బెస్ట్ పెర్ఫార్మర్స్ గా సమంత - సూర్య లకు ప్రతిష్టాత్మక అవార్డ్స్..!

సౌత్ స్టార్ హీరోయిన్ సమంత అక్కినేని 'ది ఫ్యామిలీ మ్యాన్ 2' వెబ్ సిరీస్ తో ఓటీటీ వరల్డ్ లో అడుగుపెట్టిన సంగతి తెలిసిందే. దర్శకద్వయం రాజ్ నిడిమోరు - కృష్ణ డీకే రూపొందించిన ఈ సిరీస్ అమెజాన్ ప్రైమ్‌ వీడియో వేదికగా విడుదలై విశేష ప్రేక్షకాదరణ దక్కించుకుంది. లైంగిక వివక్షకు గురైన రాజీ అలియాస్‌ రాజ్యలక్ష్మి అనే తమిళ ఈలం సోల్జర్ పాత్రలో సామ్ అద్భుతంగా నటించిన విమర్శకుల ప్రశంసలు అందుకుంది. యాక్షన్ సీన్స్ తో పాటుగా బోల్డ్ సన్నివేశాల్లో కూడా నటించి అందర్నీ ఆశ్చర్యపరిచింది. ఈ క్రమంలో సమంత ను ప్రతిష్టాత్మక అవార్డు వరించింది.

'ఫ్యామిలీ మ్యాన్ 2' సిరీస్ లో నటనకు గానూ ఇండియన్ ఫిల్మ్ ఫెస్టివల్‌ మెల్‌ బోర్న్-2021 లో బెస్ట్ పెర్ఫార్మెన్స్ ఫిమేల్ (సిరీస్) అవార్డుకు సమంత ఎంపికైంది. ఈ విషయాన్ని సోషల్ మీడియా వేదికగా వెల్లడిస్తూ.. IIFM టీమ్ సమంతకు అభినందనలు తెలిపారు. దీనిపై స్పందించిన సామ్.. ఫ్యామిలీ మ్యాన్ సృష్టికర్తలు రాజ్ & డీకే లకు కృతజ్ఞతలు చెప్పింది. "ఈ అవార్డుకు నన్ను ఎంపిక చేసినందుకు చాలా ధన్యవాదాలు. ఇది నిజంగా ప్రత్యేకమైనది. నా మీద విశ్వాసం ఉంచి.. నాకు మద్దతుగా నిలిచిన రాజ్-డికె లకు కృతజ్ఞతలు'' అని సామ్ ట్వీట్ చేశారు.

'ఫ్యామిలీ మ్యాన్ S2' లో తన కెరీర్‌ లోనే బెస్ట్ పెరఫార్మన్స్ ఇచ్చినందున సమంత ఈ అవార్డుకు పూర్తిగా అర్హురాలని అభిమానులు విశ్వసిస్తున్నారు. ఈ సిరీస్ తో నేషనల్ వైడ్ క్రేజ్ తెచ్చుకున్న సామ్.. ప్రస్తుతం గుణశేఖర్ దర్శకత్వంలో 'శాకుంతలం' అనే పాన్ ఇండియా మూవీలో నటిస్తోంది. ఇకపోతే 'ఫ్యామిలీ మ్యాన్' లో లీడ్ రోల్ ప్లే చేసిన విలక్షణ నటుడు మనోజ్ బాజ్ పాయ్ కు బెస్ట్ పెరఫార్మన్స్ మేల్ (సిరీస్) కేటగిరీలో అవార్డ్ వచ్చింది.

కాగా, 2021 ఇండియన్ ఫిల్మ్ ఫెస్టివల్ ఆఫ్ మెల్‌ బోర్న్ (IFFM) లో 'ఆకాశం నీ హద్దురా' ఉత్తమ చిత్రంగా.. ఇందులో అద్భుతమైన నటన కనబర్చిన హీరో సూర్య 'బెస్ట్ పెరఫార్మన్స్ మేల్' అవార్డ్ గెలుపొందారు. సుధా కొంగర దర్శకత్వంలో తెరకెక్కిన ఈ చిత్రం గతేడాది అమెజాన్ ఓటీటీలో విడుదలై సూపర్ రెస్పాన్స్ అందుకున్న సంగతి తెలిసిందే. IFFM-2021 లో బెస్ట్ వెబ్ సిరీస్ గా 'మీర్జాపూర్ 2' నిలిచింది. ఇందులో 'షేర్ని' 'గ్రేట్ ఇండియా కిచెన్' 'లూడో' 'ఫైర్ ఇన్ ది మౌంటైన్స్' వివిధ విభాగాల్లో అవార్డులు గెలుచుకున్నాయి.