పూరి తమ్ముడి చివరాఖరి ఆశ

పూరి జగన్నాథ్ పీక్స్‌ లో ఉన్న టైంలో ఆయన చేతుల మీదుగా కథానాయకుడిగా పరిచయం కావడం కంటే అదృష్టం ఇంకేముంటుంది..? పూరి తమ్ముడు సాయిరాం శంకర్ అలాంటి అదృష్టమే పొందాడు. కానీ హీరోగా అతడి తొలి సినిమా ‘143’ నిరాశ పరిచింది. ఆ తర్వాత కూడా తమ్ముడిని ఏదో రకంగా ఆదుకోవడానికి తన వంతు ప్రయత్నం చేస్తూనే ఉన్నాడు పూరి. కానీ ‘బంపర్ ఆఫర్’ సినిమాకు స్క్రిప్టు ఇచ్చి దాన్ని నిర్మించినా.. ఆ తర్వాత ‘రోమియో’ సినిమాకు కథ అందించినా.. వేరే సినిమాలకు పరోక్ష సాయం అందించినా.. ఇలా చాలా రకాలుగా సాయిరాంకు పూరి సహకారం అందించినా అతను నిలదొక్కుకోలేకపోయాడు. కొన్ని నెలల కిందటే ‘అరకు రోడ్‌ లో’ అనే థ్రిల్లర్ తో ప్రేక్షకుల్ని పలకరించాడు సాయిరాం. అది కూడా నిరాశ పరిచింది. ఇప్పుడు అతడి ఆశలన్నీ ‘నేనో రకం’ మీదే ఉన్నాయి.

సుదర్శన్ అనే కొత్త దర్శకుడు రూపొందించిన థ్రిల్లర్ మూవీ ఇది. ఇందులో తమిళ సీనియర్ నటుడు శరత్ కుమార్ ఇందులో కీలక పాత్ర పోషించడం విశేషం. జాతీయ అవార్డు అందుకున్న తమిళ నటుడు బాబీ సింహా భార్య రేష్మి మీనన్.. సాయిరాం సరసన కథానాయికగా నటించింది. చక్రి తమ్ముడు మహిత్ నారాయణ సంగీతం అందించాడు. ఈ చిత్రం ఎప్పుడో పూర్తయినా అనివార్య కారణాల వల్ల వాయిదా పడుతూ వచ్చింది. ఎట్టకేలకు ఈ నెల 17న ఈ చిత్రాన్ని రిలీజ్ చేయాలని ఫిక్సయ్యారు. కొన్ని రోజులుగా ఈ చిత్రాన్ని కొందరు మీడియా వాళ్లకు.. సినీ ప్రముఖులకు ప్రివ్యూలు వేసి చూపిస్తున్నారు. పర్వాలేదనే టాక్ వస్తోంది. పెద్ద సినిమాల తాకిడి తగ్గిన నేపథ్యంలో చిన్న సినిమాలకు ఇప్పుడే కాసిన్ని థియేటర్లు దొరుకుతున్నాయి. ఈ టైంలోనే సినిమాను రిలీజ్ చేసేయాలని చూస్తున్నారు. దిల్ రాజు బేనర్ మీద రిలీజవుతున్న ‘వెళ్లిపోమాకే’తో ఇది పోటీ పడనుంది. మరి ఈసారైనా సాయిరాం శంకర్ ఆశించిన ఫలితాన్నందుకుంటాడేమో చూడాలి.

Like Us on Facebook : https://www.facebook.com/Tupakidotcom/