకత. ఒకప్పుడు రాజమౌళి కూడా సుకుమార్.. మాస్ సినిమాల వైపు వస్తే తమ పరిస్థితి ఏమిటని సరదాగా వ్యాఖ్యానించారు. ఆయన క్యారెక్టర్లు అన్నీ కూడా లాజిక్కులతో రాస్తారు. అలాంటి సుకుమార్ హీరోయిన్ క్యారెక్టర్ విషయంలో మాత్రం చాలాసార్లు లెక్కలు తప్పడనే చెప్పాలి.

రామ్ చరణ్ హీరోగా సుకుమార్ దర్శకత్వంలో తెరకెక్కుతున్న RC 17 సినిమా.. ఇప్పుడు ఈ విషయంలో ఆసక్తిని పెంచుతోంది. ముఖ్యంగా హీరోయిన్ పాత్రకు ఎంత ప్రాధాన్యత ఇస్తారనే చాలామంది చూస్తున్నారు.

అయితే ఇందుకు కారణాలు లేకపోలేదు. రంగస్థలం సినిమా నుంచి సుకుమార్ తెరకెక్కించిన కొన్ని సినిమాల్లో హీరోయిన్ పాత్రలపై నెగిటివ్ కామెంట్లు వచ్చాయి. మహిళా పాత్రలను చూపించే విధానంపై కొన్ని సందర్భాల్లో విమర్శలు కూడా వచ్చాయి. అంతేకాకుండా ఆయన శిష్యుల సినిమాల్లో కూడా ఇదే విషయం చాలా వివాదాలకు దారితీసింది. రామ్ చరణ్ నటించిన బుచ్చిబాబు సానా పెద్ది సినిమాలో జాన్వి కపూర్ పాత్ర పై ఎన్ని విమర్శలు వచ్చాయో తెలిసిన విషయమే. అలాగే శ్రీకాంత్ ఓదెల ది పారడైజ్ సినిమాలో హీరోయిన్ క్యారెక్టర్ పైన కూడా ఎన్నో నెగటివ్ కామెంట్స్ వచ్చాయి. మొత్తానికి సుకుమార్ శిష్యులు ఇద్దరు తెరకెక్కించిన రెండు చిత్రాల పైన ఈ మధ్య పెద్ద దుమారమే రేగింది.

ఇలాంటి పరిస్థితుల్లో RC 17 విషయంలో సుకుమార్ మరింత జాగ్రత్తగా ఉండాల్సిన అవసరం ఉంది. హీరో పాత్రకు ఎంత ప్రాధాన్యత ఇస్తారో, హీరోయిన్ పాత్రకు కూడా అంతే గౌరవం, ప్రాధాన్యత ఇవ్వాలి. ఇప్పటివరకు కొన్ని సినిమాల్లో హీరోయిన్ పాత్రల విషయంలో లెక్కలు తప్పినా పెద్దగా పట్టించుకోకపోవచ్చు. కానీ ఇప్పుడు సోషల్ మీడియా కాలంలో చిన్న తప్పు కూడా పెద్ద ఎత్తున దుమారం రేపుతుంది. కాబట్టి ఈసారి ఈ పాత్రలో చిన్న తప్పులు జరిగినా.. ఈసారి లెక్కల మాస్టర్.. హీరోయిన్ సబ్జెక్టులో పూర్తిగా ఫెయిల్ అయినట్టే అవుతుంది.

అందుకే RC 17 విషయంలో హీరోయిన్ క్యారెక్టర్ లెక్కలు మాత్రం తప్పకూడదు మాస్టర్. ఈ పాత్రను సరిగ్గా తీర్చిదిద్దితే సినిమాకు మంచి పేరు వస్తుంది. అదే విషయంలో పొరపాటు జరిగితే మాత్రం సుకుమార్ ప్రతిష్టపై కూడా ప్రభావం పడే అవకాశం ఉంది. ఈ విషయాన్ని జాగ్రత్తగా గమనించుకొని.. సుకుమార్ ఈ సినిమా కథలో హీరోయిన్ క్యారెక్టర్ రాసుకోవడం మంచిది.