ఒక్క నైజాం ఓపెన్.. అప్పుడే ‘ప్యారడైజ్’ స్పీడ్ ఇలా!

నాని ‘ది ప్యారడైజ్’ బుకింగ్స్ స్టార్ట్ అవుతున్నాయి. ఇండియాలో ఇప్పటివరకు పూర్తిస్థాయిలో నైజాం బుకింగ్స్ మాత్రమే ఓపెన్ అయ్యాయి. అయినా టికెట్ల అమ్మకాలు గట్టిగానే ఉన్నాయి. బుక్‌మైషో, డిస్ట్రిక్ట్ కలిపి గంటకు 11 వేలకుపైగా టికెట్లు అమ్ముడవుతున్నట్లు తెలుస్తోంది. రిలీజ్‌కు ఇంకా మూడు రోజులు ఉండగానే ఈ రేటు రావడంతో మిగతా ప్రాంతాల బుకింగ్స్ తెరుచుకున్నాక నెంబర్ ఎంత పెరుగుతుందో చూడాలి.

నైజాం బుకింగ్స్ ఓపెన్ అయిన కొద్ది గంటల్లోనే లక్షకు పైగా టికెట్లు అమ్ముడైనట్లు రిపోర్ట్స్ వచ్చాయి. అడ్వాన్స్ అమ్మకాల విలువ కూడా రూ.1 కోటి దాటింది. సెప్టెంబర్ 23 సాయంత్రం స్పెషల్ షోలు ఉండగా, 24 నుంచి రెగ్యులర్ షోలు మొదలవుతాయి. తెలంగాణ ప్రభుత్వం టికెట్ ధరల పెంపునకు ముందే అనుమతి ఇవ్వడంతో ఈసారి చివరి నిమిషం వరకు బుకింగ్స్ ఆపాల్సిన పరిస్థితి రాలేదు.

ఓవర్సీస్‌లో మాత్రం బుకింగ్స్ ముందుగానే మొదలయ్యాయి. నార్త్ అమెరికా ప్రీమియర్ ప్రీసేల్స్ ఇప్పటికే 5 లక్షల డాలర్ల మార్క్ దాటాయి. నైజాం అమ్మకాలు కూడా చేరడంతో ప్రపంచవ్యాప్తంగా అడ్వాన్స్ సేల్స్ రూ.10 కోట్లకు చేరినట్లు లేటెస్ట్ ట్రేడ్ అప్‌డేట్స్ చెబుతున్నాయి. ఆంధ్రప్రదేశ్ బుకింగ్స్ ఇంకా పూర్తిగా తెరుచుకోకుండానే ఈ నెంబర్ రావడం ఇక్కడ ముఖ్యమైన పాయింట్. నార్త్ అమెరికాలో ఇంకా కొత్త షోలు కూడా యాడ్ అవుతున్నాయి.

నైజాం ‘ప్యారడైజ్’కు చాలా కీలకమైన మార్కెట్. ఈ ప్రాంత థియేట్రికల్ రైట్స్ సుమారు రూ.35 కోట్లకు వెళ్లినట్లు ట్రేడ్ సమాచారం. నాని కెరీర్‌లో ఈ ఏరియాకు ఇదే అత్యధిక బిజినెస్. అందుకే లక్ష టికెట్ల ప్రారంభం బాగున్నా అసలు టార్గెట్ చాలా ముందుంది. మొదటి రోజు భారీ గ్రాస్ రావడంతో పాటు తర్వాతి రోజుల్లో కూడా వసూళ్లు నిలబడాలి.

‘దసరా’ తర్వాత శ్రీకాంత్ ఓదెలతో నాని చేస్తున్న రెండో సినిమా ఇది. ఈసారి నైజాంలో పెద్ద రిలీజ్ కోసం నిర్మాతలు ముందుగానే ప్లాన్ చేశారు. సెప్టెంబర్ 23 స్పెషల్ షోకు రూ.500 ధరకు అనుమతి ఉంది. 24 నుంచి నాలుగు రోజుల పాటు సింగిల్ స్క్రీన్స్, మల్టీప్లెక్స్‌లలో పెరిగిన ధరలు అమల్లో ఉంటాయి. ఆ ధరలతోనూ మొదటి బుకింగ్స్‌లో టికెట్లు వేగంగా కదులుతున్నాయి.

ఇప్పుడు ఆంధ్రప్రదేశ్ బుకింగ్స్ ఓపెన్ అయితే మరో పెద్ద నెంబర్ యాడ్ అవుతుంది. సీడెడ్, ఉత్తరాంధ్ర, గుంటూరు, కృష్ణా, గోదావరి జిల్లాల షోలు ఇంకా రావాల్సి ఉన్నాయి. ఓవర్సీస్‌లో కూడా పూర్తి షో కౌంట్ అందుబాటులోకి రావాల్సి ఉంది. ఇక సెప్టెంబర్ 23 ప్రీమియర్స్ మొదలయ్యే సమయానికి మొత్తం అడ్వాన్స్ ఎంతకు చేరుతుందన్నది చూడాలి.